Mak Nandaꞌafi 15 - Basef Buꞌwami Godi

Amam mofa' Jisas mafe'ma Pailat manda'mana basef

¹ Kuhimbita atona amam pris dambami maloma anom dambami Judai maloma amam mawalipasa mi'uli Godi maloma anom Juda dambami mumafi koti, amam hiami mandakolas maila basef etifim. Amam mowa' Jisas mofa'ana mafe' maso' gavman dembinai Pailat.

² Ea' Pailat nahali'ana na'i, “Ine' king dembinai esis Judai o owa'?” Ea' Jisas nagwamana basef na'i, “Basef amama ine' na'iami endilisimi.”

³ Ea' amam pris dambami mambaso'ma Jisasa basef hiami.

⁴ Ea' Pailat nahali'ana wapoti' na'i, “Ine' owa' negwa anom basef? Ine' neme'. Amam manda'mena basef hiami ma ine'.”

⁵ Ea' Jisas ina nagwa anom basef wapoti', owa'. Na'ama Pailat okom natanea.

Pailat na'i esis sunda Jisas lawag usi'inai tu'wanainai sohana noga'

⁶ Nemaf anama esis Juda sanda' anom gwa'aimi lu'wami sa'i Pasova. Afagof hiami ma nemaf anama Pailat nanda'am na'ama. Anan nakwaha anona nape kalabusi nafe' wafifina. Emi epen esis amam nematawa sa'ianai, Pailat name'asa nakwahona nafe'mas.

⁷ Nogota anama anona aman nape kalabusi agilinama Barabas. Anan nanda' kalabus naloma anom amam mapa' maloma gavmani maha enis saga'i.

⁸ Ea' esis hiesi safi'i saitu sofala Pailat sa'ipana sa'i, “Ine' nekwaha anona aman nape kalabusi nifi'mai ape' wafifina, si'i afagof hiami nanda'am.”

⁹ Ea' nagwamasa basef na'i, “Dei' ae' ekwaha king dembinai ipe' Judai nefe'mago ipe', o emi?”

¹⁰ Dei' main, Pailat anan nogawa amam pris dambami kowalama epes hiesi saila basef Jisasi ukup aom atom mapomana dei' manda' kotimana.

¹¹ Ea' amam mafela ukup ma esis amam nematawa hiesi ma sohali' Pailata nokwaha Barabas atona nufi'mai esis.

¹² Ea' Pailat na'iam wapoti' na'ama na'i, “Aman anama ipe' pefalona pa'i king dembinai esis Judai, ipe' pa'i ae' enda' i'imamana?”

¹³ Ea' esis sa'i mehip sa'i, “Undana nil lawag usi'inai tu'wanainai!”

¹⁴ Ea' Pailat nahali'as na'i, “Dei' main? Anan nanda' maina waf aonai?” Ea' esis sa'i mehip sa'i, “Undana lawag hana afuna!”

¹⁵ Ea' Pailat naila ukup asasimi, nakwaha Barabas nafe'ma esis na'ipa amam soldia ma mopagaha Jisas mofa'ana mefe'ma mundana lawag usi'inai tu'wanainai.

Amam soldia manda' Jisas findiwana

¹⁶ Amam soldia mofa' Jisas mawisi ipat gavmani lu'unai. Ea' mofala anom soldia hiami mafi'i munduwa'anima ma anan,

¹⁷ malamana saket akwahinai. Ea' mofa'ai anona mandof higatagunai manogana mala'watefana si'i hat mowalo'manana balaga ananinai.

¹⁸ Ea' maitu manda'ana findiwana ma'i, “Nemaf bu'unai, ine' king dembinai esis Judai!”

¹⁹ Ea' amam mahana anona elifita balaga ananinai, misisi'wafana mindiwa nembawa motawa mafela agel ananinai etin.

²⁰ Manda'ana findiwana ma ea', mowalimana saket anama akwahinai, malamana lowaf ananinai mofa'ana mafe'ma mundana lawag usi'inai tu'wanainai.

Amam soldia maunda Jisas nail lawag usi'inai tu'wanainai

²¹ Amam soldia mofa' Jisas mafe' ata' mafo'o eaf la'afen ea' matagama anona aman Saimon Sairininai nafi'i. Batausana ananimi biam, Aleksanda naloma Rufus. Saimon napani aolop nafi'i na'i nefe' Jerusalem. Ea' amam soldia masapa'ana nofa' lawag Jisasi. Ea' nofa'ana nafe'.

²² Ea' mofa' Jisas mafe' mataga anagon agiliguma Golgota. Ape' dei' mambomefagel ma'i, Pipitagel Balagaina.

²³ Ea' mase'ana anom embel wainim mambomom malomana anona marasin agilina mer ma nea' embel mohogofa ekep pehana. Ea' anan ina na'i a'e na'am, owa'. Nandaiwa'mam.

²⁴ Ea' maundana lawag usi'inai tu'wanainai ea' manda' satu ma luwaguf maim ananimi ma emi nikila' nefa'am mondandam atona etin.

²⁵ Kuhimbita aon ata' natefi naili 9 klok, soldia mofa' Jisas mafe' maundana lawag anama.

