Mak Nandaꞌafi 9 - Basef Buꞌwami Godi

¹ Ea' Jisas na'ipa esis na'i, “Ae' a'ipipa endilisi, enipa paitu na'ae nambimb ina pega' ulal, ata' owa'. Enipa piti pepel Godi nifi'i ma epes hiesi siowis wambota Ananinai numafias.”

Alop Jisasi nataga nandati na'ana, nafifil endilisi

² Nimeguf wanom wanom mafe'ma ea', Jisas nao'wa Pita naloma Jems naloma Jon nao'wam mondowasa' anona halaf launai. Nao'wa amam atom mape, ea' mati alop Ananinai nandati na'ana nafifil endilisi.

³ Luwaguf maim ananimi mataga afitim endilisi. Ina anona aman etapanai la'ifina nanda' luwaguf maim mataga efitim na'ama, owa'.

⁴ Ea' mati amam biam fowa'imi, Elaija naloma Moses mataga maitu ma'i maloma Jisas.

^5-6 Pita naloma Jemsi Jon umbamaham endilisi, ea' Pita na'i nie'iami anom basef, ea' anan ina ata' okom napoma basef na'i ni'iami, owa'. Ea' na'iam na'ama na'i, “Dembinai Tisa, afa' wape na'ae andeande'. Ata' ola' anom aolah wanom, mondandafa. Ine' anona, Moses anona, Elaija anona.”

⁷ Ea' anom elagw maofeniam. Ea' anona malogel na'i natagai elagw amama na'i basef na'i, “Anan Nogalome ae'anai, Ae' okom nohafel nainailana endilisi. Ipe' peme' basef ananimi.”

⁸ Dei' atef alupumi Jisasi wanom matologon mehip ganigani, ina mati enin epen, owa'. Mati Jisas atona naitu nalomam.

⁹ Ea' amam ata' makwaha halaf makini'i etin, Jisas na'ipam mehip na'i, “Ipe' ina pewalapa amamaga amama dei' patulumi pi'ipa enin epen, owa'. Pefe' dahama dahama nemaf anama ae' ataga epen endilisiwei, ma sehe ega' etanima ehafel hi'agif wapoti', pi'ipas.”

¹⁰ Ea' amam mahapila basef amama mape, manda'ipama ma'i, “Basef amama Jisasi notanima nohafel hi'agif, ofagema ma'imama?”

¹¹ Ea' mahali'ana Jisas ma'i, “Dei' maina amam mawalipasa mi'uli Godi ma'i Elaija fowa'inai ata' nili' nifi'i?”

¹² Ea' Jisas nagwamama basef na'i, “Endilisi. Elaija nifi'i nondondomba amamaga hiami motaga bo'om andeande'. Ea' basef mail buk Baibeli ma'i dembinai anona nemaf notaga epen endilisinai nope ni'imama? Amama ma'i anan neme' nimanimi awami ma esis sowa' alafugahana.

¹³ Dei' a'ipipa, anona Elaija nafi'i ea'. Ea' esis saila ukup asasimi atom, sanda'mana waf aonai endilisi si'i anom basef mape buk Baibeli ma'iam.”

Jisas nanda' anona sa'unai ambal aonai napeinai ambo'ona

¹⁴ Jisas naloma alupumi wanom mafi'i mati anom alupumi tu'wanim 9-peleim mapani, ea' mati amam nematawa hiesi saitu felefele'ma amam. Ea' mati anom mawalipasa mi'uli Godi ma'i basef mandahihianamam maloma alupumi Jisasi 9-peleim.

¹⁵ Amam nematawa isima hiesi sati Jisas nafi'i, sohafel gegelalasis kwapete'as, sasagih safe'ma Anan sanifelona.

¹⁶ Ea' Jisas nahali' amam alupumi ananimi na'i, “Ipe' palomam pa'i main pandahihianamam?”

¹⁷ Ea' anona aman nape la'afena amam nematawai nagwamana basef Jisas na'i, “Dembinai tisa, so'uso'win aman ae'anai anona ambal aonai napein, malogel nase'an. Na'ama efa'an afi'mai ine'.

¹⁸ Nimeguf hiami ambal anama aonai nahapilan tatala'in nakwahin newa etap. Ea' apah nataga malogel, nalelef ananimi dindigim dogw, ea' alop ananinai dindigina endilisi. Ae' a'ipa alupumi ine'imi a'i motofa ambal anama aonai nefe', ea' amam ina la'ifim.”

