Mak Nandaꞌafi 12 - Basef Buꞌwami Godi

Basef womun etina amam awami mumafi aofi

¹ Ea' Jisas nanda' anom basef womun etina esis na'i, “Anona aman dembinai nanda' anona aof nawa wain nahopana. Aof anama nomon anan nanda' anona tang notawa ma sofa'asa su'utip amama wainim, ea' nala' anona ipat launai notawa sope sumafiagon. Ea' nakwahomama aof anama anom amam ma'i monda' maolanana. Ea' anan nafe' napani anona wambel laugoma.

² Ama nogota su'utip mailanai, nafamona aof anamai nasapa' anona nanda' maoli nafe' ma amam manda' maol aof ananinai. Na'i amam mose'ana anom su'utip gwa'aimi ma aof anama.

³ Ea' mombalo'ana mahana matofana notanima nafe'.

⁴ Ea' nafamona aofi nasapa' anona nanda' maoli nafe' wapoti' ma mose'ana anom su'utip. Ea' mombalo'ana wapoti' mahana mawala balagana manda'ana kwapete'ana.

⁵ Ea' nafamona aofi nasapa' anona nanda' maoli nafe' wapoti', ea' mahana afuna, ea' nafamona aofi nasapa' anom hiami mafe'. Ea' maham etin anom afum.

⁶ Ea' nagi' nasapa' aman atotona napani wapoti'. Anama nogalomana ananinai. Okom ananinai nohafel nainailana endilisi. Ea' na'iam na'i, ‘Nambimb, amam mome' malogel nogalome ae'anai.’

⁷ Ea' amam mati nogalomana ananinai nafi'i, manda'ipama etin ma'i, ‘Aman anama anona nemaf nofa' amamaga hiami ahalomanai. Afa' ohana afuna, ma afa' atofa ofa' aof anama.’

⁸ Ea' mombalo'ana mahana afuna makwaha alop ananinai nawis na'oh aof ande'.

⁹ Ea' nambimb anan nafamona aofi nonda' maina amam? Nambimb nifi'i noham afum hi'ilam, nose'asa aof anama nefe'ma enis.

¹⁰ Ipe' patalifa basef Godi pegawam ea'. Basef Baibeli ma'i na'ama ma'i, ‘Owap anama mala' ifagwi magwasi'ana dei' nataga nape owap nape nali'i nembalo' ipat.

¹¹ Dembinai nanda' amama mataga, ape' matolom bo'om endilisi.’ ”

¹² Ea' amam agufumi esis Judai mogawa anan na'i basef amama womun etini mondola'wifa amam. Ea' ma'i mombalo'ana. Ea' amam umbamahama esis amam nematawa hiesi. Ea' makwahona mafe'.

Amam mahali' Jisasa esis sose'ana takis Sisar dembinai gavman nali'ma esis Romi

¹³ Ea' amam agufumi Judai masapa'am anom Farisi maloma anom amam Heroti mafe'ma Jisas ma'i mome' anom basef ananimi owa' andeande'i ma monda'mana basef mowa'ana si'i sowa' bogof.

¹⁴ Ea' amam mafi'i makikipana ma'i, “Dembinai Tisa, afa' ogawena ine' aman na'i basef endilisimi. Ina ni'ipasa anom basef isima enis agof lu'wamisi ea' anom basef isima agof a'asi falafisi, owa'. Ine' na'ipasa basef atifim endilisimi atom ma okom Godi amam nematawa hiesi dondo' etin hi'alam.

¹⁵ Mi'uli ape'inai na'i andeande'ma ape' mose'ana takis Sisar gavman dembinai ma esis Rom, o owa'?” Ea' Jisas negawam baso'am amamunai na'ipam na'i, “Dei' maina ipe' pagwamba ae'? Fa'mai anona moni atotona ata' itolona.”

¹⁶ Ea' mofa'mananai ma natolona nahali'am na'i, “Ambal naloma agel anama mailanai eminai?” Ea' ma'i, “Amama Sisari gavman dembinai.”

¹⁷ Ea' nagwamama basef na'ipam na'i, “Ea' amamaga Sisari pese'anam Sisar. Ea' amamaga Godi, pese'anam God.” Ea' amam gegelalasom ukup matamea ma Anan.

