Mak Nandaꞌafi 13 - Basef Buꞌwami Godi

Jisas na'i ipat lu'unai Godi anona nemaf enis sufi'i sutalona

¹ Jisas nape nomon ipat anama lu'unai Godi sanda' lotuwanai. Ea' na'i nokwaha ipat anama nawisi ande', anona alupunai ananinai nafi'i na'ipana na'i, “Tisa, ine' niti ifagw amama bu'wami. Sanda' otamba lu'wami sanda'am bu'wami atom.”

² Ea' Jisas nagwamana basef na'i na'ama, na'i, “Ine' nati ifagw amama lu'wami? Anona nemaf ina anom otamba mondatoma la'ifim etin mope, owa'. Sowowalom atona etin hi'ilam mo'oh.”

Jisas na'i nimanimi lu'wami motaga

³ Jisas nape halaf anama lawah oliv motawama ea' nati ipat lu'unai Godi notawa to'wan wa'ol. Ea' Pita naloma Jems naloma Jon naloma Andru atom mafi'mai Anan mahali'ana ma'i,

⁴ “Ine' ni'ipafa amamaga amama nambai' motaga'? Maina ikwaf nili' notaga ma afa' ogawa amamaga amama felefele'ma motaga si'i dei' na'ipafa?”

⁵ Ea' Jisas na'ipama basef na'ama na'i, “Ipe' pindumafuma andeande'. Na'ama enin epen nembaso'mepa.

⁶ Dei' main, amam hiami anona nemaf mifi'i mombaso'mepa mi'i agel ae'anai mi'i, ‘Ae' ma'uwi ae' Krais, God nandandepe nasapa'e afi'i.’ Ea' anona nemaf amam mombaso'ma amam nematawa hiesi some' basef amamumi si'i endilisimi silam.

⁷ Anona nemaf peme'asa basefa wandaf lu'unai hianai notaga ea' ipe' ina umbamehepa, owa'. Amamaga amama anona nemaf motaga ea' nemaf akutainai ata' owa'.

⁸ Enis epes sape anama etap hiagoma kantri sofela wandaf sopa' soloma anona kantri. Anona king nohafel no'wa enis wambel hiagoma ananisi sopa' soloma anona king no'wa ananisi wambel hiagoma. Enis epes wambel hiagoma atona etin etap bol etin nope, ea' enis epes hiesi sape wambel hiagoma nolomohas sope. Amamaga amama hiami ata' muli' motaga si'i nimanimi mali'i ma nemata'w kwa'i kola awani. Ea' nimanimi anona nemaf migi' meatagai lu'um endilisi mikila' amama mali'i.

⁹ Ipe' pindumafuma andeande'. Anona nemaf sonda' kotimipa ma gavman dambami asasimi. Ea' sehepa nomon ifagw esis Juda sa'i basef sapeimi. Ipe' pame' basef ae'ami paila ae'i amama atom dei' sondaiwa'mepa sonda'epa pitu naep kingi moloma gavman dambami ma peawalapa basef ae'ami bu'wami pi'ipasam.

¹⁰ Alupisi ae'asi ata' sili' sofe' wambel hiagoma si'ipa amam nematawa hiesi some' basef bu'wami Godi mili'.

¹¹ Nemaf anama esis sowalapepa sofa'epa pefe'ma kot, ipe' ina umbamehepa pi'i, ‘Atuwasi afa' wi'i maim basef?’ Owa'. Maim basef God niesi'ipami ma nogota anama atona, amama ipe' pewalapam. Amama ina basef ipe'imi atom, owa'. Ambal Bu'unai Godi atona nowalapama ipe' pi'iam.

¹² Anona nemaf esis hiesi sahin owan sondanda'ma kot, sohas soga'. Ea' ahapas sonda'am na'ama etina esis nogamas asasisi. Ea' batawisas wapoti' sonda' kotima mamasas asasisi enis sohas soga'.

¹³ Anona nemaf epes hiesi wambel hiagoma opalef aoma ipe' endilisi. Esis sati ipe' paila basef ae'ami na'ama dei' sahepa. Ea' emi egafis sembale'efa Ae' situ la'ifis sotaga nemaf akutainai, isima anona nemaf God nefa'as sotanimani.

Amamaga awami endilisi anona nemaf motaga

¹⁴ Anona nemaf ipe' piti amamaga mohambombaga amamaga bu'wami motaga mope nomon ipat lu'unai Godi. God nandaiwa' endilisi ma amamaga awami mope nomon ipat Ananinai.” (Emi egafis setalifa basef amama, esis sogawa basef ofagema andeande'.) “Nemaf anama amam nematawa sape etap hiagoma Judia sofa' sefe' sondowasa' halafutagw.

¹⁵ Ea' emi egafis sape ipat ande' felefele' ina ata' setanima suwis sefa'ai amamaga asasimi ipat nomon, owa'. Esis sofa' sefe' mehip.

¹⁶ Emi egafis sapani aofi, ina ata' setanima sefe' wambel sefa' luwaguf maim asasimi, owa. Esis sofa' sefe' mehip.

