Luk Nandaꞌafi 9 - Basef Buꞌwami Godi

Jisas nase'ama maol alupumi ananimi 12-peleim nasapa'am mafe'

¹ Nemaf anama Jisas nofalai alupumi 12-peleim ananimi mandakolas mafi'i nase'am agof lu'wami nanda'am la'ifima meatofa ambagof hiami awami ea' monda' hiesi awes hianai naninani nanda'asi sataga bo'wes.

² Ea' nasapa'am mafe' ma'ipasa basefa epes siowis wambota Godi numafias ea' manda' epes awes nanda'asi sataga bo'wes.

³ Ea' anan na'ipam na'i, “Ipe' ina pefa' anom amamaga bandefah isalef gwa'aimi moni, owa', hapaimi. Ipe' ina pefa' siogw biagw atogw, owa'. Pefa' atona etin mondandaepa.

⁴ I'i pefe' piowis anona ipat, ipe' pepe ipat anama atona. Ea' pekwaha wambel anama pefe'.

⁵ I'i esis owa' sofa'epa pefe' ifagw asasimi, ipe' pekwaha wambel anama pindila'ma usas etap mail bo'wagah ipe'imi ma esis sitilipa sogawa waf aonai esis sanda'anai ofagena asasinai atona.”

⁶ Ea' alupumi Jisasi makwaha anama mapoma mafe' wambel anama hiagoma ma'ipasa basef bu'wami Godi. Ea' magiambama epes awes nanda'asi sape wambel hiagomai manda'as bo'wes wapoti'.

Herot name' basefa Jisas

⁷ Gavman dembinai king Herot numafi etap hiagoma Galili name' basefa amamaga amama hiami mataga, ea' ina nogawam andeande' ea' nomonas matamea mafe'. Dei' main, enis epes sa'i, “Jon notanima nohafel hi'agif wapoti'.”

⁸ Ea' enis sa'i anom basefa Elaija profet fowa'inai sa'i, “Anan nohafel wapoti'.” Ea' enis sa'i, “Anona aman profet fowa'inai notanima nohafel wapoti'.”

⁹ Ea' Herot na'i, “Jon ae' atopa'mana. Ea' aman anama ame' basefanai, anan emi egafuna?” Ea' nape la'ela'ef na'i niti Jisas.

Jisas nase'asa gwa'aimi epes hiesi 5,000-peleis

¹⁰ Aposel alupumi Jisasi motanima mafi'i ma'ipa Jisasa amamaga maol amam manda'ana. Ea' anan nao'wam makwaha enis epes, amam atom mafe' anona taun Betsaida.

¹¹ Ea', esis amam nematawa hiesi sogawa anama napoma sagi'mana safe'. Safi'mai anan, nanda'mas nemaf bu'unai nandanifel ma esis safi'i. Ea' nawalipasa basefa epes siowis wambota Godi numafias. Ea' nanda' epes awes nanda'asi sataga bo'wes.

¹² Wambomota felefele'ma owamb alupumi ananimi 12-peleim mafi'i ma'ipana ma'i, “Ine' nesapa'as sofo'o wambel aof sape felefele'i ma sogolopa gwa'aimi sogolopa sea'oma. Dei' main, anae' afa' wapoma wafiguma epes a'agoma.”

¹³ Ea' Jisas nagwamam na'ipam na'i, “Ipe' etipa pese'as gwa'aimi.” Ea' amam ma'i, “Afa' gwa'aimi owa' hiame. Bret lagel wa'ana atona maloma agof biam ea' amama atom ma'oh. Ea' ine' na'i afa' ofe' utalai gwa'aimi ma amam nematawa isima hiesi?”

¹⁴ Amam atom hiami 5,000-peleim mape. Ea' Jisas na'ipa alupumi ananimi na'i, “Ipe' pi'ipa esis amam nematawa sope sefe' oto otowa sotagama wambotagw 50-peleis etis.”