Amam mahali' Jisasa saga'i sohafel wapoti'

¹⁸ Anom amam Sadyusi amam hiami ma'i saga'i ina anona nemaf sotanima sohafel wapoti', owa'. Ea' mafi'mai Jisas mahali'ana ma'i,

¹⁹ “Dembinai Tisa, fowa' gani Moses nanda' anom basef mail buki ma ape' ma'i, ‘I'i anona aman noga' ma anan awasi a'ana, ea' waulu'mana ata' kope, owalomana ananinai nose'akw nola enis awasi ma soho'ofana.’

²⁰ Ea' fowa' amam wambota atotona 7-peleim mape. Nali'i sahalomam nase'akw awani a'akw naga' nakwaho'w kwape.

^21-22 Ea' owalomana nagi' nase'akw, naga' nakwaho'w kwape awani a'akw. Ea' owapam mandatu'umai manda'am na'ama etin, mase'akw maga' etin hi'alam mafe' mafe'ma matagama owagufunai akutainai. Amam amama wambutaim ina mola enis awasi, owa'. Maga' etin hi'alam. Ea' waulu'mam kwagi' kwaga' kwagi'mam.

²³ Ea' nemaf anama esis saga'i sohafel wapoti', nemata'w akwama kope nemata'w emi'wi? Amam 7-peleim maso'akw etin hi'alam kwape waulu'mam amamu'wi.”

²⁴ Ea' Jisas nagwamama basef na'i, “Ipe' owa' pegawa basef Baibel na'iami, owa' pegawa pepel Godi.

²⁵ Nemaf anama saga'i sokwaha hi'agilif sohafel wapoti', amam nematawa ina ata' sondase'ama wapoti', owa'. Sopan etin si'i ensel mape heveni.

²⁶ Basef amama saga'i sotanima sohafel wapoti', ipe' patalifa basef mail buk Baibeli, fowa' gani God na'ipa Mosesami. Basef amama ma'i nif ilalowa mataga ma lawag so'unai fandonai. Basef amama God na'ipa Moses na'i, ‘Ae' God Abrahami, Aisaki, maloma Jekopi.’

²⁷ Basef amama ma'i Dembinai, Anan ina God epes saga'i, owa'. Anan God epes isima ambal napeis sape namusi. Ea' basef ipe'imi ina endilisimi. Ipe' ina pegawam andeande', owa'.”

Mi'uli Godi nali'i nikila' mi'uli hianai ape' membale'efanai

²⁸ Anona aman nawalipasa mi'uli Godi nafi'i, name' amam ma'i maloma Jisas mandahihianama basef. Ea' name' Jisas nagwamama basef bu'wami atom. Ea' nahali'ana na'i, “Mi'uli Godi ape' membale'efanai hianai. Ea' maina mi'uli lu'unai nikila' mi'uli hianai nape nali'i?”

²⁹ Ea' Jisas nagwamana basef na'i, “Mi'uli nali'i anama. ‘Ipe' Israel, ipe' peme'! Dembinai God ape'inai, Anan atona Dembinai.

³⁰ Nomonas ipe'imi mohafela Dembinai God ipe'inai mimilana na'ama. Ukup ipe'imi mimilana hi'ilam, pese'ana ambagof opalef moloma pepel ipe'imi pese'anam hi'ilama Dembinai God atona.’

³¹ Ea' mi'uli nafe'ma bifi anama. ‘Ipe' ukup mimila enis epes sape felefele'ma ipe'i si'i ukup maimaila ipe' etipa.’ Owa' anona mi'uli nikila' mi'uli anama biefina, owa'. Mi'uli anama biefina ape' mombale'efanai ea' anama atona.”

³² Ea' aman anama na'ipa Jisas na'i, “Dembinai, ine' na'iam andeande'. God atona Anan Dembinai, Anan atona nape. Owa' anona aman nope dembinai si'i Anan.

