Luk Nandaꞌafi 8 - Basef Buꞌwami Godi

Anowa nematawa wafe' waila Jisas

¹ Anom nimeguf mafe' ea', Jisas nafe' wambel hiagoma na'ipasa basef bu'wami amam nematawa sape taun anama wambel hiagomai. Na'ipasa basef amama bu'wami ma nambimb siowis wambota Godi numafias. Alupumi ananimi 12-peleim maloma

² anowa nematawa safe' salomana. Nematawa awama fowa' awes nanda'awa Jisas natofamawa ambagof awami nanda'awa bo'owa. Ano'w Maria sofala'w sa'i Makdalai'wi, fowa' natofama'wa ambagof awami 7-peleim mapai'wi.

³ Ea' ano'w Joana nemata'w anona aman numafi ipat Heroti, agel ananinai Susa. Ea' ano'w Susana kwaloma anowa nematawa hiawai wapoti' wafe' walomana. Awo wagiambama anan naloma alupumi ananimi ma otamba gwa'aimi maim awaumi.

Aman nowaha nalelef gwa'aimi aof

⁴ Esis amam nematawa hiesi sape safi'i taun hiagoma, safi'i sandakolas safi'mai Jisas. Ea' anan nase'asa basef hiami womun etin na'ama na'i,

⁵ “Anona aman nafe' nowaha olelemb witimi si'i rais anona aof. Nowahom nafe', anom mowa eaf safe'ma. Enis epes safe' safofo'asom ea' amiguf mufia' mafi'i ma'am.

⁶ Ea' anom mowa anagon otambaiguma. Ea' mataga ea' etap owa' embelina. Masilimb ina mowala ea' alim.

⁷ Anom mowala la'afena mandelef wandafumi mataga malomam maofenia wit, ea' amam ina mail mola gwa'aimi, owa'.

⁸ Ea' anom mowa mafe' etap bu'unai ea' mataga malo mail mola gwa'aimi. Anom mataga malo mail mola gwa'aimi hiami 100-peleim.” Jisas na'iam na'ama ma ea', na'ipas mehip na'i, “Ipe' aligah magalipei, peme'am andeande' ukup mopomam.”

Jisas na'ipasa basef amama ofagema na'ipasam womun etin

⁹ Ea' amam alupumi Jisasi mahali'anama basef ofagema womun etini.

¹⁰ Ea' nagwamama basef na'i, “God nihi'ambepa basef ofagema mape mandambahi'i ma ipe' piowis wambota Ananinai numafipa. Ea' enis epes owa'. God ina nihi'ambas basef amama ofagema, owa'. Ama esis ‘ina some' basef amama alihim, owa'. Some' basef womun etin nambimb sotologon, ea' ina siti anom amamaga, owa'. Esis some' basef, ea' ina sogawa ofagema, owa'.’ ”

Basef ofagema ma olelemb gwa'aimi

¹¹ Basef womun etini ofagema na'ama. Olelemb amama si'i basef Godi.

¹² Anom mowa eafi amama si'i epes isima same' basef, ea' Satan nafi'i nofa' basef amama God nase'esam mape opalef asasimi ma esis ina sembale'efa God nofa'as seatanimani, owa'.

¹³ Anom mowa mafe' anagon otambaiguma, amama si'i enis epes same' basef Godi ea' sofa'am mehip sandanifelamam. Ea' isima si'i masilimb ina mondala mowala etap owini. Esis sembale'am nogota bandana etin ea', Satan nagwambas sanda' waf aonai ea' satanima sakwaha sombale'efa God.

¹⁴ Anom mowala mandelef wandafumi la'afen, amama si'i epes isima same' basef sailif safe' ea', anom nimanimi mamumami maloma moni main naloma anom danifel maim etapami, amamaga amama mase'ala esis. Ea' ina sombale'efa God sanda' waf bu'unai la'ifis, owa'.

¹⁵ Ea' anom mowa etap bu'unai, si'i enis same' basef bu'wami sembale'am la'ifis. Opalef asasimi bo'om same' basef Godi sailam. Esis sape la'ifis sanda' waf bu'unai la'ela'ef, isima sape si'i olelemb mataga malo mail mola gwa'aimi andeande'i.

Nogwahis mafifili sasapa'am sambahe'am nomon ifagw

¹⁶ Epes ina sakata lamifah sopalo'am ma'oh owina baket o balata owina, owa'. Esis sawamonam balatagw ilifa epes isima suwisi siti howalagon.

¹⁷ Amamaga hiami hi'alam mape mandambahi'i anona nemaf motaga alihiguma hiesi sotolom sogawam. Ea' amamaga hiami ata' sambaho'am ma'ihi, anona nemaf motaga mondawalap, hiesi sogawam.

¹⁸ Ea' ipe' pindumafuma peme' basef andeande'. Emi egafis sembale'efa basef Godi, nambimb God nowatanimasam wapoti'. Ea' isima owa' sembale'ami, anona nemaf basef kwawie'im amama esis sombale'am, God nondalombasam esis sopen etin.”