¹⁵ Ea' manda' amam nematawa hiesi sape.

¹⁶ Ea' Jisas nafela bret anama lagel wa'ana atona naloma agof biam, naniga nati heven ilif nanifela God. Ea' nawalana naso' alupumi ananimi maso' esis amam nematawa hiesi hi'alas.

¹⁷ Sa'am elihis dondo', alupumi ananimi matatama tukwakwanimi ma'ihi maolo'wam holalef lu'wami 12-peleim si'im endilisi.

Pita nawalapa basefa Jisas na'i anan Dembinai Krais, God nandandepana nasapa'ana nafi'i

¹⁸ Anona nemaf Jisas atotona nanda' beten, alupumi ananimi mape malomana nahali'am na'i, “Esis amam nematawa sa'i ae' aman emi egafuwi?”

¹⁹ Ea' amam magwa basef na'ama ma'i, “Enis sa'i ine' Jon aman napisi'as embeli. Ea' enis sa'i ine' anona profet fowa'inai netanima nehafel wapoti', ea' enis sa'i ine' Elaija.”

²⁰ Ea' nahali'am na'i, “Dei' ipe' pa'i Ae' emi egafuwi?” Ea' Pita nagwa basef na'i, “Ine' Krais, God nandandepena nasapa'ena nafi'i.”

Jisas na'i anan nambimb noga' notanima nohafel wapoti'

²¹ Ea' Jisas na'ipam mehip na'i amam ina mi'ipasa basef amama enis epes mi'i anan Krais, owa'.

²² Ea' na'i, “Ae' ataga epen endilisiwei nambimb efa' nimanimi lu'wami ma anom agufumi dambami moloma anom dambami pris maloma anom mawalipasa mi'uli Godi nambimb mowa' alafugaha ae', mohe ega'. Ama nimeguf biam hi'ilama anona neafe'ma wanomi, God nefele etanima ehafel wapoti'.”

²³ Ea' na'ipa alupumi ananimi na'i, “Ae' efa' nimanimi anda' maol Godi sehe ega' lawag usi'inai tu'wanainai. Emi egafis si'i sila Ae', esis senda'am na'ama etin si'i Ae' la'ela'ef nimeguf danda ma sieili. Ea' sesambala ukup asasimi ma maina maol esis sa'i seanda'anai.

²⁴ Dei' main, emi egafis ukup mopoma ambagof asasimi atom, si'i sihapilam tatala'im, anona nemaf ambagof asasimi higililam. Ea' emi egafis ukup mopoma Ae' ma sesambala ambagof asasimi etap anae', anona nemaf ambagof asasimi God nofa'ami sotanimani sope andeande' la'ela'ef hihif.

²⁵ I'i emi egefis senda' maol naninani ma sefa' gwa'aimi hiahaom amamaga hiami etapami atom higilialami, esis wapoti' awes higililas selomam. Dei' amamaga amama nambimb migiambamas mi'imama? Owa'etin.

²⁶ Ae' ataga epen endilisiwei. I'i emi egafis ambagof aoma Ae' sondafa'me eloma basef Ae'ami, Ae' wapoti' ambal aona epes isima endafa'mas nemaf anama Ae' ifi'i eloma amamaga bu'wami mafifili Ae'ami, elomai mafifili howalagon Godi maloma amam ensel Godi wapoti'.

²⁷ Ae' a'ipipa endilisi, enipa paitu na'ae nambimb ina pega' ulal, ata' owa'. Enipa nambimb piti epes siowis wambota Godi numafias.”

Alop Jisasi nataga naloma howalagon lu'unai nandati na'ana

²⁸ Jisas na'ipasa basef amama ma ea', nimeguf amama 8-peleim mafe'ma ea', anan nao'wa Pita naloma Jems naloma Jon, nao'wam mondowasa' anona halaf launai ma nonda' beten.

