Revelesen 1 - Basef Buꞌwami Godi

¹ Fowa' gani basef amama mape mandambaho' ea' dei' Jisas Krais nanda'am mandawalap alihim. God nase'anam Jisasa nowalapam nihi'ambapa anom manda'mana opeh Godi ma mowalapa amamaga mape mandambahi'i motaga ulal. Anan nase'e gawa afa' wanda' opeha Anan ma amamaga amama. Ea' dei' nasapa' ensel ananinai nafi'mai ae' Jon. Ae' dei' anda'mana maol Godi, ea' Anan nase'e basef amama ae' wapoti'.

² Ae' atolom ea' amamaga amama awalapam a'iam alihim basef Godi maloma basef amama endilisimi Jisas Krais nanda'ami mandawalap alihim.

³ Emi egafis setalifa basef amama Godi mail buk anama ma malogof asasimi ma amamaga anona nemaf migi' meatagai, esis God nonda'as sondanifel. Ea' emi egafis some' basef amama ma ukup asasimi, esis sondanifel wapoti'. Dei' main, nemafa amamaga amama migi' meatagai felefele'ma motaga.

^4-6 Ae' Jon anda' basef amama ma ipe' Kristen pape wambel 7-peleimi etap hiagoma Esia. God fowa' gani nape, dei' nape, anona nemaf owagama nope la'ela'ef hihif. Anan naloma Jisas Krais maloma ambagof bu'wami 7-peleim mape felefele'ma balata bu'unai Godi. Ae' a'i amam migiambamepa na'a monda'epa petaga la'ifipa mose'epa opalef awanem. Jisas Krais Anan naila basef ananimi nanda' maol ananinai andeande'. Ea' nawalapa basef hiami Godi andeande'. God nali' nafelona nohafel hi'agif. Ea' nape nali'ma anona nemaf esis saga'i God nofelas sohafel wapoti'. Jisas Krais Anan atona dembinai numafi amam king Dembemi mape etap. Anan atona okom lu'unai nainaila ape' hiapai, ma esimbel ananimi atom natagahepa ma waf aonai ape' manda'anai mataga wafifipa. Anan atona nanda'apa dei' mape dembipai malomana mumafi epes hiesi si'i amam king. Ea' nanda'apa mape pris si'i mondolalima God manda' opeha God Ahalomana ananinai. Ae' a'i nafifili noloma pepel hianai Ananinai atona nope la'ela'ef hihif. Endilisi.

⁷ Piti, Anan la'ifinai anona nemaf nifi'i noloma otaga esis hiesi sotolona naep asasimi ea' epes isima fowa' sahana wamba'wi sotolona wapoti'. Amama atom esis amam nematawa hiesi sape etapi sotolona sogawa solopana kwapete'as ma waf aonai esis sanda'anai. Amama anona nemaf motaga na'ama. Endilisi.

⁸ Dembinai God pepel hiamunai Anan na'iam na'ama na'i, “Ae' atowe ape Dembiwei la'ela'ef hihif ape ali'i, ape agi'i endilisi.” Ea' Ae' atowe fowa' gani ape, dei' ape, anona nemaf owagama etanima ifi'i.

Jon nati Krais, God nandandepana nasapa'ana nafi'i

⁹ Ae' Jon sahalomepa ipe'iwei. Ae' alomepa, ape' hiapai Jisasi atepa mape la'ifipa malomana. Ae' alomepa mandao'oma mofa' nimanimi ma muwis wambota Godi numafiapa. Ape' mape la'ifipa maloma Jisas ea' ape alomepa mandao'oma ape' hiapai mape so'umbel mape maitu la'ifipa na'ama etina mofa' nimanimi. Ae' awalapa basef Godi maloma basef endilisimi ma opeh Jisas nanda'ami. Amama atom dei' esis sandaiwa'me sagalo'me afi'i ape ailan agiliguma sa'i Patmos.

¹⁰ Anona nemaf Dembinai Sande Ambal Bu'unai Godi numafi ae' ame' anona maf na'i mehip nandame' si'i safapula alof, na'i nataga alafuga ae'anai.

¹¹ Ea' na'ipi na'i, “Ine' da'a basefa amamaga amama nambimb neatulumi mil buk. Ea' nenda' basef amama mil buk anama mefe' amam nematawa Godi sios 7-peleim sape wambel anama 7-peleina atona etin. Wambel anama agofuguma amama. Efesus, Smerna, Pergamum, Taiataira, Sardis, Filadelfia, Laodisia.”

¹² Ea' ae' andamboma a'i iti anama na'ipa ae'i. Ea' ati lamifah 7-peleim matoma gol 7-peleim.

¹³ La'afena gol amama ati anona aman nalomam naitu. Anan nandati si'i anona dembinai nataga epen endilisinai. Nala luwaguf laumi mowala mambaho'wa bo'wagah ananimi ea' nowaho' let sanda' gol sanda'anai mafata ananinai.

¹⁴ Balaga naloma auf malonai afitim endilisi si'i auf malo sipsipi o si'i elagw amama afitimi. Naep ananimi fandom si'i nif ilelowa.

¹⁵ Ea' bo'wagah ananimi manda' gambigambis endilisi mandati si'i bras kapa batafunai saofam nif lu'wami. Ea' ame' malogel ananinai nanda'am si'i embel mawis mehip kululu' etin.

¹⁶ Anan nahapila ondowa 7-peleim nahapilam lagel da'isinai ananinai. Ea' anona bainat hi'alina wa'owa'ili nawisi nape malogel ananinai. Amaga ananinai nafifil endilisi si'i owaf naluwi la'ifina.

¹⁷ Ae' atolona ea' ewa a'oh felefele'ma bo'wagah ananimi andati si'i aga'i. Ea' anan nasa lagel da'isinai ananinai ma ae' na'ipi na'i, “Ine' umbamehena owa'. Ae' ape dembiwei la'ela'ef ape ali'i ape agi'i endilisi.

¹⁸ Fowa' aga', ea' dei' ape namowe la'ela'ef hihif. Ae' ape Dembiwei ali' ape agi' ma amamaga hiami maloma epes. Ea' ahapila ki ma wambel saga'i sapoma.

¹⁹ Ea' ae' a'i ine' nenda' basefa amamaga amama dei' ine' natulumi, nenda' basefa amamaga amama dei' mapani maloma amamaga anona nemaf migi' meatagai wapoti' nenda'am mil buk.

²⁰ Ine' nati ondowa awama 7-peleim wape lagel da'isinai ae'anai waloma lamifah amama 7-peleim matoma gol amama 7-peleim. Amama mondola'wifi atom. Basef ofagema amama. Ondowa mondola'wifa ensel mumafi sios amam nematawa hiesi Godi 7-peleim, ea' gol amama mondola'wifa sios amam nematawa Godi amama 7-peleim.