Revelesen 10 - Basef Buꞌwami Godi

Anona ensel nase'ana buk Jon nagwa'ana

¹ Amama hi'alam, ati anona ensel la'ifinai nisila'i heven. Anan nandambaho' elagw ea' elelina naloma balaga ananinai. Amaga ananinai nafifil howalagon endilisi si'i aon alipunai nalatawi ea' bo'wagah ananimi si'i nif fandom malata ilif.

² Anan nahapila anona buk so'unai lagof ananimi, nandauf na'oh. Anan nawamona bo'waga ananinai da'isinai natoma naoh ea' aonai nahaponana etap wata'ita.

³ Ea' nogal na'i mehip endilisi si'i mafin lu'unai laion nanda'am. Nanda'am na'ama ma ea', otaga dilili bugwalag 7-peleif. Ma'i si'i anona malogel na'i.

⁴ Otaga dilili bugwalagw 7-peleif ma'i basef ea', a'i enda' anom basefa amama, ea' ame' anona malogel na'i nataga heven na'i, “Basef amama otaga dilili bugwalagw 7-peleif, amama ine' nembaho'wam mope okom ine'inai atona. Ina nenda'am mil buk, owa'.”

⁵ Ea' ensel anama ali' atolona naitu naoh maloma etap wata'itai anan nasa'ma lagel da'isinai nalata.

⁶ Ea' na'iam endilisi gani ilifa agel Godi nape namunai la'ela'ef hihif. Anan nanda' ilif naloma etap naloma amamaga hiami ambagof mapaimi maloma amama ambagof a'ami mape ilif etapi maloma naoh embel lu'wami maloma amamaga amama hiami mape naoh owin wapoti'. Ea' ensel anama na'i, “Nogota mape mohafanai dei' hi'alana.

⁷ Nemaf anama ensel anama nafe'ma 7i ni'i nufapula biugel ananinai, amamaga amama God nambahe'ami motaga alihim. God felefele' nonda'am endilisi si'i basef fowa' nase'amam amam profet manda' opeh ananimi.”

⁸ Ea' malogel fowa' ame'ana heveni na'ipi wapoti' na'ama na'i, “Ine' fo'o fa'ai buk anama nandauf nape lagel ensel naitu naoh maloma etapi.”

⁹ Ea' afe'ma ensel anama a'ipana a'i, “Ine' se'e buk anama so'unai.” Ea' na'ipi na'i, “Ine' fa'ana nea'ana. Anan atuwasi usihina si'i aupimbel malogel ine'inai, ea' opaf ine'inai numbutina.”

¹⁰ Anan na'iam ea', afela buk anama so'unai lagel enseli agwa'ana. Ea' malogel ae'anai usihina si'i aupimbel hani. Agwa'ana ame' numbutina opaf ae'anai.

¹¹ Ea' ame' anom basef sa'ipi sa'i, “Ine' newalapa basef Godi wapoti' ma amamaga nambimb motagama epes amam nematawa alop naninani hianai ma diga anama hianai naninani ma amam king dembemi hiami wapoti'.”