Jisas mama'wana kwaloma owapana ananimi

¹⁹ Nemaf anama mama'wana Jisasi kwao'wa owapana safi'mai anan. Amam nematawa hiesi sandakolasi sili'akwana ea' esis ina safe' felefele'ma anan, owa'.

²⁰ Ea' enis epes sape salomanai sa'ipana sa'i, “Ine' neme', mama'wena ine'ikwi kwaloma owapena ine'imi safi'i saitu ande', sa'i solomena si'i.”

²¹ Ea' nagwamasa basef isima hiesi na'ipas na'i, “Esis amam nematawa isima some' basef Godi sailam, isima mama'we sahin owan ae'asi.”

Jisas na'ipa uf lu'unai faso'mana

²² Anona nemaf Jisas nao'wa alupumi ananimi malata anona bot. Ea' anan na'ipam na'i, “Afa' ofe' anama walemb batupa'manai gani fisana.” Ea' amam malata bot mafe'.

²³ Bot anama nafe' etin, Jisas ambeh mahana na'oh nolola. Ea' anona uf lu'unai naluwi walemb batupa'manai anama, embel kolo'walam mawis bot nomon na'i si'inama embel felefele'ma mowala.

²⁴ Ea' mafe' minimbalana ma'ipana ma'i, “Dembinai, afa' wa'i ahegililafa.” Ea' anan nohafel ninifala ufi embel. Ea' uf faso'mana, embel ina ata' manda' fepo, owa'. Tol motah.

²⁵ Ea' Jisas na'ipam na'i, “Bale'ef ipe'inai nape eti?” Amam umbamaham ukup matamea. Ea' manda'ipama ma'i, “Anan emi egafuna? Na'ipa uf naloma embel mame'ana mowala.”

Jisas nanda' anona aman ambagof awami mapeinai bo'ona

²⁶ Ea' Jisas naloma alupumi mafe' mataga anagon esis Gerasa sapoma, anama nape wa'ol walemb batupa'manai fisana etap hiagoma Galili.

²⁷ Ea' Jisas nakwaha bot nisila' nafe' akata, anona aman nape taun anamai nafi'mai anan. Anom ambagof awami mapeinai. Anan ina nowaho' anona lowaf nape andeande' anona ipat, owa'etin. Fowa' anan aona nape la'ela'ef nafi'i nafi'i nataga dei'. Nape nafe' hi'agilif atom.

^28-29 Anona ambal aonai nahapilana tatala'ina. Esis sombalo'ana sumafiana nimeguf hiami sanda' seni hankap sowa'ana lagof bo'wagah, owa'. Nahape'am etin. Ea' ambal anama aonai nofa'ana nafe' anama epes a'agoma. Aman anama nafi'i nati Jisas, nindiwa nembawa notawa felefele'ma bo'wagah ananimi. Ea' Jisas na'ipana mehip na'i, “Ine' ambal aonai, nekwaha aman anama ine' fo'o.” Ea' nofalana mehip endilisi na'i, “Jisas, ine' Nogalomana dembinai God nape ilif endilisi, ine' na'i nenda' maina ae'? Ae' a'ipina mehip, ine' owa' nese'e nimanimi ae'.”

³⁰ Ea', Jisas nahali'ana na'i, “Agel ine'inai emi?” Ea' anan na'i, “Agel ae'inai ambagof hiami.” Dei' main, ambagof awami hiami mafe' mawisana.

³¹ Ea' ambagof amama mofala Jisas mehip timbitambel ma'i, “Ina netofafa ofe' owala hul launai owa' nowala neatambili, owa'.”

³² Ea' anom bogof hiami maitu ma' gwa'aimi anona domota felefele'. Ea' ambagof awami ma'ipa Jisas mehip ma'i, “Ine' ni'i a'e ma afa' ofe' uwis bogof mamuma.” Ea' na'i aho'mam.

³³ Ambagof awami amama makwaha aman anama mawisi mafe' mawisa bogof. Ea' bogof mamuma hiami masagih mafe' mehip mowala awagoma tata, mowala embel walemb batupa'manai afum hi'alam.

³⁴ Ea' amam mumafi bogofi mati amamaga matagama bogof, masagih mafe' ma'ipasa amamaga amama amam matulumi amam nematawa sape tauni saloma sail aof felefele'i wapoti'.

³⁵ Ea' esis safe'ma sieti amamaga amama. Safi'mai Jisas sati aman anama fowa' ambagof awami mapeinai dei' makwahona ea' ambo'ona okom bu'unai napaina andeande' nowaho' lowaf tol nape felefele'ma bo'wagah Jisasi. Amam nematawa hiesi satolona ea' esis umbamahas.

³⁶ Ea' epes isima sati amamaga amama, sa'ipas sa'i waf Jisas nanda'ana aman anama fowa' ambagof awami mapeinai dei' ambo'ona wapoti'.

³⁷ Ea' epes hiesi sape anama Gerasai hiesi umbamahas endilisi. Ea' sa'ipa Jisas sa'i, “Ine' nekwaha ape' fo'o.” Ea' Jisas nalata bot anama notanima nafe'.

