Revelesen 15 - Basef Buꞌwami Godi

Ensel 7-peleim mahapila amamaga awami endilisi mandandam

¹ Ati anom amamaga laifimi matagai heven ea' okom natanea ma amama. Ati ensel 7-peleim mape ea' amam mahapila amamaga awami endilisi mandandama epes. I'i anona nemaf amamaga amama awami hi'ilam, ina ata' anom motaga wapoti', owa'. Dei' main, amamaga amama awami 7-peleim, amama okom wandafunai Godi ea' hi'ilana endilisi.

² Ea' ati anom amamaga si'i naoh embel lu'wami mandati si'i glas amama sanda'am maloma nif. Epes isima saitu la'ifis sali'amona wandafa waf aonai sahagofa mafin anama lu'unai nape aolupi naloma ambal ananinai maloma ikwaf ananinai 666, esis saitu naoh amama da'malifima si'i glas. God nase'as anom musik si'i gita sahapilam.

³ Esis sanda' awaf Moses nanda'mana opeh Godi naloma awaf sipsip noganai. Awaf anama na'ama. “Dembinai, ine' God pepel hianainai. Opeh hiami ine' nanda'ami, amama la'ifimi ea' afa' watolom ukup matameamam hiahiam! Ine' king numafi epes hiesi ea' waf ine'inai bo'ona endilisinai hi'alana!

⁴ Dembinai, ine' etina nape bo'wena. Dei' emi egafis owa' umbamahasa ine'? Owa'etin. Hiesi umbamahasa ine' sanda' lotu ma ine' etina. Emi egafis owa' sefela agel ine'inai? Owa'etin. Epes wambotagw hiami ma etap hiagoma anona nemaf sifi'i sonda' lotu ma ine' etina. Dei' main, waf bu'unai ine'inai nataga alihiguma nandawalap.”

⁵ Amama mafe'ma ea', atologon wapoti' ati ipat bu'unai Godi notawa gani heven. Ipat anama nagal alihina ati nomon ipat anama nape sanda' sel sanda'anai God napeinai.

⁶ Ea' ensel amama 7-peleim mahapila amamaga awami endilisi mandandam nohambamboga epes, makwaha ipat anama mawisi ande'. Ea' mowaho' luwaguf afitimi bu'wami endilisi howalagon mafifil endilisi. Mowaho' legw si'i goli managam mefetagw amamumi.

⁷ Ea' anona la'afena amam biamibiam mape namumi nase'ama dis lu'wami 7-peleim sanda' gol sanda'ami mandandama amam ensel atona etin. God nape namunai la'ela'ef okom wandafunai ananinai nape si'inama dis amama 7-peleim.

⁸ Ea' nogoh amama mataga mafifili ma pepel Godi, amama si'ima ipat anama Godi. Ea' ina enin epen la'ifina nefe' nuwis ipat anama nomon, owa'. Esis sape sohafa ensel 7-peleim monda' opeh hi'ilam amamaga amama awami mahapilam mandandami ata' mili'.