Mak Nandaꞌafi 10 - Basef Buꞌwami Godi

Jisas na'ipasa sawala waf anama sandase'amainai

¹ Ea' Jisas nakwaha wambel anama nafe' anona etap hiagoma Judia nambo walemb Jordan gani fisana. Ea' amam nematawa hiesi safi'mai Anan wapoti', nase'asa basef si'i la'ela'ef nawalipasam.

² Ea' anom Farisi mafi'i mahali' Jisasa anom basef magwambana ma'i, “Mi'uli ape'inai andeande'ma anona aman nondaiwa'ma nemata'w anani'wi nokwaho'w o owa'?”

³ Ea' Jisas nagawamama basef na'ipam na'i, “Moses nase'epa maina mi'uli?”

⁴ Amam magwamana basef ma'ipana ma'i, “Moses na'i a'e ma anona aman ni'i nokwaha akwa'w, nonda' anom basef mil okwatip nose'akwana nokwaho'w kofe'.”

⁵ Ea' Jisas na'ipam na'i, “Ipe' patotopa' basefi. Dei' Moses nanda'mepa mi'uli anama.

⁶ Fowa' gani dambadamba God nanda' amamaga hiami, ‘Nanda' epes sataga amam nematawa.’

⁷ 'Na'ama esis bias ina ata' sope si'i sape deindei, owa'. Aman nokwaha mamasana ananisi nefe' noloma waulu'mana anani'wi, esis bias sope alop atotona.

⁸ Ea' esis bias sondase'ama sotaga si'i alop etifina.’ Esis ina ata' sape biasa sape deindei, owa'.

⁹ Ea' esis God nakolasis sape la'ifis, isima God na'i enin epen ina nehape'as, owa'.”

¹⁰ Ea' Jisas naloma alupumi ananimi mafe' mawis mape ipat, mahali'ana ma waf anama sandase'amainai.

¹¹ Ea' Jisas na'ipam na'i, “Emi egalin nakwaha waulu'mana anani'wi ma nose' ano'w wapoti', anan nanda' waf aonai so'a waola nemata'w akwama nali' nase'akwi.

¹² Ea' na'ama etin, emi egafu'w kokwaha anona kose' anona aman wapoti', akwa'w kwawala waf bu'unai kwatopa' dase'ama kwanda' waf aonai so'a waulanai ma anan nali' nase'akwi.”

Jisas na'ipasa basef bu'wami ma esis awasi

¹³ Ea' esis sau'wamanai enis awasi sofa'as safi'mai Jisas, sa'i anan nowamona lagof ananimi ma awasi isima ma ni'ipasa basef bu'wami ma God nofalo'mas. Ea' alupumi ananimi mati amama ea' minifalis esis sofa'as sifi'mai Anan.

¹⁴ Ea' Jisas nati amam ma'i manda' na'ama, anan okom aona ma amam ea' na'ipam na'i, “Ipe' kwahowas awasi isima sifi'mai ae'. Ipe' ina pindaiwa'mas. Fa'asi sifi'mai ae'. Esis amam nematawa siowis wambota Godi numafias same' basef ananimi sailam si'i awasi isima.

¹⁵ Ae' a'ipipa endilisi, emi egafis sindaiwa'ma siowis wambota Godi numafias ama sese'ana ukup asasimi ma God si'i awasi isima sa'i aho'mana, epes isima sanda'am na'ama ina nambimb suwis wambota Godi numafias, owa'.”

¹⁶ Ea' Anan nafela awasi isima nahapilas satoma bo'wagah ananimi nawamona lagof ananimi balagah asasimi na'ipasa basef bu'wami ma God nofalo'mas.

Aman anama awomunai amamaga hiamunai

¹⁷ Jisas nohafel nafe', anona aman nasagih nafi'mai anan nindiwa nembawa notawa nahali'ana na'i, “Tisa bu'winai, ae' nambimb enda' maina waf bu'unai ma efa' ambal namunai epe andeande' la'ela'ef?”

¹⁸ Ea' Jisas na'ipana na'i, “Dei' maina ine' na'i Ae' bu'uwei? God atona Anan bu'unai.

¹⁹ Ine' negawa mi'uli God naso' Mosesanai na'i, ‘Ina nenda' waf aonai so'a waulanai neha enis soga' nenda' wal, owa', ine' owa' nembaso'ma enis epes ama nenda' kotimas etin, ea' ina nembaso'ma enis epes ma nefa' anom amamaga asasimi, owa'. Ine' nepe owina mamasena ine'isi neme' basef asasimi nilam ea' numafias andeande'.’ ”

²⁰ Ea' aman anama na'ipa Jisas na'i, “Tisa, mi'uli anama hianai ahapilana ailana fowa' ata' awani afi'i afi'i ataga dei'.”