²⁶ Amam mofa' anona pepa basef amama do'ok amam Juda mambaso'ma Jisasami Pailat nanda'am mail ma'i, “AMAN ANAMA KING ESIS JUDAI.” Amam manda' basef amama mail balaga Jisasi lawag ilif.

²⁷ Felefele'ma Jisas naima, amam soldia maunda anom biam manda' waf aonai manda' wali. Amam maunda Jisas nail la'afen, ea' maunda amam biam mail wa'owa'ol. [

²⁸ Na'ama si'i anom basef Baibel na'iami dei' mataga alihim mandawalap. Basef amama ma'i na'ama ma'i, “Anona nemaf esis ukup mopoma anan noloma amam amama manda' waf aonai.”]

²⁹ Ea' enis amam nematawa safe' safi'i eaf sanda' salamala anan samboma balagah sa'iam na'ama sa'i, “Ine' ewi, ine' aman netala ipat anama dembinai Godi, ma netanima nefelona nela'ana nimeguf wanom,

³⁰ dei' nigiambama ine' nendatagah nisila'i.”

³¹ Ea' amam pris dambami maloma amam dambami mawalipasa mi'uli Godi hiami malomam maitu manda'ana findiwana ma'i, “Anan nagiambama enis epes ea' dei' ina nagiambama anan, owa'.

³² I'i aman anama Krais Dembinai esis Israeli, anan nokwaha lawag nisila'i ma motolona mombale'efana.” Amam biam saundam maloma Jisasi wapoti' manda'ana findiwana ma basef awami.

Jisas naga'

³³ Aon nahagasom owamb lu'unai nataga etap hiagoma esis Judai akotigin. Owamb nape nafe' nafe' ma aon nasa nape 3 klok wambomota. Ea' aon howalagon wapoti'.

³⁴ Aon nasa nape 3 klok, Jisas noga na'i mehip na'i, “Eloi, Eloi, lama sabaktani?” Ape' mambomam ma'iam na'ama ma'i, “God ae'inai, God ae'inai, dei' maina ine' nakwahowe?”

³⁵ Enis epes saitu felefele' same' anan na'iam na'ama sa'i, “Peme'. Anan nofala profet Elaija.”

³⁶ Ea' anona aman nasagih nafe' nofa' anom mosong mape naohi nalam mowala embel wain numbutimi nagiam nasapa'am anona elifita nandowana nafe'ma Jisas nea' embel. Ea' aman anama na'ipas na'i, “Ipe' ata' ota' muti Elaija atuwasi nifi'i notagahona nisila'i o owa'?”

³⁷ Ea' Jisas na'i mehip endilisi naga' ea'.

³⁸ Ea' dei' lowaf anama lu'unai si'i uta nail ipat Godi lu'unai sanda' lotuwanai nomon palalana gani ilif nowala etap nataga biefina.

³⁹ Ea' kepten anama dembinai numafi soldia hiami, naitu felefele'ma Jisas nati anan naga' na'ama ea' na'iam na'i, “Endilisi, aman anama nogalomana Godi.”

⁴⁰ Ea' anowa nematawa waituwi laogon watologini awama. Ano'w Maria Makdalai'wi kwaloma ano'w agel atona Maria mama'wana Josep naloma Jems sa'unai kwaloma ano'w Salomi.

⁴¹ Fowa' Jisas ata' nape Galili, awo waila anani ma wagiambamana ma anom amamaga gwa'aimi maim. Anowa hiawai wapoti' walomana ondowasa' Jerusalem.

Amam mawa Jisas anona owap lu'unai nagal nawis nomon

⁴² Ea' wambomota felefele'ma owamb, Josep Arimateainai nafi'i.

⁴³ Anan dembinai ma kot esis Judai, agel lu'unai. Nape nohafa nemaf bu'unai notaga ma hiesi siowis wambota Godi numafias. Dei' sandandomba amamaga gwa'aimi maima naman nemaf anama Sabat notaga. Ea' Josep nafe' nawis naitu naep Pailati. Anan ina umbamahana, owa'. Nahali'ana ma nofa'ai alop Jisasi nawana.

⁴⁴ Ea' Pailat gegelalasona okom na'i Jisas ina dei' afuna endilisi, ata' owa'. Ea' nofala anona dembinai soldia nafi'i nahali'ana na'ama na'i, “Jisas naga' ea' o owa'?”

⁴⁵ Soldia anama na'ipana na'i, “Jisas naga' endilisi ea'.” Ea' Pailat na'ipa Josep na'i, “Ine' nefe' nefa' alop Jisasi.”

⁴⁶ Fowa' nanda' anona hi'agif nagwasa owap lu'unai nagal nawis nomon. Ea' dei' anan na'i nowa Jisas hi'agif anama. Ea' nafe' notala anona lowaf afitinai nafi'i natagaha alop Jisasi nisila'i ma nanda' lowaf anama nowa'ana ma ea', nasapa'ana nawis hi'agif anama nalana nomon. Ea' namboma anona owap lu'unai nafe' nowalo uta hi'agif anama.

⁴⁷ Anowa nematawa biawa Maria Makdalai'wi kwaloma Maria mama'wana Josepi, awau waitu watologon wati anama Josep nawa Jisas.