Revelesen 19 - Basef Buꞌwami Godi

Esis amam nematawa Godi sandanifel ma Babilon awagon

¹ Amama mafe'ma ea', ame' anom amamaga mame' si'i mif lu'wami esis amam nematawa hiesi sape heven ilifi. Esis sa'i na'ama sa'i, “Ape' mefela agel Godi lu'una! God ape'inei atona nefa' ape' motanimani. Anan agel lu'unainai, pepel lu'unainai, nafifili napeinai.

² Basef lu'wami ma kot, anan nawaloga epesa waf endilisinai bu'unai andeande' hi'alas. Nemata'w akwama dembe'wi kwanda' so'a wauli kwasapala esis amam nematawa hiesi etapasi ma sanda' waf aonai so'a waolanai saloma'w. Ea' God nanda'makwa basef. Akwa'w kwaha esis sanda'mana maol Godi saga'. Ea' dei' God nagwama'wa ofagema amama akwa'umi mafe'ma akwa'w.”

³ Ea' esis sakolasa mif wapoti' na'ama sa'i, “Ape' mefela agel Godi lu'una wambel anama lu'unai fandona nif nogoh malo. Amama malo malata ilif la'ela'ef hihif!”

⁴ Ea' amam agufumi dembemi 24-peleim maloma amama biamibiam ambal namunai napaimi mindiwa nembawa balagah motawa manda' lotuma God natoma balata lu'unai. Amam ma'iam mehip ma'i, “Endilisi, ape' mefela agel Godi lu'una!”

⁵ Ama balata lu'unai Godi anona malogel na'i nafi'i na'i, “Ipe' panda'mana maol Godi ma umbamahepama Anan paila basef ananimi, ipe' epes agof a'epa paloma epes isima agufisi, ipe' hipei pekolasa pefela agel Godi! Anan God ape'inai!”

Sipsip noganai naso' nemata'w ea' gwa'aimi lu'wami mataga

⁶ Ea' ame' anom amamaga si'i basef hiami matagama epes amam nematawa hiesi sandatama sapani. Sape sa'i mimil si'i embel mowa kululu' etin. Ea' anom amamaga manda'am si'i otaga dilulu bugwalag, maf anama na'iam mehip na'ama na'i, “Ape' mefela agel Godi! Dembinai anan God ape'inei. Anan pepel hianainai! Dei' anan nataga king endilisi ma numafi amamaga hiami hi'alam.

⁷ Dei' ape' mondanifel mefela agel Ananinai. Dei' main, nemaf nataga ea' ma sipsip noganai na'i noso' nemata'w. Ea' nemata'w anani'wi kwandandombol kwape.

⁸ God nase'akw luwaguf afitimi bu'wami mafifili endilisi. Akwa'w kwala amama ma alop akwa'unai.” Luwaguf amama mondola'wifa waf bu'unai esis amam nematawa Godi sanda'anai.

⁹ Ea' ensel anama na'ipi na'i, “Ine' da'a basef amama. Epes isima God nofalas sofi'mai gwa'aimi lu'wami ma sipsip noganai noso' nemata'w akwama, isima esis sondanifel.” Ea' anan na'ipi wapoti' na'i, “Basef amama basef Godi endilismi.”

¹⁰ Ea' ae' indiwa nembawa balaga etawa felefele'ma bo'wagah enseli ma enda' lotumana, ea' na'ipi na'i, “Ina nenda'am na'ama, owa'. Ae' alupuwei ine'iwei aloma ine' naloma sahopena ine'imi, afa' wandao'oma wanda' opeh Godi atom waloma esis hiesi sembale'efa basef endilisimi Jisas nawalipasami. Ine' nenda' lotuma God atona. Ape' mogawa basef amama endilisimi Jisas nawalapama ipe'ami, amama mafela amam profet mawalipasa basef Godi.”

Anona aman anan Krais natoma hos afitinai nafi'i

¹¹ Ea' ati otaga heven nandawisi' nogal, ati anona hos afitinai nape. Epen natomanai agel ananinai sa'i, “Epen numafi opeh ananimi andeande', nanda' waf endilisinai atona.” Anan naila waf bu'unai atona nowaloga esis amam nematawa ma basef lu'wami ea' nanda' wandafa waf bu'unai atona.

¹² Naep ananimi si'i nif fandumi ea' hagw bu'wami hiami si'i dembemi king atom mowalo'ami mape balaga Ananinai. Anom amef mail alop ananinai, anama agel ananinai. Anan atona nogawa agel anama, enis epes owa'.

¹³ Esimbel masa'opa luwaguf ananimi laumi nalami. Ea' esis sofala agel ananinai sa'i, “Basef Godi.”

¹⁴ Anan nape nali'ma amam soldia mape heveni matoma hos amama afitimi amamumi mailana mafe'. Alop amamunai esis sowaho'mama luwaguf afitimi bu'wami endilisi.

¹⁵ Ea' anona bainat hi'alina endilisi nape malogel Ananinai nawisi ande'. Anan na'i noha amam nematawa hiesi sape etap hiagomai ma bainat anama. “Anona nemaf Anan numafi epes hiesi sape etap hiagoma. Numafias la'ifina si'i nahapila anona bolam sanda' ain sanda'anai.” Anan nofa'asa su'utip wain ma otam tang anama waini, amama mondola'wifa okom lu'unai wandafunai Godi, Anan la'ifinai ma amamaga hiami.

¹⁶ Anom amef agel Ananinai mailana nimbe naloma luwaguf ananimi. Agel anama na'ama. Dembinai king ma amam king hiami, Dembinai ma dembemi hiami.

¹⁷ Ea' ati anona ensel naitu felefele'ma aon alipunai nape natalogoma. Anan na'i mehip na'ipa amiguf hiami mufia' mafe' ilif otagai na'i, “Ipe' pindowa'anima pifi'mai gwa'aimi anama lu'wami Godi!

¹⁸ Ama pea' alop amam king dembemi noloma mafis amam kepten mumafi amam soldiai moloma mafisa amam amama dembemi la'ifimi moloma mafis hosi moloma mafis epes hiesi satumami wapoti'. Ipe' pea' mafis epes hiesi hi'ilas na'ama. Epes hiesi, enis agof a'asi sanda' opeh sape owina enis epes, enis agufisi sumafi enis epes sanda' opehi, enis dembesi agufisi, enis agof a'asi.”

¹⁹ Ea' ati mafin anama lu'unai nape aolupi naloma dembemi king amama etapami maloma soldia amamumi mandatama mape. Amam ma'i mopa' moloma aman anama natoma hos afitinai naloma soldia ananimi.

²⁰ Aman anama natoma hos afitinai nikila' mafin anama nape aolupi naloma profet anama nawalapa basef baso'maimi nikila'am nanda'am manda' kalabus. Profet anama fowa' nanda' pepel si'i God atona nanda'anai ma naep mafin anama nape aolupi. Waf anama atona nambaso'ma epes sofa' ikwafa mafin anama nape aolupi ea' sanda' lotuma ambal atona ananinai. Mafin anama naloma profet anama nambaso'ami amam biam ata' mape ambagof namumi sokwahom mafe' nif lu'wami fandom otam batafumi agel salfa hul lu'unai nowala owa' notambili.

²¹ Anom soldia maila mafin anama aolupunai maloma profet anama nambaso'masi, amam ata' mape. Ea' aman anama natoma hosi naha amam soldia amamumi maga'. Anan naham bainat anama launai nape malogel ananinai. Ea' amiguf hiami mafi'i ma' alop amamunai ea' opalef amigufi elihim endilisi.