Revelesen 18 - Basef Buꞌwami Godi

Wambel lu'unai Babilon anama awagon

¹ Amama mafe'ma ea', ati anona ensel nakwaha heven nisila'i. Anan pepel napainai endilisi, sosaf ananinai howalagon nanda' etap hiagoma mafifil howalagon.

² Anan noga na'i mehip endilisi na'i, “Nemata'w akwama ao'w hi'alakw. Akwa'w basef womun etina wambel lu'unai Babilon agel lu'unainai awagon hi'alagon! Dei' nataga wambel aonai ma ambagof awami maloma amiguf awami mapaigon.

³ Dei' main, fowa' esis wambel anama sa'ipa amam nematawa hiesi sasasapa'as sa' wain asasinai numbutinai. Wain anama basef womun etina waf hianai aonai so'a waolanai esis sandanai. Ea' amam dembemi king etapami hiami wapoti' manda' waf anama so'a waolanai maloma esis wambel anama. Ea' epes etapasi sanda' bisnis sofa' otamba hiami ma waf naninani aonai esis wambelisi sanda'anai.”

⁴ Ea' ame' anona malogel na'i natagai heven na'i, “Ipe' amam nematawa ae'ipei, kwaha wambel anama piwisi ande'. Na'ama ipe' nambimb pendao'oma peloma wambel anama pefa' nimanimi lu'wami ma waf aonai esis sanda'anai.

⁵ Waf anama aonai lu'una endilisi si'i mahanip notawa ilif nalata gani heven. Ea' God okom napoma waf anama.

⁶ Ipe' pegawa waf anama nemata'w akwama kwanda' so'a wauli kwanda'anai. Ipe' pegwa waf akwa'unai dende'ana endilisi piwapanima'w waf wamanai wapoti'. Akwa'w kwakolefa waf aonai kwanda'anai nataga endilisi. Ea' pekolefa nimanimi lu'wami hiami mikila' waf akwa'inai ma pegwam mafe'ma akwa'w. Akwa'w kwamboma embel la'ifimi mala kap anama. Ea' na'ama etin ipe' awi pekolefa embel la'ifimi pese'akwam akwa'w kwea'ama kome' nimanimi awami mogwam mofe'ma akwa'w mondogwama.

⁷ Nemata'w akwama kwafela agel akwa'unai atona kwanda' waf hianai naninani ma kope andeande'. Ea' ipe' pese'akw nimanimi hiami akwa'w mondahama aligah mase'akw. Ea' penda' akwa'w konda' kwelef etin. Akwa'w okom na'i na'ama kwa'i, ‘Ae' ataga ape kwin dembiwei. Ae' ina si'i alifiwei, owa'. Nimanimi ina nambimb motagame ma elef, owa'.’

⁸ Ea' amamaga mamumami awami endilisi nambimb motagama wambel anama anona nemaf atotona. Awes lu'unai hianai notaga ea' epes hiesi nambimb selef kwapete' nolomeahas lu'unai notagamas. Ea' nif motaga fendo wambel anama Babilon hi'ilagon. Dei' main, Dembinai God nawaloga wambel anama nagwamasa nimanimi lu'wami esis. Anan pepel lu'unainai la'ifinai endilisi.

⁹ Amam king etapami manda' waf so'a waolanai aonai maloma akwa'w ea' manda' waf hianai aonai maloma'w. Nambimb amam king amama miti akwa'w feando'wa nogoh lu'wami motaga'w ea' melef kwapete'.

¹⁰ Anona nemaf amam umbamoham kwapete' endilisi ma nimanimi amama akwa'w kofa'ami. Ea' mitu laogona akwa'w mi'iam mi'i, ‘Owahipipa owahipipa endilisi ma wambel Babilon! Ipe' taun wambel la'ifinai! Nogota bandana atona si'i aua atotona mehip ipe' pefa' nimanimi amama ma waf aonai ipe' panda'anai!’

¹¹ Ea' epes sape sanda' opeh bisnis etapi ukup mopoma wambel anama ea' solopagon sope opalef nimanimagon sope. Dei' main, ina nambimb enin epen netala hiahaom ananimi wapoti', owa'etin.

¹² Hiahaom maim amama, gol bu'wami satalom otamba hiami siliwa maloma anom otamba bu'wami, ombahigis bu'wami malatamam endilisi, luwaguf bu'wami akwahimi mamumami maloma anom luwaguf silk sahapilam gogwafim maloma lawah amama amamaga alogw bu'wami ma'ami maloma amamaga hiami esis sanda' nalelef elefanim sanda'ami, amamaga amama hiami sanda' lawah satalom otamba lu'wami sanda'ami maloma amamaga sanda' bras howalagon bu'wami sanda'ami maloma amamaga sanda' ain sanda'ami maloma anom amamaga sanda' otamba bu'wami sanda'ami.