²¹ Ea' okom Jisasi nohafela anan nainailana, na'ipana na'i, “Ine' anona waf bu'unai atotona ata' owa' neanda'anai. Ine' fo'o nese'asa amamaga ine'imi hiami enis epes sotaluma nefa' moni anama nenda'ana neso' isima kwahusi. Nenda'am na'ama ma anona nemaf nefa' amamaga bu'wami gani heven ilif. Ea' nembale'efa ae' nila ae'.”

²² Ea' aman anama neme' basef amama nandaiwa'ma nonda'am nose' enis epes kwahusi. Ea' okom ananinai nimanina endilisi nandamboma megah atogah nafe'. Dei' main? Anan amamaga hiamunai.

²³ Ea' Jisas natologon ganigani na'ipa alupumi ananimi na'i, “Epes isima wiga moni hiamisi sanda'am ahifim endilisi ma sefe' suwis wambota Godi numafias. Atona etin sefe' siowis.”

²⁴ Ea' amam mohafel gegelalasoma basef amama na'ipamami. Ea' Jisas nagwamama basef wapoti' na'i, “Owape ae'ipei, eaf nafe' anamai ina andipana, owa'. Ahifina.

²⁵ Anona mafin lu'unai kamel nuwis nil nagala sagundisa luwagufanai, anama wila ma niowis. Ea' amam nematawa amamaga hiamisi sefe' siowis wambota Godi numafias sonda'am ahifim endilisi ma sefe' siowis. Eaf anama ahifina endilisi nikila' maol kamel nuwis nil nagala.”

²⁶ Ea' alupumi ananimi mohafel gegelalasom kwapete'am endilisi manda'ipama ma'i, “I'i na'ama, anona nemaf God nofa' emi egafis setanimani? Owa'etin.”

²⁷ Ea' Jisas nati amam na'ipam na'i, “Amamaga epes owa' la'ifisa seanda'ami, amama God atona la'ifinai ma nonda'am. Anan la'ifinai ma nonda' amamaga hiami.”

²⁸ Ea' Pita na'ipana na'i, “Neme', afa' wakwaha amamaga afa'imi hiami, dei' wafi'i wambale'efa basef ine'imi wailina.”

^29-30 Ea' Jisas na'ipana na'i, “Endilisi, ae' a'ipipa na'ama a'i, Ipe' emi egafipa ukup ipe'imi mopoma Ae' eloma basef bu'wami Godi pekwaha ifagw moloma sahin owan ahapas mamasas batawisas moloma aof amamaga maim ipe'imi, anona nemaf pefa' amamaga amama hiami endilisi, mikila' ipe'imi amamaga fowa'imi. Ea' enis epes nambimb sehepa sonda'mepa waf aonai. Ea' anona nemaf nogota bu'unai neataga, pefa' ambagof namumi pepan andeande' la'ela'ef hihif.

³¹ Ea' epes hiesi dei' sataga sali'i agof lu'wamisi, anona nemaf agof a'as sotaga sigi'. Ea' epes isima sataga sagi'i anona nemaf owagama sofa' agof lu'wami sotaga sili'.”

Jisas na'iam wenifa noga' ma notanima nohafel wapoti'

³² Esis saila eaf safe' sondowasa' Jerusalem, Jisas nafe' nali'as. Ea' alupumi ananimi mailana mafe'. Amam mogawa Anan nafe' Jerusalem, na'ama dei' amam gegelalasom. Enis epes sagima amam, esis umbamahas. Ea' Jisas nao'wa alupumi atom mafe' mape anagon dei, na'ipama amamaga amama nambimb meatagamasi.

³³ Ea' na'ipam na'i, “Peme'. Dei' afa' ondowasa' Jerusalem. Ae' ataga epen endilisiwei, nambimb anona aman nowalapa ae' ma efe'ma amam pris dambami moloma amam mawalipasa mi'uli Godi ea' monda' kotimi ea' mi'i basef mondame'mam mohe ega'. Ea' monda'e efe'ma esis sololama Godi ma

³⁴ sonda' salamala ae' sonda' findiwae sisisi'wafe sopagahowe sehe ega'. Ama nimeguf biam hi'alam, anona nefe'ma wanomi etanima ehafel wapoti'.”

