Revelesen 13 - Basef Buꞌwami Godi

Mafis biam aolupumi mataga

¹ Ea' ati anona mafin nape aolupi nataga naoh embel. Wambawa mataganai 10-peleim ea' balagah 7-peleim mapaina. Wambawa amama mowalo' hagw dembemi atom mowalo'ami matoma wambawa mandandam. Balagah ananimi sanda' anom agof mail mandandama balagah amama. Agof amama ofagema na'ama. Basef mamumami awami findiwaimi ma God.

² Mafin anama dei' atolona, anan si'i anom mafis lu'wami wandafumi wanom. Anona mafin agel lepat ea' bo'walelef ananimi si'i bo'walelef anona mafin bea, malogel ananinai si'i malogel anona mafin laion. Ea' kwambon anama nanda' mafin aolupunai nataga la'ifina ma pepel lu'unai ananinai. Anan nanda' mafin anama nataga dembinai ma numafi epes hiesi fowa' anan numafiasi.

³ Mafin anama balagah 7-peleim anona melet natomana si'i sahana afuna. Ea' balaga anama nambo'wana dei' wafi'igin, ambo'ona wapoti'. Ea' epes hiesi sape etapi sohafel gegelalasis kwapete'asa mafin anama aolupunai owa' afunae, sailona.

⁴ Kwambon anama nase'ana pepel ananinai mafin anama aolupunai. Ea' esis hiesi sanda' lotuma kwambon anama naloma mafin anama aolupunai wapoti' safela agel ananinai sa'i, “Emi nandati na'ama etin si'i mafin aolupunai anama? Owa'etin. Emi la'ifina nepa' nelomana? Owa'etin.”

⁵ Ea' dei' God nape nati mafin anama na'i mehip na'i basef awami findiwama God. Anan la'ifina nape dembinai ma nanda' waf anama nape nogota laona aomb amama 42-peleim, afagof wanom tu'waninai.

⁶ Malogel ananinai noga na'i basef awami nanda' findiwama God. Anan nanda' agel Godi findiwana wambel Godi naloma wambota anama ananisi sape heveni.

⁷ Ea' God ata' nape nati anan ata' nape la'ifina nefela wandaf nopa' noloma esis amam nematawa Godi ea' naitu nanda' wandaf nahagofas. Anan nofa' pepel ma kwambon anama ea' la'ifina ma nope dembinai la'ifinai ma esis epes hiesi sa'i diga anama hianai ma etap anama wambel hiagoma, alop naninani.

⁸ Anona buk ambal namunai napainai na'oh. Esis sanda' agof epes Godi etis mape buk anama ma nogota anama fowa' gani God nanda' etap anae'. Buk anama sipsip anama noganai fowa' esis sahana naga'. Amam nematawa hiesi etapasi agof asasimi owa' mope buk anama, epes isima hiesi sanda' lotuma mafin anama.

⁹ Ipe' epes aligah magalipei, ipe' peme' basef amama na'ama.

¹⁰ I'i esis si'i sonda' enin epen nefe' nenda' kalabus, enin nefe' nenda' kalabus. I'i esis si'i soha enin epen noga'ma bainat, enin noga' ma bainat. Endilisi waf anama nimaninai atona anona nemaf notaga. Ipe' amam nematawa Godi pepe la'ifipa pembale'efa God la'ifipa andeande'.

¹¹ Ea' ati anona mafin aolupunai wapoti' nohafel nawisi etap owin nalatawi ilif. Wambawa biam matagana si'i wambawa mataga sipsip nogami, ea' basefa diga ananinai si'i malogel diga anona kwambon lu'unai.

¹² Mafin anama naitu aolupi na'i nafe'ma bifi nefa' pepel ma mafin anama nali'i ma numafi epes hiesi. Ea' nanda' opeh la'ifimi ma naep mafin anama nali'i. Anan nanda' opeh la'ifimi endilisi ma nonda' esis amam nematawa sape etapi sonda' lotuma mafin anama nali'i, fowa' sahana sa'i nombo'ma noga' dei' wafi'ina ea'.

¹³ Mafin anama nagi'i, anan nanda' pepel lu'unai naninani. Pepel anama lu'unai na'ama. Naep esis amam nematawai, nanda' nif makwaha heven misila'i etap anae'.

¹⁴ God ata' nape nati anan nanda' pepel anama naninani ma naep mafin anama nali'i. Ea' anan nagi'i nanda' waf anama ma nahambombaga esis amam nematawa etapasi. Na'ipas mehip na'ama na'i, “Ipe' pendomba ambala mafin anama nali'i nil anona lawag maina ma pefela agel ananinai lu'una. Mafin anama nali'i ma'una anama fowa' bainat nahana ata' nape namunai la'ela'ef.”

¹⁵ God nape nati mafin anama nagi'i na'i aho'ma anan nase'ana ambal ambagof mapaimi ma ambal anama mafin aolupunai sanda' lawag sanda'anai. Ea' ambal anama noga na'i basef ea' la'ifina ma noha epes sandaiwa'ma sonda' lotuma anani soga'.

¹⁶ Ea' mafin anama nagi'i la'ifina nasasapa' epes isima hiesi sonda' anona ikwaf nepe atona etin esis lagof da'isimi o amagah asasimi. Ikwaf epes isima agufisi soloma epes agof a'asi soloma isima otamba hiamisi soloma isima wafisi. Ea' enis agof a'asi sanda' maola enis epes soloma enis agufisi wapoti'.

¹⁷ Ea' epes hiesi sofa' ikwaf anama ma agel mafin anama nape aolupi. Ea' enis sofa' anona namba ma mafin anama agilinama. I'i emi egafis owa' sefa' ikwaf anama, esis ina nambimb sotala amamaga epesi, ea' esis wapoti' ina nambimb sotala amamaga asasimi, owa'.

¹⁸ Ape' ukup mope la'ifim andeande'ma amama. Emi egafis segawa, esis seamba namba mafin anama aolupunai andeande'. Namba anama basef womun etina anona aman. Namba anama 666.