Mak Nandaꞌafi 11 - Basef Buꞌwami Godi

Jisas nondowasa' nafe' nawis Jerusalem si'i anona dembinai king

¹ Jisas naloma alupumi ananimi mafe' mondowasa' mataga felefele'ma Jerusalem, ea' mataga Betani naloma Betafage wambel biefina ea' mataga halaf lawah oliv motawama. Ea' Jisas nasapa' alupumi ananimi biam

² na'ipam na'i, “Ipe' bipa pefe' wambel nanima nape gani wa'ol felefele'ma na'ae pefe' piwis wambel anama, piti anona donki so'unai sapana nail. Ina dei' enin epen natomana, ata' owa'. Petagahona pefa'ana pifi'mai ae'.

³ I'i enin epen nihali'ipa ni'i, ‘Ipe' pafi'i panda'am na'ama ma main?’ Ea' ipe' pi'ipana pi'i, ‘Dembinai afa'inai na'ipafa na'i nonda' maolana atuwasi nosapa'ana notanimamipei mehip.’ ”

^4-5 Ea' amam biam mafe' mati anona donki sa'unai sapete'ana nail ipat uta ande' felefele'ma eaf. Amam ata' matagahona etin, enis saitu felefele' sahali'am sa'i, “Dei' maina ipe' patagaha donki anama?”

⁶ Ea' ma'ipas si'i Jisas do'ok na'ipam. Ea' sa'i a'e ma amam mofa' donki anama.

⁷ Ea' mofa'ana mafi'mai Jisas, mawamona sagwegw amamumi matoma donki anama Jisas natomam.

⁸ Ea' esis hiesi sambe'amonam sagwegw eaf. Enis satopa'i lawah motawa aof felefele'i sase'wiam eaf sofalo'mana.

⁹ Esis hiesi sali' sagi' sanda' la kolo' safe' na'ama sa'i, “Hosana. Ape' mandanifel endilisi ma ine'. Ape' ma'i God nofalo'ma ine' nafi'i agel Dembinai.

¹⁰ Dei' awi ine' nafi'i, nape Dembinai ma ape' nimafiapa si'i fowa' gani Devit nape dembinai numafias. Hosana. Ape' mosa'ma agel Godi nolata ilif endilisi.”

¹¹ Ea' Jisas nawis Jerusalem nafe' nawis ipat Godi lu'unai sanda' lotuwanai. Nawis nati amamaga nafe'ma hi'alam, aon na'i nowala, nao'wa alupumi 12-peleim ananimi mafe' Betani.

Jisas na'ipa anona lawag agilinama fik ma ina ata' nil nola su'utip wapoti', owa'

¹² Wafilu Jisas naloma alupumi ananimi mohafel makwaha Betani mafi'i etin, Jisas nolomahana.

¹³ Ea' naitu nati anona lawag agilinama fik notawa laogon felefele', nati apul atom. Ea' nafe' felefele' nagolopa su'utip. Ea' ina nati anom mailana, owa'. Nati apul atom. Nogota anama mailanai ata' owa'.

¹⁴ Ea' Jisas na'ipana na'i, “Ina ata' nela anom su'utip milina wapoti', owa'”. Ea' alupumi ananimi mame' basef amama na'ipa lawagami.

Jisas nagolo'ma amam nematawa satala amamaga ipat lu'unai Godi sawisi ande'

¹⁵ Jisas naloma alupumi ananimi mafe' mataga Jerusalem, ea' nawis ipat lu'unai Godi nagolo'ma esis hiesi sanda' bisnisi saloma isima satalom ipat anama nomoni sawisi ande'. Anom amam mati otamba enis epesi mindisila'mam. Ea' Jisas namboma tebol amamumi nakowasom. Enis sanda' bisnisa setal amiguf mai'unamb. Ea' namboma siaifah asasimi nakowasom wapoti'.

¹⁶ Ea' nanda'imagon na'i, “Ina ata' sofa' anom amamaga amama suwisi nomon wapoti' ipat anama sandatama sapoma, owa'.”