¹⁹ Ea' Jisas nagwamama basef na'ama na'i, “Ipe' amam nematawa owa' pembale'efa ae'. Nimeguf ma'um ae' ata' epe elomepa? Nimeguf ma'um wapoti' ma efa' nimanimi ipe'imi? Ipe' fa'an pifi'mai ae'.”

²⁰ Ea' esis sao'wamana awani inima anan. Ambal anama aonai nati Jisas, mehip nakoto'an kwapete'an nafe' newa etap na'oh, apah afitimi mataga sisih malogel ananinai.

²¹ Ea' Jisas nahali' ahalomana na'i, “Nogalomena ine'inai, awes anama nanda'an nape nimeguf ma'um?” Ea' anan na'ipana na'i, “Fowa' ata' awani nape la'ela'ef na'ama etin.

²² Nimeguf hiami ambal aonai nakwahin newala nasef nif fandumi, o newala embel na'i nohan afin. I'i ina la'ifinai, niti ape' owahipipa nigiambamapa.”

²³ Ea' Jisas na'ipana na'i, “Dei' maina ine' nahali'i na'ama? Emi epen nembale'efa Ae' endilisi, enin la'ifina nenda' opeh bu'wami mamumami hiami.”

²⁴ Ea' ahalomana ma nogalomana anama na'ipa Jisas na'i, “Ae' embale'efa ine' kwaukwawie'. Dei' nigiambame ma eambale'efena la'ifiwi endilisi.”

²⁵ Ea' Jisas nati amam nematawa hiesi safi'i saitu salipana felefele', na'ipa ambal anama aonai mehip na'i, “Ine' ambal aonai nasopama aligahi malogel awani inima, ine' nekwaha so'uso'win inima nefe'. Netanima niefi'mani owa'.”

²⁶ Ea' ambal anama aonai nakoto'an mehip nakwahin nandahi' nafe'. Ea' awani inima nandati si'i naga'i ea' hiesi satilin sa'iam na'ama sa'i, “Enin naga' ea'.”

²⁷ Ea' Jisas nahapila lagel ananinai nafelan ea' bo'wen naitu.

²⁸ Alupumi Jisasi atom malomana mawis anona ipat mape, mahali'ana na'ama ma'i, “Dei' maina afa' owa' la'ififama weatofa ambal anama aonai?”

²⁹ Ea' Jisas na'ipam na'i, “Ipe' penda' beten pembale'efa God atona, ipe' la'ifipama peatofa ambal anama aonai. Owa' anona eaf petofana. Beten atona.”

Jisas na'ipas bifa sohana noga' ma nambimb notanima nehafel wapoti'

^30-31 Ea' Jisas nao'wa alupumi ananimi makwaha anama mapoma mafe' mataga etap hiagoma Galili mawis mafe' anagon mape. Dei' main, Jisas na'i nope nondambaho' nolomama neawalipama basef ananimi. Na'ama nandaiwa'ma anona aman nogawa anama amam mafe' mapoma. Anan nawalipama basef na'ama na'i, “Ae' ataga epen endilisiwei, nambimb felefele' anona aman nose'asa ae' efe'ma lagof naumbih ae'ami mohe ega'. Ama nimeguf biam hi'ilam meafe'ma wanomi, etanima ehafel efa' ambal namunai wapoti'.”

³² Ea' alupumi ananimi mame' basef amama, ea' amam ina mogawa ofagema, owa'. Ea' amam umbamahama meahali'ana ma basef amama ofagema.

Emi epes sope dambesi?

^33-34 Ea' Jisas naloma alupumi ananimi mafe' mataga Kaperneam, mafe' mawis ipat nomon, Jisas nahali'am na'i, “Ipe' pa'i maim basef do'ok wafi'i eaf?” Do'ok mafi'i eaf, amam ma'i basef hiami ma'i nambimb emi nepe nili' dembinai ma amam. Na'ama amam ina magwamana anom basef, owa'. Tol mape etin.

³⁵ Ea' Jisas nape etap nofala amam mafi'i mape felefele' na'ipam na'i, “Emi epen ni'i netaga dembinai nepe nili', enin ata' nili' netaga si'i nanda' maola anasi, netaga nagi' endilisi ma naep epesi.”

