Revelesen 12 - Basef Buꞌwami Godi

Nemata'w kwaloma kwambon lu'unai

¹ Ea' anona ikwaf lu'unai nataga heven nape na'ama. Ano'w nemata'w kwape kowaho' aon alipunai alop akwa'unai si'i lowaf. Ea' aon owambunai nape owina bo'wagah akwa'umi. Ea' anona hat awau agufuwai atowa owalo'omi natoma balaga akwa'unai. Ondowa 12-peleiwa wailana.

² Ea' akwa'w opafu'w kwame' nimanimi amama matagama'wa kola awani. Ea' kwawal kwalef kwa'oh mehip.

³ Ea' anona ikwaf nataga heven nape na'ama. Anona kwambon lu'unai nape. Anan akwahinai balagah 7-peleim mandandana, wambawa mataganai 10-peleim. Ea' hagw 7-peleim dembemi atom mowalo'ami matoma balagah ananimi.

⁴ Andep kwambuni nambefa wa'am sawaloga ondowa mape ilifi sawalogom mataga wenifim nambefam mowai etap. Ea' dei' biefim mape ilif la'ela'ef. Ea' kwambon anama nafi'i naitu naep nemata'w kwa'i kola awani, naitu nohafa akwa'wa ata' kolani, mehip nogwa'an.

⁵ Ea' nemata'w akwama kola awani aman. Awani inima anona nemaf owagama la'ifina numafi esis amam nematawa hiesi sape kantri hiagoma. Anan la'ifina nohapila bandan sanda' ain sanda'anai nope dembinai numafias. Akwa'w kolan, mehip esis sofa'an safe'ma balata king Godi nape andeande'.

⁶ Ea' kwasagih kwafe' anagon wafiguma fatauguma. Anama God nandondombagona akwa'w. Ama nambimb enis epes sumafia'w sose'akw gwa'aimi akwa'w dahama dahama nimeguf 1,260-peleim, afagof wanom tu'waninai.

⁷ Dei' wandaf lu'unai nataga heven. Ensel dembinai Maikel naloma amam ensel ananimi mapa' maloma kwambon anama lu'unai. Ea' kwambon anama nao'wa amam ensel awami ananimi magwamama wandaf amam mapa' malomam wapoti'.

⁸ Ea' kwambon naloma ensel ananimi amam ina la'ifima muli'amona wandaf, owa'. Dei' amam ina ata' mapani gani heven wapoti', owa'.

⁹ Ea' amam ensel Godi makwahai kwambon anama nisila'i. Kwambon anama fowa' ganinai dei' esis sa'i aman aonai Satan. Anan aman nambaso'ma esis amam nematawa hiesi etapasi. Amam makwahai anan nafi'i etap, makwahai ensel awami ananimi wapoti' misila'i malumanai.

¹⁰ Ea' ame' anona maf na'i mehip nataga heven na'i na'ama na'i, “Dei' God ape'inai nefa'apa mutanimani pepel ananinai nataga nandawalap alihiguma ma nope Dembinai king! Krais, God nandandepana nasapa'ana nafi'i Anan la'ifinai nefa' agel lu'unai ea'. Dei' main, aman anama nambaso'ma alupusi sahin owan ape'isi owamb alip na'ipa God ape'inai na'i esis sanda' waf aonai. Ea' dei' amam ensel Godi makwahona nisila'i ea'.

¹¹ Esis alupusi sahin owan ape'isi sofa' pepel ma esimbel sipsip noganai sawalipasa basef ananimi endilisimi. Esis sanda' waf anama. Amama atom dei' silai'ipa wandaf sali'amona naumbih ma amama. Esis ina ukup ma'ima'i endilisi ma sope andeande' etap anae', owa'. Esis ina umbamahasa naumbih sohas soga', owa'.

¹² Ipe' hipei pape heveni, ipe' pendanifel! Ipe' pape etapi paloma sape naoh embeli, uwahipipa! Dei' main, nimanimi lu'wami ma'i motagamepa. Satan nisila'o ma ipe', anan okom wandafuna endilisi. Dei' main, anan nogawa nogota bandana ma nope nonda' opeh ananimi, felefele' higililana.”

¹³ Amam ensel makwahai kwambon anama lu'unai nisila'i etap dei' nagawa anan nafi'i nape etap nati nemata'w akwama kola awani aman natofa'w.

¹⁴ Ea' sase'akw behenagof biam lu'wami komonimi akwa'w la'ifikwa kufia' kofe' wambel akwa'unai etap wafiguma fatauguma. Ama ata' kope laogona kwambon anama lu'unai ma esis sumafia'wa gwa'aimi solaga'w kofe' kofe' kotambel afagof wanom tu'waninai.

¹⁵ Ea' kwambon anama lu'unai nagu'wai embel malogel ananinai. Embel amama mataga si'i anona walemb lu'unai kolo' etin mafe' magi'ma akwa'w. Kwambon anama na'i embel amama mondahago akwa'w kofe' hegilila'w.

¹⁶ Ea' owa'. Etap nagiambama'w na'ama. Malogel etapi nagal alihina na' embel amama kwambon nagu'ami malogel ananinai hi'alam.

¹⁷ Ea' anan okom numbutina endilisi ma akwa'w nafe' na'i nonda' wandaf noloma enis batawisa'w akwa'usi, esis amam nematawa isima saila mi'uli hianai Godi sawalapa basef Jisasi sailam.

¹⁸ Ea' kwambon anama nafi'i naitu naoh akata.