³³ Mi'uli lu'unai nali'i anama. Nomonas ipe'imi mohafela anan mimilana na'ama. Ukup ipe'imi mimilana hi'ilam, pese'ana opalef moloma gawa moloma pepel ipe'inai hi'ilana. Na'ama andeande'. Ea' mi'uli nagi'i anama. Ipe' piti uwahipis ukup mimila emi egafis sape felefele'ma ipe'i si'i ipe' ukup maila ipe' etipa. Na'ama andeande'. I'i ape' mila mi'uli anama biefina, waf anama bu'unai nikila' gwa'aimi mafis maim mose'anam Godi ata' bo'om andeande'.”

³⁴ Jisas name' aman anama nagwa basef si'i aman gawa bu'unai. Ea' na'ipana na'i, “Ina ata' nogota laona ma niowis wambota Godi numafina, owa'.” Ea' amam hiami umbamahama meahali' Jisasa anom basef wapoti'.

Jisas nahali' esisa Krais, God nandandepana nasapa'ana nafi'i

³⁵ Ea' Jisas nape felefele' ma ipat lu'unai Godi sanda' lotuwanai nase'asa basef esis amam nematawa na'i, “Amam mawalipasa mi'uli Godi ma'i, ‘Krais, aman anama God nandandepana nasapa'ana niefi'i, Devit akunamana.’ Ea' ma'i Krais aman atona etapanai. Dei' maina ma'iam na'ama ma Krais?

³⁶ Ambal Bu'unai Godi fowa' gani nafela Devit na'i ‘Dembinai God na'ipa Dembinai ae'anai na'i, “Ine' nepe lagel da'isinai ae'anai la'ela'ef nefe' netagama anona nemaf ae' enda' naumbih ine'isi sefe' owina bo'wagah ine'imi.” ’

³⁷ King Devit fowa' gani nofala Krais na'i, ‘Anan Dembinai.’ Amama atom dei' Krais ina aman nogalomana Deviti atona falafunai, owa'. Anan Dembinai.” Ea' amam nematawa hiesi sandanifel same' basef Ananimi.

Amam mawalipasa mi'uli Godi waf amamunai aona

³⁸ Ea' Jisas nawalipasa basef na'i, “Ipe' pindumafuma andeande' ma amam mawalipasa mi'uli Godi. Amam ma'i mowaho'a luwaguf laumi atom mofe'ma esis sotoloma si'i amam dambami manda' waf bu'unai. Amam ma'i mope anama esis hiesi sandatama sapoma ma sotoloma sefela agof amamumi sinifelom.

³⁹ Amam amama ukup ma'i mope siaifah amama motawa mali'i atom, dambami atom mapoma nomon ifagw esis Juda sa'i basef sapeimi o anama epes hiesi sandatama sapoma nimeguf amama sanda' gwa'aimi lu'wami ma hiesi sotolom.

⁴⁰ Ea' amam mawis ifagw amama nematawa alifiwai, mawis makowalopam amamaga awaumi. Ea' mohafel maitu manda' beten launai atona wafinai esis sotolom si'i amam bu'wami. Anona nemaf God nowaloga epes hiesi. Enis epes owa' senda' waf aonai na'amainai anona nemaf sofa' nimanimi kwawie'um, ea' amam mofa' nimanimi lu'wami endilisi.”

Nemata'w alifi'wi kwase'ana moni sa'unai biefina God kwanda' ofa

⁴¹ Jisas nape nomon ipat lu'unai Godi sanda' lotuwanai, nape felefele'ma bokis amama sala moni nalami. Anan nape nati amam nematawa safi'i sala moni nowala bokis amama. Amam nematawa isima hiesi moni hianaisi sala moni hianai.

⁴² Ea' ano'w nemata'w alifi'wi kwafi'i kwala moni sa'unai biefina si'i 10 toea newala bokis isima.

⁴³ Ea' nofala alupumi ananimi mafi'i na'ipam na'i, “Ae' a'ipipa endilisi, nemata'w akwama alifi'wi kwala moni lu'unai nikila' moni hianai amam nematawa hiesi salanai.

⁴⁴ Epes isima hiesi moni hianai na'omas, sala tu'wanina atona nowala bokis. Ea' nemata'w akwama, moni a'akw endilisi, akwa'w kwala moni ako'unai hi'alana. Ea' owa' anona ne'oh kweatala gwa'aimi, owa'. Ea' moni akwa'unai biefina so'unai nikila' moni hianai esis salanai.”