³⁸ Aman anama fowa' ambagof awami mapeinai nahali'ana mehip na'i, “Ae' a'i efe' elomena.” Ea' Jisas nasapa'ana na'i,

³⁹ “Ine' tanima fo'o wambel ine'inai, ni'ipasa amamaga hiami God nanda' maina ine'ami.” Ea' aman anama nafe' nawalapa basefa amamaga amama ma amam nematawa hiesi sape taun anamai amamaga Jisas nanda'manam anani.

Jisas nanda' Jairus nogamana kwaga'i kohafel wapoti' ea' nanda' ano'w nemata' awes lu'unai nanda'akwi ambo'okw

⁴⁰ Jisas notanima nafi'i, enis amam nematawa hiesi sape sohafana. Ea' sanda'mana nemaf bu'unai sandanifela ma nafi'i.

^41-42 Ea' anona aman nataga agilinama Jairus. Anan numafi ipat esis Juda sa'i basef sapeinai. Nogamana nemata'w atoto'w afagof akwa'umi 12-peleim felefele' kwa'i koga'. Ea' nindiwa nembawa notawa felefele'ma bo'wagah Jisasi, nahali'ana mehip na'i, “Ine' nifi'i ipat ae'anai.” Ea' Jisas nafe' esis amam nematawa hiesi safe' sanda' gwagwasi'ma etin saitu sindiwapana.

⁴³ Anan ata' nafe' etin, ano'w nemata'w kwafi'mai anan. Awes lu'unai nanda'akwi kwape gamba afagof 12-peleim. Otamba akwa'uimi hi'alama kwatal dokta hiami. Owa' anom la'ifima monda'akw kotaga bo'okwe, owa'etin.

⁴⁴ Ea' kwafe' felefele'ma alafuga ananinai, kwasa lagela saket Jisasi da'malifinama. Kwanda'am na'ama, mehip etin esimbel pele'atam, ea' ina ata' maluwi wapoti', owa'etin.

⁴⁵ Ea' Jisas nahali'as na'i, “Emi nasa lagela ae'?” Ea' esis hiesi sa'i etin etin sa'i, “Ae' owa'.” Ea' Pita na'i, “Dembinai, amam nematawa isima hiesi saitu sanda' gwagwasi'ma etin salomafa.”

⁴⁶ Ea' Jisas na'ipas na'i, “Ae' ame' pepel ae'anai nakwahowe nafe'ma nonda' enin epen bo'wen. Ae' egawa enin epen nasa lagel alop ae'anai.”

⁴⁷ Ea' nemata'w akwama kogawa akwa'w ina atuwasi kondambaho'w ma anan, owa'. Na'ama akwa'w umbamaha'w kwafi'i kwindiwa nembawa kotawa etap felefele'ma naep amam nematawa hiesi. Ea' kwawalapa basef ofagema akwa'umi ma dei' kwasa lagela anan ea' ambo'okw. Ea' kwa'i, “Awes ae'anai ahi'alana owa'etin.”

⁴⁸ Ea' Jisas na'ipakw na'i, “Nogame, dei' ine' nembale'efa ae' la'ifiwei. Amama atom dei' anda'ena bo'wena. Ine' fo'o opaf ine'inai nope awanena.”

⁴⁹ Anan ata' na'i etin, anona aman nakwaha ipat Jairusi nafi'i na'ipa Jairus na'ama na'i, “Nogamena ine'ikwi kwaga' ea'. Amama atom dei' ina nenda' Dembinai Tisa nofo'o ekep pehana, owa', hapainai.”

⁵⁰ Ea' Jisas name'as na'ipa Jairus na'i, “Ina umbamohena, owa'. Nembale'efa ae' la'ifiwei, ama atuwasi nogamena ine'ikwi kohafel wapoti'.”

^51-52 Ea' Jisas nafe' nataga ipat Jairusi ea' ina na'i a'e ma amam nematawa hiesi suwis ipat anama, owa'. Nao'wa Pita naloma Jon Jems atom maloma mama'wakw ahaloma'w etis safe' sawis salomana. Esis amam nematawa hiesi sape ande' salef mehip sa'i sapoma'w. Ea' Jisas na'ipas na'i, “Ipe' ina pelef, owa'. Tol pepe. Akwa'w ina kwaga' endilisi, owa'. Kwa'oh etin.”

⁵³ Ea' esis sanda'iafana kwapete'. Esis sogawa akwa'w kwaga' endilisi.

⁵⁴ Ea' Jisas nahapila lagel akwa'unai nofala'w na'i, “Sa'ukwi, ine' hafel.”

⁵⁵ Ea' ambal akwa'unai notanima nafi'i nawisa'w wapoti' kohafel mehip. Ea' Jisas na'ipa esis mamasa'w na'i, “Ipe' so'akwa anom gwa'aimi.”

⁵⁶ Ea' sati amama, gegelalasis endilisi nomonas matamea. Ea' Jisas na'ipas mehipa siela basef ananimi na'i, “Ipe' ina pi'ipa enin epena amamaga amama, owa'.”