Jems naloma Jon ma'i mope dambami

³⁵ Ea' Jems naloma Jon, Sebedi batawisana mafi'i mahali' Jisas ma'i, “Dembinai tisa, afa' biafa wa'i uhali'ina ma anom basef ea' nenda'mafam afa' biafa.”

³⁶ Ea' Jisas nahali'am na'i, “Ipe' pa'i enda'mepa main?”

³⁷ Ea' ma'ipana ma'i, “Anona nemaf ine' netaga nefa' agel lu'unai mafifili gani wambel Godi, nemaf anama afa' wa'i ine' nenda'afa ope dembifai wil olomena wa'owa'ol, anona nil wa'ol egagili ea' anona nil wa'ol da'isinaima.”

³⁸ Ea' Jisas na'ipam na'i, “Ipe' bipa ina pegawa andeande'ma amamaga amama pahali'imami, owa'! Ipe' bipa la'ifipama pea' embela kap anama dei' ae' eagwa' embelanai, o owa'?” Ea' Jisas na'ipam na'ama ea' na'ipam wapoti' na'i, “Ipe' bipa la'ifipama pefa' baptais amama dei' efa'ami o owa'?”

³⁹ Ea' magwamana basef ma'ipana ma'i, “Afa' wila la'ififa.” Ea' Jisas na'ipam na'i, “Endilisi, kap anama dei' ae' ea' embelanai, ea' baptais amama nambimb efa'ami amama ipe' nambimb pefa'am.

⁴⁰ Ea' peape lagel da'isinai o eganai ae'ami, amama ina maol ae'anai, owa'. God atona ni'i esis isima nandandepas ea'i, esis etis sope lagof da'isinai egagili ae'ami.”

⁴¹ Ea' alupumi tu'wanim 10-peleim mame' amam biam ma'iam na'ama, manda' megah maham Jems naloma Jon.

⁴² Ea' Jisas nofala alupumi Ananimi 12-peleim mafi'mai Anan, na'ipam na'i, “Ipe' pegawa epes sololama Godi sa'i agufumi asasimi dambami, amam mape ilifa esis manda'as kwapete'as. Ea' amam dambami mape la'ifim endilisi manda' esis amam nematawa saila malogof amamumi.

⁴³ Ea' waf anamai ina nepoma ipe', hapainai. Emi aman nope dembinai ma ipe'i, anan ata' nili' nope si'i nanda' maola ipe' hipai.

^44-45 Emi aman ni'i nope nili', anan nepe owina ipe' hipai nonda'mepa opeh ipe'imi. Ae' ataga epen endilisiwei ina afi'ima esis sonda'me opeh sigiambame, owa'. Ae' afi'i ma sehe ega' etala ipe' peloma epes hiesi etagahipama waf aonai nowa'ipei. Ea' emi egelin ni'i notaga dembeni ma ipe', anan ata' nopan si'i agel a'anai nonda'masa maol hiesi.”

Anona aman naep mase'anai Jisas nanda'ana bo'ona

⁴⁶ Ea' Jisas nao'wa alupumi ananimi mafe' mataga Jeriko. Ea' ma'i mokwaha Jeriko mefe' moloma amam nematawa hiesi, mataga eaf nawis wambel, ea' anona aman naep mase'anai Bartimeus, nogalomona Timeusi, tol nape felefele'ma eaf. Anan nape nandailasa gwa'aimi moni maim.

⁴⁷ Bartimeus name' basefa Jisas Nasaretinai nafi'i nape, ea' nofalana mehip na'i, “Jisas, ine' akunamana Deviti, niti ae' uwahipiwi!”

⁴⁸ Ea' esis hiesi sinifalona sa'i, “Ine' feso'mena.” Ea' anan fala etin nape na'i, “Jisas ine' akunamana Deviti, nitolowe uwahipiwi.”

⁴⁹ Ea' Jisas nafi'i naitu na'i, “Kipana nifi'mai ae'.” Ea' sa'ipana sa'i, “Nomonas la'ifim. Hafel! Fi'i Jisas nofalinai.”

⁵⁰ Ea' anan nakwaha saket ananinai nohafel mehip nafe'ma Jisas.

⁵¹ Ea' Jisas na'ipana na'i, “Ine' na'i ae' enda'mena main?” Ea' na'ipana na'i, “Dembinai tisa, ae' a'i iti andeande' wapoti'.”

⁵² Ea' Jisas na'ipana na'i, “Ine' fo'o. Ine' nembale'efa ae' la'ifiwei ma anda'ena bo'wena wapoti'.” Ea' mehip naep matiana andeande' nagi'ma Jisas nafe' eaf.