²⁹ Anan nape nanda' beten etin, amaga ananinai nataga nandati na'ana, ea' luwaguf nalami mataga afitim endilisi howalagon.

^30-31 Ea' amam biam fowa'imi Moses naloma Elaija mataga maloma nafifili pepel ilifanai ea' maitu ma'i malomana. Amam ma'i ma nambimb Jisas nila okom Godi ma nokwaha etap anae' noga' gani Jerusalem.

³² Pita naloma alupumi biam ananimi amam naep nimanim endilisi ma'i mo'oh etin. Ea' mohafel mati nafifili Jisasi maloma amam amama biam maitu malomana.

³³ Amam biam ma'i mokwaha Jisas mefe', ea' Pita na'ipana na'i, “Dembinai, afa' wape na'ae fafas. Afa' ola' anom aolah wanom mondandaepa. Ine' anona, Moses anona, Elaija anona.” Pita ina nogawa andeande'ma na'i basef amama, owa'.

³⁴ Anan ata' na'i basef etin, anom ilagw maofenia amam ea' umbamaham.

³⁵ Ea' anona malogel na'i natagai ilagw nomon na'i, “Anama anan Nogalome ae'anai. Ae' andandepana ea'. Ipe' peme' basef ananimi.”

³⁶ Malogel anama na'i ea', amam mati Jisas atona naitu nalomam. Ea' amam malogof maso', ina ma'ipa enis epesa amamaga amama matulumi, owa'.

Jisas natofa ambal aonai nape anona aman sa'unai ambo'ona

³⁷ Naman wefilu amam makwaha halaf anama makini', ea' enis amam nematawa hiesi safi'mai Jisas eaf.

³⁸ Anona aman naitu la'afena esis na'i, “Dembinai, ae' ahali'ina mehip a'i, ine' niti nogalome ae'anai uwahipina. Ea' anan atotona.

³⁹ Anona ambal aonai nahapilana la'ifina ea' na'i mehip endilisi. Ea' naolana kwapete' endilisi, ifat nataga sisih malogel ananinai. Ambal anama nahambombaga alop ananinai endilisi, ea' ina nakwahona, owa'. Napaina la'ela'ef.

⁴⁰ Ea' ae' dei' ahali' alupumi ine'imi ma motofa ambal anama aonai nefe'. Ea' amam ina la'ifim.”

⁴¹ Ea' Jisas nagwamama basef na'ama na'i, “Ipe' amam nematawa owa' pembale'efa Ae'. Ea' opalef ipe'imi owa' mope andeande'. Nimeguf ma'um ae' ata' epe elomepa wapoti' ma efa' nimanimi ipe'imi? Ipe' fa'an pifi'mai Ae'.”

⁴² Nogalomana ata' nafi'i etin, ambal anama aonai naolana nafe' nowa etap nakoto'ana kwapete' endilisi. Ea' Jisas ninifala ambal aonai nanda' aman anama so'uso'win bo'ona ea' nase'anan notanima nafe'ma ahalomana ananinai.

⁴³ Amama atom dei' amam nematawa hiesi sati pepel lu'unai Godi gegelalasis kwapete' endilisi. Esis ata' nomonas matamea mafe'ma etina amamaga amama Jisas nanda'ami. Ea' na'ipa alupumi ananimi na'ama na'i,

Jisas na'iam bifa nambimb sahana noga'

⁴⁴ “Ipe' pembe' aligah andeande'ma basef dei' ae' a'ipipami. Ae' ataga epen endilisiwei nambimb felefele' anona aman nose'asa ae' efe'ma lagof amam naumbih ae'ami.”

⁴⁵ Alupumi Ananimi mame' basef amama ea' ina mogawa ofagema, owa'. Dei' main, mandambaho'ma amam. Ea' amam umbamahama meahali'ana ma basef amama ofagema.

Emi nape dembinai?