¹⁷ Ea' na'ipasa basef Godi mail Baibeli na'i, “Ipat Ae'anai nopoma esis sape ganima wambel hiagomai ma sifi'i sopaina sonda' beten sohali' Ae'. Ea' ipe' panda'ana nataga si'i sanda' walanai.”

¹⁸ Amam nematawa hiesi gegelalasisa basef ananimi. Amama atom pris amama dambami maloma amam mawalipasa mi'uli Godi umbamahama anan. Ea' magolopa eafa mohana neaga'.

¹⁹ Ea' wambomota Jisas nao'wa alupumi ananimi makwaha Jerusalem mafe'.

Emi nombale'efa God nenda' beten nihali'ana, nambimb nefa' amamaga

²⁰ Wafilu kuhimbita atona Jisas naloma alupumi ananimi mafe' mati lawag anama fik bowana alina, soh maloma nombalef alim hi'alam.

²¹ Ea' Pita natolona okom napoma Jisas na'iami basefa lawag anama ea' na'ipana na'i, “Dembinai tisa, ine' niti lawag anae' nambati' ine' na'ipanai, alina hi'alana.”

²² Ea' Jisas nagwamama basef amam na'ipam na'i, “Ipe' pembale'efa God.

²³ Endilisi ae' a'ipipa, emi egafis owa' ukup bimbiefim mopeis ma esis ukup etifim sembale'a basef Ae'ami endilisi si'ipa halaf nani si'i, ‘Ine' degia nefe' newala naoh,’ endilisi God nambimb nonda'am motaga si'i esis ukup ma'iam.

²⁴ Na'ama a'ipipa, I'i ipe' pi'i penda' betena pehali Goda anom amamaga, pembale'efa God endilisi penda' beten pi'i, ‘Endilisi, afa' nambimb ofa'ami,’ ma nambimb pefa'am si'i pa'iam.

²⁵ Nemaf anama ipe' pitu penda' beten, pekwahomasa waf aonai enis sanda'mepanai. Ama Ahalomepa nape heven ilifi nekwahomepa waf aonai ipe' panda'anai wapoti'. [

²⁶ I'i pindaiwa'ma peakwahomasa waf aonai enis epes sanda'mepanai, Ahalomepa nape heveni ina nekwahomepa waf aonai ipe' panda'anai, owa'etin.]”

Amam mahali' Jisas ma'i, “Emi na'ipina ma nepe dembinai?”

²⁷ Ea' Jisas naloma alupumi ananimi mafi'i Jerusalem wapoti', ea' nafe' nawis ipat lu'unai Godi sanda' lotuwanai. Anan ata' nafe' etin, amam pris dambami maloma anom mawalipasa mi'uli Godi maloma amam agufumi Juda mafi'mai Anan.

²⁸ Ea' mahali'ana ma'i, “Ine' nefa' agel maina dei' nanda' maol anama? Emi na'ipina ma nepe dembinai nanda' maol anama?”

²⁹ Ea' Jisas nagwamama basef na'i, “Ae' wapoti', a'i ihali'ipa ma anom basefa ipe' ata' pili' pi'ipa ae', ma atuwasi i'ipipa emi na'ipi ape dembiwei anda' maol anama.

³⁰ Jon napisi'as amam nematawa hiesi, emi na'ipana nanda' maol anama? God nape heveni na'ipana napisi'as o enin epen etapanai na'ipana? Ipe' pegwam pi'ipiam.”

³¹ Ea' mame' basef amama manda'ipama ma'i, “Afa' wi'i, ‘God nape heveni na'ipana,’ Anan atuwasi ni'ipafa ni'i, ‘Dei' maina ipe' owa' pembale'efana?’

³² Ea' afa' wi'i, ‘Epes sape etapi sa'ipa Jon napisi'asi,’ na'ama esis amam nematawa sohafa.” Dei' main, esis hiesi sa'i Jon anan profet dembinai. Ea' amam umbamahama esis.

³³ Ea' magwamana basef ma'i, “Afa' ina ogawana.” Ea' Jisas na'ipam na'i, “Na'ama etin ae' ina i'ipipa emi nase'e agel lu'unai na'ipi anda' maol anama.”