¹³ Ea' hiahaom na'ama. Lawah nembawa sagwa'ami agilima sinamon maloma paura nogoh alogw bu'womumi maloma gris sa'i mer maloma sanda amama bu'wami frankinsens maloma wain naloma wel sanda' su'utip oliv sanda'ami maloma plaua maloma wit maloma bulmakau, sipsip, hos maloma karis si'i wilkar maloma epes wapoti'. Epes isima agof a'asi sanda' maol etini sape owina enis epes. Epes isima anom dembemi ma'i esis ina epes bu'wasi. Ea' maso'asas sotalis si'i satal hiahaom maim. Amamaga amama hiami esis ina nambimb satalom wapoti', owa'.

¹⁴ Epes sanda' maol bisnis si'ipas na'ama si'i, ‘Gwa'aimi amama opalef ipe'imi mohafema pefa'ami, amama hiami makwaha ipe' mafe' ea'. Amamaga hiami bu'wami atom, otamba maim lu'wami atom maloma sosaf maim ipe'imi amamaga hiami amama makwahipa mafe'. Ama ipe' ina piti amama mope wapoti', owa'.’

¹⁵ Ea' epes isima sanda' bisnisa amamaga amama ma sofa' otamba hiami wambel anama esis umbamohas endilisi ma nemanimi awami wambel anama sofa'ami. Esis situ laogona anama opalef nimanim selef sope.

¹⁶ Ea' si'i, ‘Owahipigin, owahipigin endilisi wambel anama lu'unai Baibilon! Fowa' epes sape wambel anama sala luwaguf sosaf bu'unai atona afitimi maloma luwaguf akwahimi mamumami sofalo'ma alop asasinai ma gol maloma otamba bu'wami maloma ombahigis bu'wami salatamam endilisi.

¹⁷ Nogota bandana atona amamaga amama hiami otamba maloma sosaf maim amama ea' aom hi'alam.’ Ea' kepten hiami mumafi sip, maloma epes hiesi satala sip sofe' anona wambel, saloma epes isima hiesi sanda' boskru ma sipi, saloma epes hiesi sanda' maol bisnisa naoh embeli, epes isima hiesi situ laogona wambel anama.

¹⁸ Nemaf anama situ siti akwa'w wambel anama fendona nogoh molo, ea' si'i mehip na'ama si'i, ‘Wambel lu'unai enima nape nandati na'ama etin si'i wambel anama? Owa'etin.’

¹⁹ Ea' esis sela walombuf balagah asasimi sondahomagon selef mehip opalef aoma wambel anama awagon. Ea' si'i, ‘Owahipigin, owahipigin endilisi ma wambel anama lu'unai! Ama amam hiami mumafi sipi maloma amam matala sip mafe' naoh embeli amam mefa' otamba hiami endilisi ma otamba hiami wambel anama. Owahipigin endilisi. Ama nogota bandana atona awagon hi'ilagon!’

²⁰ Ipe' pape heven ilifi peloma ipe' amam nematawa Godi paloma ipe' aposel paloma ipe' profet, ipe' hipei pendanifel ma amamaga amama dei' matagama wambel lu'unai anama. Dei' main, God nawaloga wambel anama lu'unai ea' nagwa nimanimi lu'wami ma anama. Anan nagwa waf anama aonai esis sape wambel anama Babilon sanda'anai.”

²¹ Basef amama hi'alam, ati anona ensel la'ifinai nafela anona owap lu'unai si'i owap lu'unai soka'isa witanai. Anan nafela owap anama nakwahona nafe' nowala embel naoh. Ea' na'i, “Ea' na'ama etin anona nemaf esis sefela wambel anama lu'unai Babilon sokwahogon mehip notaga awagon nefe' nowa si'i owap anama nowala naoh ama epes ina sotologon wapoti', owa'etin.

²² Ea' gita anama ape' mofala musik anama hianai naninani moloma batagwi alelef, maguf anama ina anona nemaf ata' peme'am wapoti' wambel anama, owa'. Ea' epes isima gawaisi sanda' opeh mamumami, ipe' ina anona nemaf piti epes isima sope wambel anama wapoti', owa'. Maf owap anama lu'unai noka'isa olelemb witi, anona nemaf ina ata' some' anona wapoti' wambel anama, owa'.

²³ Elelowa lamifah ina anona nemaf ata' mififil mope wambel anama wapoti', owa'. Ea' malogel aman anama na'i neaso' nemata'wi o malogel nemata'wi kwa'i kweaso' amani, ipe' ina anona nemaf ata' peme' esis wambel anama wapoti', owa'. Fowa' epes wambel anama sape sanda' bisnis sape dambesi etapasi. Ea' esis wambel anama sambaso'ma epes hiesi ma aop ufial baso'omunai naninani sanda'ami.

²⁴ God nati wambel lu'unai anama naha profet hiami maga' maloma amam nematawa hiesi Godi. Amama atom dei' ofagema mapoma wambel anama. Ea' epes hiesi sape etap anae' esis naumbih sahas saga'i, ofagema amama wapoti' mapoma anama atogon.”