Revelesen 2 - Basef Buꞌwami Godi

Basef mafe'ma esis Kristen sape Efesusi

¹ Ine' da'a anom basef mofe'ma ensel anama numafi sios amam nematawa Kristen sape Efesusi. Ae' aman ahapila ondowa amama 7-peleim lagel ae'anai da'isinai afe' la'afena gol amama lamifah matomami 7-peleim. Ae' anda'mepago basef amama ipe'.

² Ae' egawa amamaga maim ipe' panda'ami opeh lu'wami. Nimanimi matagamepa, paitu la'ifipa la'ela'ef, ina patanima, owa'. Ea' ae' egawa ipe' paitu la'ifipa endilisi ma pandaiwa'ma amama manda' waf aonai. Ipe' pawaloga amam amama mambaso'ami ma'i amam aposel, patolom pegawa amam ina aposel, owa'. Amam mambaso'ami.

³ Ipe' paitu la'ifipa la'ela'ef ma epes isima sandaiwa'ma agel ae'anai ma sanda'mepa waf aonai, ina patanima, owa'. Ae' egawa ipe' panda' opeh ae'ami lu'wami la'ifipa ea' ina umbamahepa pakwahom, owa'etin. Ipe' paitu la'ifipa pefa' nimanimi amama.

⁴ Ea' dei' anom basef awami mapomepa. Fowa' dambadamba ukup ipe'imi maimaila Ae' pembale'efa Ae' andeande', ea' dei' owa'etin.

⁵ Dei' ukup mi'i' waf anama bu'unai fowa' pali' panda'anai. Ea' pemboma opalef pilana penda'ana pigi'mana wapoti' si'i fowa' dambadamba panda'ana. I'i ipe' owa' pemboma opalef, anona nemaf ae' ifi'i etagamepa ili'amona gol amama ipe'imi lam natamonomi.

⁶ Ea' dei' anona waf bu'unai ata' napaipa. Enis epes hiesi agel sa'i Nikolas Ae' andaiwa' endilisi ma waf esis sanda'anai, ea' ipe' wapoti' pewa' alafugahas pandaiwa' endilisi ma waf esis sanda'anai.

⁷ Ipe' emi egafipa aligah mapaipei peme' andeande' basef amama Ambal Bu'unai Godi nawalapama sios esis amam nematawa Godi! Emi egafis situ la'ifis sili'amona wandafa waf aonai, anona nemaf Ae' i'i aho'ma esis sea' su'utip lawag anama epes se'am sofa' ambagof namumi. Lawag anama notawa aof Godi agiliguma Paradais.

Basef mafe'ma esis Kristen sape Smernai

⁸ Ine' da'a anom basef mofe'ma ensel numafi sios esis amam nematawa Godi sape Smernai. Ae' ape Dembiwei la'ela'ef hihif ape ali', ape agi' endilisi. Fowa' aga', dei' ehafel wapoti' ape namowe ambal napaiwe. Dei' anda'mepago basef amama ipe' a'i,

⁹ Ae' egawa nimanimi amama matagamipei ea' Ae' egawa ipe' pape kwahupei otamba hiahaom maim a'epa. Owa'etin. Ipe' amamaga hiami ma'omepa gani ilif heven. Ae' egawa basef amama awami enis epes sa'iama ipe'. Amam nematawa isima sambaso'mepa sa'i, ‘Afa' Juda.’ Ea' esis ina saila waf Judai, owa'. Esis sambaso'mepa. Esis wambota Satani etis. Ae' egawa amamaga amama.

¹⁰ Ipe' ina umbamehepama nambimb pefa' nimanimi, owa'. Ipe' peme'! Nambimb Satan nonda' enipa penda' kalabusa nogwamba ipe' pefa' nimanimi amama nimeguf 10-peleim. Ea' kwawie', ipe' pembale'efa Ae' pitu la'ifipa ma enis si'i sehepa pega', pitu la'ifipa pembale'efa Ae'. Ama Ae' anona nemaf ease'epa ambal namunai ipe' si'i amamaga bu'wami esis sasagih sikila' sefa'ami.

¹¹ Ipe' emi egafipa aligah mapaipei, peme' andeande' basef amama Ambal Bu'unai Godi nawalapama esis amam nematawa Kristen. Emi egafis situ la'ifisa sili'amona wandafa waf aonai, anona nemaf ga' anama neafe'ma bifi ina nohambombagas nonda'as sefe' wambel aonai, owa'.

Basef mafe'ma esis Kristen sape Pergamumi

¹² Ine' da'a anom basef mofe'ma ensel anama numafi sios amam nematawa Kristen sape Pergamumi. Ae' ahapila bainat launai hi'alina wa'owa'ili. Ea' anda'mepago basef amama ipe' a'i,

¹³ Ae' egawa wambel ipe'inai. Satan atona ata' nape dembinai ma wambel anama. Ea' ipe' pahapila agel ae'anai la'ifipei pembale'efa Ae'. Ipe' ina pakwaha pembale'efa Ae', owa'. Fowa' aman anama Antipas anan nawalapa basef Ae'ami andeande'. Ea' sahana naga' wambel ipe'inai Satan napoma. Ea' nogota anama ipe' ina pakwaha pembale'efa Ae', owa'.

