Revelesen 14 - Basef Buꞌwami Godi

Esis 144,000-peleis sanda' awalef dambaimi

¹ Ae' atologon wapoti' ati sipsip anama noganai naitu halaf Saion ea' amam nematawa hiesi endilisi 144,000-peleis saitu salomana. Agel sipsip noganai naloma agel ahalomana ananinai agof amama mail amagah asasimi.

² Ea' ame' anom amamaaga manda'am mafi'i gani heven si'i embel mowa kululu' etin mafe', si'i otaga dililuwala mehip. Ae' ame' maf anama si'i epes saha gita naloma musik manda'am.

³ Esis sanda' anona awaf dambainai ma anama balata lu'unai Godi notawa natologoma, ma naep amamaga biamibiam mape namumi maloma naep agufumi 24-peleim. Amam nematawa isima hiesi endilisi 144,000-peleis, God natalis la'afena epes hiesi etapasi, amama atom la'ifisa sogawa awaf anama. Ina enis epes wapoti' la'ifisa sogawana, owa'.

⁴ Epes isima sape bo'wes endilisi. Amam ina manda' waf aonai maloma nematawa, owa'. Mape bo'om. Wambel anama sipsip noganai na'i neafe'ma, esis sagi'mana same' basef ananimi sanda' maol ananinai. God natalis la'afena esis amam nematawa hiesi etapasi sape sali'i si'i ofa bu'unai nali'i God naloma sipsip noganai mofa'anai.

⁵ Esis ina sanda' anom basef kwamaimi baso'maimi, owa'. Esis basef ofagema ma waf aonai a'as.

Ensel wanom ma'i anom basef

⁶ Ae' ati anona ensel nufia' nafe' gani ilif. Nofa'ai basef bu'wami Godi mape la'ela'efi nanda' opeh amama ma na'ipasa basef amama esis amam nematawa hiesi sape etapi. Nawalapama epes hiesi sape kantri hiagoma gani etap hiagoma sa'i diga naninani ma alop naninani hianai.

⁷ Anan noga na'i mehip na'ama na'i, “Nogota nataga ea' ma God nowaloga epes hiesi ma kot. Ipe' umbamehepa ma Anan pila basef ananimi, pefela agel ananinai. Ipe' penda' lotuma God, Anan nanda' heven naloma etap naloma naoh embel maloma embel amama hiami mataga etap owini.”

⁸ Anona ensel nagi'mai ensel anama nali'i nafi'i na'i anom basef na'i, “Wambel lu'unai Babilon anama aona ea'! Anan awagon ea'! Epes sape wambel anama sanda' esis amam nematawa hiesi ma saila waf anama sanda' so'a waolanai. Waf asasinai aona si'i wain la'ifinai nanda' epes ukup mase'as. Wambel anama Babilon nase'as embel wainim amama epes hiesi wambel hiagoma sagwa'ami.”

⁹ Ea' anona ensel nagi'ma amam biam nafi'i. Ensel anama nafe'ma wanomi noga na'i mehip na'ama na'i, “Emi egafis sonda' lotu ma mafin anama nape aolupi ma ambal ananinai sandombanai ma nefa' ikwaf anama amaga lagof asasimi,

¹⁰ esis nambimb sope si'i sogwa' anona wain. Wain anama basef womun etina okom wandafunai Godi. God ina nati uwahipis, owa'. Anan okom wandafunai lu'una endilisi. Anan anona nemaf nese'as okom wandafunai epes isima ma nogwa waf aonai esis sanda'anai. Ama epes isima sofa' nimanimi lu'wami ma nif fandumi mahihi'asi ma otamba agel salfa nifimi ma naep amam ensel bu'wami Godi moloma naep sipsip noganai.

¹¹ Nogoh mataga nif amama mase'asa nimanimi epes isima sanda' lotuma mafin anama aolupunai naloma ambal anama ananinai. Epes isima ina anona nemaf sopoma noma'w owamb alip, owa'. Nogoh amama molomolata ilif la'ela'ef mopani.”

¹² Nemaf anama nimanimi amama motaga, enis amam nematawa Godi situ la'ifis. Esis amam nematawa isima saila mi'uli Godi ma sombale'efa Jisas la'ifis andeande'.

¹³ Ea' ame' anona malogel na'i nafi'i heven na'i, “Ine' da'a anom basef na'ama. Esis amam nematawa sombale'efa Dembinai saga'i, dei' nimeguf hiami anona nemaf owagama wapoti' sondanifel!” Ambal Bu'unai Godi wapoti' na'i, “Esis anona nemaf sokwaha opeh lu'wami amama esis sanda'ami sopoma noma'w. Esis ina sope etin, owa'. God nambimb niti waf bu'unai esis sanda'anai ea' nogwamasa anom amamaga bu'wami esis. Waf bu'unai esis sanda'anai anona nemaf nondawalap alihina.”

Okom wandafunai Godi si'i waf sala' gwa'aimianai etap anae'

¹⁴ Atologon wapoti', ati otaga atotona afitinai nape ea' anona epen ambal napainai nape otaga anama. Enin si'i anona dembinai nataga epen endilisinai. Anan nowalo' hat bu'unai nafifili si'i gol balaga ananinai nahapila anona nogwatop hi'alina endilisi lagel ananinai.

¹⁵ Ea' anona ensel nape ipat lu'unai Godi nomon nawisi ande' nofala aman anama natoma otagai mehip na'i, “Ine' topa' gwa'aimi amama maufi ma nogwatop anama ine'inai! Dei' main, gwa'aimi hiami etapami maof ea'. Amama atom dei' nogota anae' pela' gwa'aimianai.”

¹⁶ Ea' aman anama nape otagai nahapila nogwatop ananinai nakwahona etap, natopa' gwa'aimi maufi etap anae'.

¹⁷ Ea' anona ensel wapoti' nawisi ande' ma ipat anama lu'unai Godi nape heven. Anan wapoti' nahapila nogwatop hi'alinai endilisi.

¹⁸ Ea' anona ensel wapoti' nakwaha balata anama sondolalima Goda nafi'i. Ensel anama la'ifinai ma numafi nifi. Nofala ensel anama nahapila nogwatopi nofalona mehip na'ama na'i, “Ine' fa'ai nogwatop anama ine'inai hi'alina endilisi, netopa' su'utip gwa'aimi maufi mail mandelef waini etap nekolasom mo'oh! Dei' main, gwa'aimi amama hiami maof ea'!”

¹⁹ Ea' ensel anama nahapila nogwatop ananinai nakwahona etap, natopa' gwa'aimi su'utip akumi mail mandelef waini natamam motawa. Ea' nafela gwa'aimi amama nakwahom mowala otam tang lu'unai nomona safo'asom wain embel. Amama mondola'wifa okom wandafunai Godi ma epes isima sosambala basef Ananimi.

²⁰ Ea' safo'asom waina otam tang anama lu'unai nape ande'ma taun anama wambel lu'unai. Esimbel maluwi tang ande' kolo' etin mafe' laogon si'i 300 kilomita si'i walemb embel mafi'i matef mataga ilif motambel ain nape malogof hosi.