⁴⁶ Ea' alupumi Jisasi mandahihianamam ma'i emi nepe dembinai amamunai.

⁴⁷ Ea' Jisas nogawa nomonas amama mape opalef amamumi, ea' nasa'mai enin sa'usaw'in nafi'i naitu nalomana.

⁴⁸ Ea' na'ipam na'i, “Emi egafis sese' opalefa sigiambama enin sa'usa'win si'i ini'i ma ukup asasimi mopoma Ae', esis sase'e opalef Ae' wapoti' sagiambame. Ea' emi egafis sagiambama Ae'i, esis saso' opalef Anan nasapa'e afi'i wapoti'. Dei' main? Emi egafis sepe agof a'asi la'afena ipe' hipei, esis sape dembesi sali'ma ipe'.”

Epen owa' nofala ipe' naumbih, enin alupunai ipe'inai

⁴⁹ Ea' Jon nagwamana basef na'ama na'i, “Dembinai, afa' wati anona aman natofa ambagof awami ma agel ine'inai. Anan ina nagi'mafa. Ea' dei' wati watalagamana.”

⁵⁰ Ea' Jisas na'ipana na'i, “Ipe' ina petalagamana, owa'. Dei' main? Emi egafin ina naumbih ipe'ini, inima alupunai ipe'inai.”

Enis Samaria sili'akwa wambel sandaiwa'ma Jisas

⁵¹ Nogota God na'i nofa' Jisas nolata heven nafi'i felefele', ea' Jisas okom la'ifim na'i nefe' Jerusalem.

⁵² Ea' nasapa' anom amam mali' mofa' basef ananimi mafe'. Mafe' mawis anona wambel esis Samariai ma meandondomba amamaga ananimi.

⁵³ Ea', esis wambel anama sowa' alafugaha Jisas sandaiwa'ma sofa'ana sofe' ipat asasinai. Dei' main? Esis sogawa anan na'i nefe' Jerusalem.

⁵⁴ Ea' alupumi amama biam ananimi Jems naloma Jon mati waf anama ma'ipana ma'i, “Dembinai, ine' na'i afa' ofalai nif fandumi misila'i hevena fendo epes isima?”

⁵⁵ Ea' Jisas nandamboma ninifala amam biam.

⁵⁶ Ea' mafe' anona wambel.

Epen na'i nila Jisas

⁵⁷ Amam ata' mafe' eaf etin, anona aman na'ipana na'i, “Ae' a'i efe' elomena. Ea' ofe' etin anama hiagoma ine' na'i neafe'ma.”

⁵⁸ Ea' Jisas nagwamana na'ipana na'i, “Nombagw aolopumi ma'oh mala etap wambel amamunai. Amiguf wapoti' mufia' mafe' ilifi mala' alegah mapeih gani ilif, ea' ae' owa'etin. Ae' ataga epen endilisiwei wambel a'e ma a'oh alo balaga ae'anai.”

⁵⁹ Ea' na'ipa anona aman na'i, “Ine' nifi'i nila ae'.” Ea' anan na'i, “Ae' a'i ata' epe imafi ahalome, ata' igiambamana ma noga' ewana ma nope ea' ifi'i ilina.”

⁶⁰ Ea' Jisas na'ipana na'i, “Hapainai, sowago esis etis isima saga'i. Ea' ine' fo'o newalapa basefa epes siowis wambota Godi numafias.”

⁶¹ Ea' anona aman na'ipana na'i, “Dembinai, ae' a'i ilina. Ea' ine' ata' ni'i a'e ma ae' efe'ma esis wambota ae'anai inifelis i'i nemaf bu'unai ma esis sili'?”

⁶² Ea' Jisas na'ipana na'i, “Emi egafin nehafel nili' nenda' maol aofi ma nendamboma niti alafuga ma neakwaha maol ananinai, enin ina la'ifina nenda' maola ni'ipas siowisa wambota Godi numafias, owa'.”