¹⁴ Ea' Ae' a'i i'ipipa anom basefa waf aonai ipe' panda'anai dei' ata' napomepa. Enis amam nematawa sape salomepa Pergamum, esis ata' saila waf anama si'i anona aman Balam fowa' nanda'anai la'ifis. Waf aman anama na'ama. Fowa' gani anan nihi'amba anona aman Balak nambaso'mana nanda' esis amam nematawa Israelisi sowa sanda' waf aonai. Ea' Balak nafela ukup esis Israeli ma sagwa' mafis maloma gwa'aimi amama saso' god baso'omunai sanda' waf aonai so'a waolanai.

¹⁵ Ea' na'ama etin enis amam nematawa saloma ipe' esis ata' saila waf anama aonai enis epes hiesi sa'i agel Nikolas sanda'anai.

¹⁶ Ipe' pemboma opalef pekwaha waf aonai ipe' panda'anai. I'i owa', Ae' felefele' a'i etagamepa epa' eloma epes isima owa' somboma opalef sifi'mai ae'i ehas bainat nape malogel ae'anai.

¹⁷ Ipe' aligah mapaipei peme' andeande' basef amama Ambal Bu'unai Godi nawalapama esis amam nematawa Kristen. Emi egafis situ la'ifisa sili'amona wandafa waf aonai, Ae' anona nemaf ese'asa gwa'aimi Ae'ami bu'wami mandambaho' mape heveni. Gwa'aimi amama agilima mana. Ea' ese'asa anom otamba bu'wami afitimi atona etin, ea' enda' anona agel namunai nil otamba amama. Ina enin epen negawa agel anama, owa'etin. Epen nefa' otam anama, enin etin negawana.

Basef mafe'ma esis Kristen sape Taiatairai

¹⁸ Ine' da'a anom basef mofe'ma ensel anama numafi sios amam nematawa Kristen sape Taiatairai. Ae' nogalomana Godi, naep ae'ami howalagon endilisi si'i nif fandom la'ifim endilisi, bo'wagah ae'ami howalam gambigambis endilisi si'i bras howalagon.

¹⁹ Ae' egawa ma waf hianai bu'unai ipe' panda'anai. Ae' egawa ipe' ukup maimaila God naloma epes wapoti' pembale'efa Ae' panda' opeh hiami pagiambama epes hiesi. Ae' egawepa paitu la'ifipa ma nimanimi matagamipei. Ae' egawa maol anama bu'unai ipe' fowa' panda'anai. Ipe' dei' panda' maol anama bu'unai hianai pikila' fowa' panda'anai.

²⁰ Ea' Ae' anom basefa waf aonai ipe' panda'anai. Ipe' pati nemata'w akwama Jesebel kwape kwalomepa. Akwa'w kwa'i, ‘Ae' profet a'i basef Godi mandambahi'i.’ Owa', kwambaso'mepa kwawalipa ipe' panda' maola ae'i panda' waf so'a waolanai aonai ma pa' gwa'aimi amama sondolali saso' god baso'omunai.

²¹ Ae' a'i akwa'w komboma opaf, amama atom dei' Ae' ata' animbalo'w kwape anom nimeguf, owa'etin. Akwa'w ina kwa'i komboma opaf kowa' alafugama waf anama aonai so'a waolanai, owa'.

²² Ea' dei' peme'! Nambimb ikwaho'w kowai balata ese'akwa nimanimi lu'wami moloma bumbilita lu'unai. Ea' esis amam nematawa saila waf aonai akwa'unai wapoti' sofa' nimanimi amama. I'i esis owa' somboma opalefa sowa' alafugaha waf anama sanda'anai, ese'as nimanimi amama lu'wami.

²³ Esis isima saila basef akwa'umi wapoti', nambimb ehas soga'. Ama esis amam nematawa hiesi Godi sogawa Ae' awaloga nomonas maloma ukup epes hiesi andeande'. Ea' anona nemaf egwamepa amamaga ipe' atona etin, mondahama waf ipe' panda'anai.

²⁴ Dei' ae' a'i i'ipipa anom basef ipe' enipa amam nematawa pape wambel Taiatairai, ipe' owa' pila basef amama awami akwa'umi, owa' pila waf anama sofalana sa'i, ‘Basef mandambahi'i ma waf Satani,’ owa'. Ae' a'ipipa na'ama. Ae' ina nambimb ese'epa anom nimanimi wapoti' ma ipe', owa'.

²⁵ Waf hianai bu'unai ipe' pagi'manai, anama ipe' pembale'ef la'ifipa pefe' ma petaga nogota Ae' iefi'ianai.

^26-27 Ipe' emi egafipa pitu la'ifipama wandafa pili'amona waf aonai ma pila okom Ae'anai pefe' petaga nogota hi'ilana, Ae' anona nemaf ese'epa pepel ipe'. Ama pepe dembipei ma amam nematawa hiesi. Na'ama etin si'i fowa' Ahalome nase'e pepel ma ape Dembiwei imafi epes hiesi. Ipe' wapoti' pepe dembipei pefa' pepel pimafi enis amam nematawa wapoti' na'ama. Ipe' pimafias la'ifipa si'i anona aman nahapila kalamuta sanda' ain sanda'anai, si'i anona aman nawala malep papalalana.

²⁸ Ea' ese'epa ondo'w kuhumbitai'wi lala'wan.

²⁹ Ipe' emi egafipa aligah mapaipei peme' andeande' basef amama Ambal Bu'unai Godi nawalapama esis amam nematawa Kristen.