Revelesen 17 - Basef Buꞌwami Godi

Nemata'w dembe'wi kwanda' so'a wauli kofa' nimanimi lu'wami

¹ Anona ensel atotona la'afena amam ensel 7-peleim mahapila dis amama 7-peleim nafi'i na'ipi na'ama na'i, “Ine' fi'i! Nemata'w akwama kwanda' so'a wauli kwatoma embel lu'wami ilif anona nemaf kofa' nimanimi lu'wami akwa'umi. Ae' a'i ihi'ambena amama.

² Amam dembemi king etapami manda' waf hianai aonai so'a waolanai maloma nemata'w akwama. Ea' epes etapasi hiesi wapoti' sanda' waf so'a waolanai saloma'w. Ea' sataga sahaga sagaol si'i epes sa' embel wainim la'ifimi ukup mahaga magaol.”

³ Ambal Bu'unai Godi nataga la'ifina ma ae' ame' si'i na'oh nandondo'oh. Ensel anama nofa'e afe' etap wafiguma fatauguma. Anama ati ano'w nemata'w kwatoma anona mafin ilif nape aolupi akwahinai. Mafin anama agof hiami mail alop ananinai hi'alana. Agof amama basef awami findiwaimi hiami mamumami ma God. Mafin anama balagah 7-peleim mandandana wambawa 10-peleim matagana.

⁴ Nemata'w akwama kwala luwaguf akwahimi biam ina mandati na'ama etin, ea' sosaf naninani gol maloma sosaf esis sanda' otamba sanda'anai naloma ombahigis salatamam otamba lu'wami. Akwa'w kwahapila kap gol lagel akwa'unai. Waf hianai aonai nape kap anama nomoni anama. Waf naninani aonai hi'epina endilisi ma naep Godi, waf naninani aonai endilisi ma waf anama so'a waolanai ma nemata'w akwama kwaloma amamaga amama hiami awami mape si'ima kap anama.

⁵ Ea' amef akwa'umi ma agel akwa'unai nail amaga akwa'unai. Agel anama basef mandambahi'i ma'i na'ama ma'i, “Taun lu'wagoma Babilon, anama nondofala mama'wawa nematawa hiawai wanda' so'a wauli ma waf hianai aonai endilisi ma etap anae'.”

⁶ Nemata'w akwama kwaha esis amam nematawa Godi sembale'efa Jisasi sawalapa agel ananinai saga'. Ea' ati akwa'w kwa' esimbel asasimi kwataga kwahaga kwagaol. Ati akwa'w gegelalasowe kwapete'e endilisi okom natanea hiahian.

⁷ Ea' ensel anama na'ipi na'i, “Dei' maina ine' gegelalasina kwapete'ena? Na'ama owa'. Atuwasi ihi'ambena basef ofagema mape mandambaho'ma nemata'w akwama kwaloma mafin anama nofa'akwi. Mafin anama balagah 7-peleim mapainai ea' wambawa 10-peleim mataganai.

⁸ Mafin anama nape aolupi, ine' natolona ea'. Fowa' anan nape, dei' ina ata' nape, owa'. Anona nemaf nokwaha hul anama nowala owa' notambili nolatowi ilif ea' nefe' higililana owa'etin. Enis epes etapasi God ina nanda' agof asasimi mape buk ambal namunai ma nemaf anama fowa' dambadamba anan nanda' etap, owa'. Amam nematawa isima anona nemaf siti mafin anama nape aolupi gegelelesis kwapete'as. Dei' main, fowa' anan nape, dei' owa', anona nemaf, anan notaga wapoti'.

⁹ Epen emi okom bu'unai napainai, enin nogawa amamaga amama andeande'. Balagah amama 7-peleim basef womun etina halafutagw 7-peleim nemata'w akwama kwatomam.

¹⁰ Ea' balagah amama 7-peleim womun etina anom king dembemi 7-peleim wapoti'. Wanom biam ea' maga', anona dei' nape dembinai numafi amamaga. Ea' anona ina dei' nataga dembinai king, ata' owa'. Anona nemaf notaga, anan atona ata' nope dembinai nogota bandata.

¹¹ Mafin anama nape aolupi fowa' napani, dei' owa' nopani, anama si'i king dembinai anama nafe'ma 8i. Anan amam wambota atotona naloma king amama 7-peleim ama anona nemaf higiligalana.

¹² Ea' wambawa amama 10-peleim ine' natolom ea'i, amama basef womun etina anom king dembemi 10-peleim. Ina dei' mataga king dembemi, ata' owa'. Ea' amam anona nemaf mofa' pepel moloma mafin anama nape aolupi, motaga king mope dembemi nogota bandata si'i awa atotona.

¹³ Amam king amama ma'i basef mandame'mama ukup etifim ma'i anona nemaf moso' pepel amama amamunai hi'ilana mafin anama nape aolupi ma mome' basef ananimi.

¹⁴ Anona nemaf mopa' moloma sipsip noganai. Ea' sipsip noganai nikila'am. Epes saila fala ananinai naloma basef ananimi andeande', isima nandandepas ananisi etis, epes isima anona nemaf la'ifisa solomana sigikila' wandaf anama.”

¹⁵ Ea' ensel anama na'ipi na'i, “Ine' natolom embel amama lu'wami nemata'w kwanda' so'a wauli kwatomami. Embel amama basef womun etina esis amam nematawa hiesi epes afa'isi sandatama etifigin sape ea' esis amam nematawa hiesi alop naninani saloma diga hianai naninani hi'alas.

¹⁶ Ea' wambawa amama 10-peleim ine' natulumi, amama moloma mafin anama ukup amamumi wandafuma nemata'w akwama kwanda' so'a wauli. Anona nemaf mofa' amamaga hiahaom maim akwa'umi ma akwa'w ato'w kope etin alupusi a'akw. Ea' mowalima'w luwaguf akwa'umi moha'w koga' mea' ambegw akwa'umi mofa' alop akwa'unai nif fendona hi'ilana.

¹⁷ Dei' main, God atona nafela ukup amamumi ma monda' amamaga amama motaga. Fowa' anan na'iam na'i, Anona nemaf amam ukup etifim ea' pepel anama mape dembemi kingi mose'anana hi'ilana nofe'ma mafin anama nape aolupi. Ea' monda'am na'ama etin mefe' motagama nemaf anama God nanda'am mandahama amamaga amama Anan nali' na'iam.

¹⁸ Nemata'w akwama ine' natolo'wi, akwama basef womun etina taun anama wambel lu'unai nape si'i dembinai nape nali'ma amam king ma etap anama hiagoma.”