Revelesen 11 - Basef Buꞌwami Godi

Amam biam mawalapa basefi

¹ Ea' esis sase'e ikwaf ae' ma indila'wifa amamaga dende'am etin sa'ipi sa'i, “Ine' hafel nembe' ikwafa ipat lu'unai Godi noloma balata anama sondolalima Goda. Ea' neamba esis amam nematawa sanda' lotu ma Anani sataga ma'wis.

² Ea' ina nenda' endalelemb amama mape ande'ma ipat anama, owa', hapaimi. Dei' main, endalelemb amama esis amam nematawa sololama Godi sofa'am. Ama esis anona nemaf sotaga sohambombaga wambel lu'wagoma Godi bu'unai sope sefe' sondahama aomb 42-peleim, afagof si'imi wanom tu'waninai.

³ Ea' nambimb Ae' God esapa'o amam amama biam ae'ami enda'am la'ifim mowalapa basef Ae'ami. Ea' amam nambimb mowaho' begah wa'ami si'i luwaguf awami ea' mi'ipasa basef Ae'ami mofe' mondahama nimeguf 1,260-peleim, afagof wanom tu'waninai.”

⁴ Amam biam si'i lawah oliv biam maloma lamifah biam la'ela'ef motawa naep Dembinai ma etap hiagomai.

⁵ I'i enis epes si'i sonda' amam biam aom, atuwasi nif motaga malogof amamumi fendo esis naumbih amamisi endilisi. Endilisi, emi egafin ni'i neham, waf anama atona enin nega'.

⁶ Amam biam la'fima mosopama otaga ma asaf owa'etina nimeguf hiami mawalapa basef Godi. Amam agel lu'unai ma momboma embel hiami motaga akwahim si'i esimbel ea' mofa' pepel lu'unai ma moha esis amam nematawa etapasi ma amamaga awami mamumami. Maina nemaf amam mi'i monda'am na'ama, amam la'ifima monda'am.

⁷ Amam mowalapa basef Godi hi'ilam, anona mafin lu'unai aonai nokwaha hul anama nagal nowala etini nolatawi ilif. Ea' okom numbutina nopa' nolomam. Ea' noham nofofo'asom ea' afum.

⁸ Ea' alop amamunai no'oh eaf lu'unai taun anama lu'wagoma, ape' ma'iagon basef womun etin ma'i agel Sodom naloma Isip. Anama taun anama etin fowa' esis saha Dembinai amamunai naga' lawag usi'inai tu'wanainai.

⁹ Enis epes alop hianai naninani sape wambel etap hiagomai saloma esis diga hianai naninani, epes hiesi siti alop amam biami la'ela'ef sondahama nimeguf wanom si'ina tu'waninai. Ea' esis ina si'i aho'ma enis epes sowam hi'agilif, owa'.

¹⁰ Ea' esis amam nematawa etapasi sondanifel ma amam maga' ea' sonda' gwa'aimi sea'am sealemb ea' sandaso'ama amamaga bu'wami maloma alupisi asasisi. Dei' main, profet amama biam mase'asa nimanimi lu'wami amam nematawa hiesi sape etapi.

¹¹ Nimeguf si'imi wanom tu'waninai hi'ilam, God nosapa'i ambip Ananimi mofe' muwis nomona amam biam ea' ambal nopaim mohafel mitu. Ea' epes sotolom umbamahas endilisi.

¹² Ea' mome' anona malogel ni'i notagai heven nofalam mehip na'ama ni'i, “Ipe' bipa letowi na'ae ilif!” Ea' mofe' heven muwis elagw nomon esis naumbih situ sotolom mofe'.

¹³ Nogota anama atona, sowambon lu'unai nokoto' taun anama lu'wagoma tu'wanigin pe'ogon ea' 9-peleigin ata' nope bo'wagon. Ea' esis amam nematawa 7,000-peleis soga' ma sowambon anama. Ea' esis enis amam nematawa seapani esis umbamahas endilisi, sefela agel God nape heveni.

¹⁴ Amamaga nimanimi lu'wami mafe'ma bifi amama mafe' hi'alam, ea' peme'! Nogota bandana ma nimanimi lu'wami mafe'ma wanomi motaga.

Ensel anama nafe'ma 7i nufapula biugel ananinai

¹⁵ Ensel anama nafe'ma 7i nufapula biugel ananinai, anom malogof moga ma'i mehip matagai heven na'ama ma'i, “Dembinai ape'inai naloma Krais Amam biam dei' mefa' pepel mataga king dembemi etap anae' hiagoma mumafiagon. Ea' Anan nope king Dembinai la'ela'ef hihif!”

¹⁶ Ea' amam amama agufumi 24-peleim natoma balata lu'unai amamunai ma naep Godi mape etap mindiwa balagah amamumi mati etap manda' lotu mandanifel ma God

¹⁷ ma'i, “Dembinai, ine' God pepel hianainai. Fowa' gani endilisi ine' napani, dei' ine' nape. Ine' dei' nefa' pepel hianai ine'inai nape king Dembinai numafi epes saloma amamaga hiami. Ea' afa' wanifelina.

¹⁸ Esis sololama Godi opalef aom ukup numbutim, ea' dei' okom ine'inai wandafuna nataga ea'. Dei' nemaf ine' newaloga esis saga'i ma sotagama kot. Dei' nemaf ine' nose'asa amamaga bu'wami ma amam profet manda' opeh ine'imi. Dei' ine' nose'asa amamaga bu'wami esis amam nematawa ine'isi saloma isima hiesi sanda' lotuminai sape owina ine', esis agufisi saloma isima agof a'asi wapoti'. Dei' nemaf ine' neha epes isima saha epes sape etapi!”

¹⁹ Amam ma'iam ea' ipat lu'unai Godi nape heven nandawisi' ea' bokis bu'wami amama mi'uli Godi napaimi amama mataga ma'oh alihiguma nomon ipat Ananinai. Ea' otaga holala pelepele', dilili bugwalagw nafe', etap nalemb etin asaf lu'unai ondowa lu'wamunai si'i otamba mambip mowai.