Revelesen 16 - Basef Buꞌwami Godi

Dis 7-peleim okom Godi wandafunai napaim

¹ Ame' anona malogel na'i natagai mehip ipat lu'unai Godi nomon. Malogel anama na'i nofala ensel amama 7-peleim na'i, “Ipe' pefe' pekolo'wa dis amama 7-peleim okom wandafunai Godi napaimi ma kolo'olam mofe' etap.”

² Ea' ensel nali'i anama nafe' nakolo'wa dis amama ananimi mafe' etap ea' maselis mamumami lu'wami endilisi mataga etap epes isima ikwaf anama mafin aolupunai nailas ma epes isima sanda' lotuma ambal ananinai.

³ Ea' ensel anama nafe'ma bifi wapoti' nafe' nakolo'wa dis ananimi embel naoh lu'wami. Ea' naoh amama mandamboma mataga si'i esimbela epes hiesi saga'i. Ea' amamaga mape nomon naohi maga' hi'alam.

⁴ Ea' ensel anama nafe'ma wenifi nakolo'wa dis ananimi embel walemb lu'wami maloma anama embel motah mahagofowa. Embel amama hiami mandamboma mataga esimbel.

⁵ Ea' ame' ensel anama numafi embel naohi walemb hiami na'i, “Ine' bu'winai endilisi, nanda' kot ine'inai andeande' naila ikwaf bu'unai atona nawaloga esis sanda' waf aonai.

⁶ Dei' main, esis amam nematawa hiesi saha amam nematawa bu'wasi Godi ine'isi afis saloma profet ine'imi wapoti' ea' esimbel asasimi malo. Ea' dei' nase'asa esimbel epes isima sanda' waf aonai ma sogwa' embel. Ine' nagwamasam mandahama waf aonai esis sanda'anai.”

⁷ Ea' ame' anona maf nataga balata anama sondolalima Godanai noga na'i, “Endilisi Dembinai, ine' God pepel hianai napainai. Ine' nowaloga epes ma kot ea' kot ine'inai endilisi bu'unai hi'alana.”

⁸ Ea' ensel anama nafe'ma biamibiami nakolo'wa dis ananimi ma aon alipunai ea' God nape nati owaf naofa epes nif.

⁹ Nif amama lu'wami nigisigeim endilisi ma epes isima. Ea' sa'i basef findiwaimi awami ma God numafi amamaga amama awami. Esis ina samboma opalefa sakwaha waf aonai esis sanda'anai ma sefela agel Ananinai, owa'.

¹⁰ Ea' ensel anama nafe'ma wanom biami nakolo'wa dis ananimi balata kingi lu'unai anama mafin aolupunai. Ea' owamb lu'unai nataga anama mafin aolupunai nahopogoma. Ea' esis sail waf ananinai sofa' nimanimi lu'wami. Ea' sogwa afegah asasimi nalelef tilili talala' sondola'wifa sofa' nimanimi lu'wami.

¹¹ Esis ukup mapoma nimanimi maloma maselis asasimi, dei' sa'i basef awami findiwaimi ma God nape heveni. Ina samboma opalef sowa' alafugaha waf anama aonai esis sanda'anai, owa'.

¹² Ea' ensel anama nafe'ma wanom wanomi nakolo'wa dis ananimi walemb lu'unai Yufretis. Ea' walemb embel mafa' hi'alama mondondomba eaf amam king dembemi mufi'i anama aon natefima.

¹³ Ea' ati ambagof awami wanom mandati si'i kwahowa lu'wami matagai malogel kwambon anama lu'unai naloma malogel mafin anama aolupunai naloma malogel profet anama nambaso'ami.

¹⁴ Ambagof amama awami endilisi manda' ikwaf pepel naninani ma esis sotolona sogawana. Amam mafe'ma amam king dembemi mumafi epes hiesi sape wambel hiagomai. Amam ma'i mokolasa amam atogon monda' wandaf nemaf anama lu'unai ma God pepel hianai napainai.

¹⁵ “Peme'! Anona nemaf ae' etagamepa si'i sanda' wali safi'i sataga. Atagamepa anona nemaf ipe' owa' pegawa pi'i ae' iefi'ianai. I'i epes ukup matamea sope sowaho' luwaguf asasimi andeande'ma owa' so'oh, esis ina sofe' alop atona wahifina solomas siti alop asasinai ambagof aom, owa'. Isima sondanifel.”

¹⁶ Ea' ambagof awami makolasa king hiami anagon etap tu'wanina diga Hibrui sa'i Armagedon.

¹⁷ Ensel anama nafe'ma 7i nakolo'wa dis ananimi ea' uf nofa'am. Ea' anona malogel na'i natagai balata king lu'unai nomon ipat lu'unai Godi na'i mehip na'i, “Amama dei' ea' hi'alam!”

¹⁸ Ea' otaga holala nafe', pelele'ala nafe' ea' otaga dililu bugwalagw, sowambon lu'unai nakoto'. Sowambon anama anan lu'unai endilisi ma nimeguf hiami epes sape etapi ina same' anona sowambon nakoto' lu'una fowa' si'i anama, owa'.

¹⁹ Taun anama wambel lu'unai nandawal wenifigin. Ea' wambel hiagoma etap hiagoma kantri awagon hi'alagon. Ea' God okom napoma epes sanda' waf aonai sape taun anama lu'wagoma Babilon, dei' okom ananinai wandafuna nanda' esis sa' embela kap wain nalami nahas kwapete'as. Wain anama womun etina okom wandafunai Godi.

²⁰ Ea' ailan hianai nafa' nafe' higilalana hi'alana ea' ina ata' anona halaf atotona nape, owa'.

²¹ Ea' asaf ondowa lu'wamunai si'i otamba ais afitimi mowai mahas. Asaf ondowa lu'wamunai nimanimi endilisi si'i beg kopi lu'unai atona etin. Ea' sa'ipana awagon God ma asaf ondowa lu'wamunai mowai maha esis.