¹⁷ Nematawa opafuwai waloma awama awasi ata' sagwa' nomambeh atomi Ae' a'i awau uwahipiwa endilisi ma nogota anama ofa' nimanimi lu'wami endilisi.

¹⁸ Ipe' penda' betena amamaga amama nimanimi ina motagamepa nogota anama uf noloma asaf mifi'i.

¹⁹ Nogota anama nimanimi lu'wami endilisi meataganai. Fowa' dambadamba God nanda' etap nataga nafi'i nafi'i nataga dei', nimanimi amama lu'wami ina anom na'amaimi mataga, owa'. Ea' anona nemaf wapoti' ina anom nimanimi amama motaga, owa'.

²⁰ I'i God owa' nenda' nimeguf mefe' bandam, anona nemaf amam nematawa hiesi hegililas hi'ilas. Owa'etin. God okom napoma epes isima anan nasahe'as ea dei' nanda' nogota anama bandana.

²¹ Nemaf anama notaga ma i'i enis epes si'ipipa si'i, ‘Ipe' piti Krais, God nandandepana nasap'ana nafi'i, anan nape na'ae,’ o ‘Nani nape gani,’ ipe' ina pembale'efas, owa' hapaisi.

²² Anona nemaf anom amam mombaso'am mi'i amam Kraisi o mi'i amam profeti, motaga monda' ikwaf la'ifinai naninani hianai si'i God atona nanda'anai. Endilisi i'i amam la'ifim, mombaso'ma amam nematawa God nasahe'as ea' mohambombagas. Owa'.

²³ Ea' ipe' pindumafuma andeande'. Ae' ali' a'ipipa ea'ma amamaga amama nimanimi dei' ata' owa' meatagai.

Anona nemaf Jisas notanima nifi'i

²⁴ Nimanimi amama hiami ma nogota anama hi'ilam ea', mehip etin ‘aon alipunai netaga owamb, ea' aon owambunai wa na'ef ina molo, owa'.

²⁵ Ea' ondowa mowai otaga ilif, amamaga hiami la'ifimi mape otagai ea' bol etin mope.’

²⁶ Nogota anama esis amam nematawa siti ae' ataga epen endilisiwei eloma elagw otaga ilif ifi'i eloma amamaga howalagon bu'wami Godi moloma pepel Ananinai.

²⁷ Nogota anama Ae' iefi'ianai esapa' ensel amama Ae'ami mofe' etap hiagoma aon natefima nowalama wa'owa'ol anama biafigin biafigin mefe'agon hi'ilagon ganima etap otaga nafe' notambilima. Ensel amama mefe' mofa'ai esis amam nematawa God nasahe'as ea'i Ananisi sondakolas etifigin.

Lawag fig nanda'am nihi'ambapa mogawa nogota anama amamaga meataganai

²⁸ Ipe' okokoma anom basef womun etina lawag anama fik. Ipe' piti ilaof monafa ma masowa, pegawa nogota anama nelemb ea' felefele'ma meaof.

²⁹ Ea' na'ama etin nemaf anama piti amamaga amama ali' a'ipipami motaga, ipe' pegawa ae' afi'i aitu felefele'ma uta. Ina ata' nogota laona, owa'.

³⁰ Ae' a'ipipa endilisi, amam nematawa dei' pape etap anae' ata' papani ina pega' ulal, ata' owa', ipe' piti amamaga amama motaga hi'ilam.

³¹ Otaga noloma etap hiagoma anona nemaf hegililam hi'ilam, ea' basef Ae'ami ina anona nemaf hi'ilam, owa'etin. Mope la'ela'ef hihif.

Ina enin epen negawa nemaf amamaga amama meataganai, owa'

³² Owa' enin epen negawa nemaf anama amamaga amama meataganai, owa'. Amam ensel mape heveni maloma ae' Nogalomana Ananiwei ina ogawa, owa'. God atona nogawa nemaf anama.

³³ Ipe' ina pegawa amamaga amama nambai' motaga, owa'. Na'ama pindumafuma, ukup motamea andeande' pepan.

³⁴ Ipe' peme' anom basef womun etin dei' ie'ipipami. Nemaf anama Ae' etanima iefi'ianai si'i anona aman nakwaha ipat ananinai nafe' anagon. Anan nofalai amam manda' maola anani mafi'i nawaloga maol nase'am atona etina mumafi amamaga ananimi. Ea' na'ipa aman numafi utai ma numafiana andeande'.

³⁵ Ea' ipe' pindumafuma andeande'. Ipe' ina pegawa nambei' Dembinai numafi ipati niefi'i. Nambimb nifi'i wambomota o amaneta o kwafolimbuta awatagw meada'am o kuhimbita atona, ipe' ina pegawam, owa'.

³⁶ Na'ama Anan nifi'i mehip niti ipe' ata' pe'eh etin.

³⁷ Basef amama ae' ase'epam ipe'i amama ae' a'ipa amam nematawa hiesi. Ipe' pindumafuma andeande' pepe ma amamaga ae' a'ipipami meataga.”