³⁶ Ea' Jisas nafilai enin so'uso'win nahaponan naitu la'afena amam nahapilan na'ipam na'i,

³⁷ “Emi egafis sese' opalefa siegiambama enin sa'usa'win si'i ini' ma okom ananinai nopoma Ae', esis sase'e opalef Ae' wapoti' sagiambame. Ea' emi egafis sigiambama ae'i, ina sagiambama Ae' atowe, owa'. Esis sagiambama anan nasapa'e afi'i wapoti'.”

Emi egafis owa' naumbih ape'isi, esis alupisi ape'isi

³⁸ Ea' Jon nogwa basef na'ama na'i, “Dembinai Tisa, afa' wati anona aman nanda' maol natofa ambagof awami ma agel ine'inai. Ea' anan ina nagalo'ma afa', owa'. Ea' dei' wa'i owa'mana.”

³⁹ Ea' Jisas na'ipa Jon na'i, “Ipe' ina pi'ipana na'ama, owa'. Emi epen nanda' maol bu'unai ma agel Ae'anai, enin ina ni'ipasa basef awami ma Ae', owa'.

⁴⁰ Emi egafis owa' naumbih afa'isi, esis alupisi afa'isi.

⁴¹ Ae' a'ipipa endilisi, emi egafis sitilipa si'i ipe' epes ae'ipei ma siegiambamepa sese'epa anom amamaga kwauwie'im si'i embel kwaie'um pea'am, anona nemaf God nogwamasam amamaga bu'wami si'i presen.”

Waf aonai nahambombaga epes sombale'efa Godi

⁴² Ea' Jisas na'ipam na'ama na'i, “I'i emi egafis senda' enin epen so'uso'win nembale'efa ae'i, nefe' nenda' waf aonai, nambimb epes isima sofa' nimanimi awami. I'i enis epes sofa' epes isima sepa' owap lu'unai nil bagafowa asasimi sokwahis sowala naoh loumi, sope andeande' kwaukwawie'. I'i epes isima senda' enin so'wiso'win nekwaha nembale'efa ae', epes isima sepe awes endilisi sikila' isima sewala naoh laumi afis.

⁴³ I'i lagof ipe'imi monda'epa pewa ma waf aonai, petopa'am pekwahom mefe'. Ea' lagel atona etin nope, ma pefa' ambal namunai nopeipa pepan andeande' la'ela'ef. Na'ama lagel anama nanda' waf aonai nope, nofa'epa pefe' wambel aonai nif fandumi mape la'ela'efi.” [

⁴⁴ “Wambel anama endihip sa'usa'umi namumi mape la'ela'ef magwa epesi, ea' nif amama wapoti' ina hi'gilalam, owa'.”]

⁴⁵ “Ea' i'i bo'waga ipe'inai nonda'epa pewa ma waf aonai, petopa'ana pekwahona. Ea' bo'waga atotona nope, ma pefa' ambal namunai nopeipa pepan andeande' la'ela'ef. Na'ama bo'waga anama nonda'epa penda' waf aonai nope nofa'epa pefe' wambel aonai nif fandumi mape la'ela'efi.” [

⁴⁶ “Wambel anama endihip sa'usa'umi namumi mape la'ela'ef magwa epesi, ea' nif amama wapoti' ina higilalami, owa'.”]

⁴⁷ “I'i naep ipe'imi monda'epa pewa ma waf aonai, pigiam pekwahom. Atona etin mope ma piwis wambota Godi numafipa, pepe andeande' la'ela'ef. Na'ama naem anama nonda'epa panda' waf aonai nope, nofa'epa pefe' wambel aonai nif fandumi mape la'ela'efi.”

⁴⁸ “Wambel anama endihip so'uso'umi namumi mape la'ela'ef magwa epesi, ea' nif amama wapoti' ina higilalami, owa'.”

^49-50 “Anona nemaf epes hiesi some' nimanimi lu'wami si'i nif monda'as sope bo'wes andeande'. Sol usihimi bu'wami ma gwa'aimi, ea' sol owa' usihim, nambimb penda'am pi'imama usihim wapoti'? Ipe' panda' sola gwa'aimi usihim. Ea' ipe' na'ama etin si'i sol usihimi, pepe opalef ipe'imi etifim peloma sahin owan hiesi pigiambamas penda' waf bu'unai.”