Luk Nandaꞌafi 7 - Basef Buꞌwami Godi

Jisas nanda' aman nanda'mana maol dembinai numafi amam soldiai bo'ona

¹ Jisas na'ipasa basef amama laumi esis amam nematawa seme'am ma hi'alam, ea' nafe' nataga anona wambel Kaperneam.

² Anona aman dembinai nape. Anan kepten numafi soldia hiami 100-peleim. Anona nanda' maola anani awes nanda'ana felefele'ma neaga'. Ea' kepten okom nainailana.

³ Ea' name' basefa Jisas nasapa' anom agufumi Judai mafe' mofala Jisasa nifi'i nonda' aman anama bo'ona.

⁴ Ea' mafe' matagama Jisas ma'ipana mehip ma'i, “Kepten anama aman bu'unai, andeande'ma ine' nigiambamana nenda' aman nanda' maolananai bo'ona.

⁵ Dei' main, anan okom nainaila ape' Juda nala' ipat ape' ma'i basef mapeinai.”

⁶ Ea' Jisas nafe' nalomam nafe' nataga felefele'ma ipat ea', Kepten anama nasapa' anom alupumi mofa'ai basef ananimi mafi'i ma'ipa Jisas na'ama ma'i, “Dembinai, ine' nefo'o owa', hapaimi. Ae' ina aman bu'uwei ma ine' nefo'o niwis ipat ae'anai, owa'.

^7-8 Amama atom ae' wapoti' ina bo'owe ma efe'mago ine', owa'. Ine' ni'i etin, atuwasi anan bo'ona. Dei' main, ae' ape owina anom soldia dambami mumafi mase'e maol. Ea' ape ilifa anom soldia ae'ami imafiam. I'ipa anona i'i, ‘Ine' fo'o’, name'e nafe'. Ea' i'ipa anona i'i, ‘Ine' fi'i’, neme'e nafi'i. Ea' i'ipa anama agel a'anai nanda'me maoli i'i, ‘Ine' da'a maol anama’, anan name'e nanda'ana. Ine' dembinai. Ea' awes anama atuwasi neme' basef ine'imi nefe'. Dei' ine' ni'i etin, ea' anan ambo'ona wapoti'.”

⁹ Jisas name' basef ananimi okom natanea ea' nandamboma na'ipa amam nematawa hiesi sagi'ma anani na'i, “Ae' a'ipipa, soldia dembinai anama anan ina ipe' Israelinai. Ea' dei' nembale'efa ae'. Ina anona aman Israelinai nembale'ef na'ama, owa'etin. Anan nikila' ipe' Israela nembale'efa ae' la'ifina.”

¹⁰ Ea' amam amama kepten nasapa'am mafi'i motanima mafe' ipat mati aman anama nanda' maola kepteni ambo'ona.

Jisas nafela enin so'uso'win nataga bo'wen wapoti'

¹¹ Anom nimeguf mafe' ea', Jisas nafe' anona wambel Nain. Alupumi ananimi maloma enis amam nematawa hiesi safe' salomana.

¹² Anan nafe' felefele'ma uta sawis wambel anama, ea' nati enis sofa' enin so'uso'win naga'i safi'i sa'i sowan. So'uso'win inima mama'wan alifi'wi. Akwa'w kola enin etin, waulunama'w a' naga'. Ea' esis amam nematawa hiesi sape wambel anama safi'i salomai akwa'w.

¹³ Dembinai nati akwa'w, okom ananinai na'i uwahipi'w ea' na'ipakw na'i, “Ine' nelef owa'.”

¹⁴ Ea' anan nafe' felefele' nasa lagela bokis salanami. Ea' amam mofa'ai bokis amama maitu. Ea' Jisas na'i, “Souso'win, ine' neme'! Ae' a'ipina, ine' hafel.”

^15-16 So'uso'win inima naga' ea'i nehafel nape na'i. Ea' Jisas naso'akwan mama'wan anani'wi. Na'ama esis umbamahas endilisi safela agel Godi sa'i, “Anona aman profet dembinai nataga ea' la'afena ape'. God nafi'i ma nigiambama ape' amam nematawa ananipai.”

¹⁷ Ea' basef amama ma maol Jisasi mafe'agen hi'alagon anama etap hiagoma Judia ea' anama hiagoma wapoti'.

Jon nasapa' alupumi biam mafe'ma Jisas

¹⁸ Alupumi Joni ma'ipana amamaga amama pepel anama Jisas nanda'anai. Ea' Jon nofala alupumi biam ananimi

¹⁹ nasapa'am mafe' mahali' Dembinai Jisas ma'i, “Ine' aman ma'wina nafi'i o ata' mope mohafa anona?”

²⁰ Amam matagama Jisas ea' ma'i, “Jon napisi'as embeli nasapa' afa' biafa wafi'mai ine', anan na'i nogawa, ‘Ine' aman ma'wina nafi'i o ata' mope mohafa anona?’ ”

²¹ Nemaf anama atona Jisas nanda' amam nematawa awes naninani nanda'asi sataga bo'wes. Anan natofamasa ambagof awami mapeisi. Hiesi naep mase'asi nanda'masam mati andeande'.

²² Ea' Jisas nagwamama basef na'i, “Ipe' pitanima pefe' pi'ipa Jona amamaga amama dei' patolomi pami'ami. Isima naep mase'asi sati wapoti', bo'wagah awamisi safe' andeande'. Isima awes aonai nanda' alop asasinai nambu'wi ambo'wes, aligah mase'asi same' basef andeande', saga'i sotanima sohafel wapoti' ea' kwahusi same' basef bu'wami Godi.

²³ Emi egafis ukup etifim sombale'efa ae', isima sondanifel endilisi.”

²⁴ Amam biam mofa'ai basef Joni motanima mafe'. Ea' Jisas na'ipa esis amam nematawa ma Jon na'i, “Fowa' ipe' pafe' anona etap fatauguma wafiguma epes a'agoma pafe' pati main? Pafe'ma pati anona aman ina nembale'ef andeande' si'i anona elifita uf nefa'ana nanda' felifal? Owa'etin.

²⁵ Ea' pafe' pati main? Pafe' pati anona aman nala luwaguf bu'wami atumi? Owa'etin. Epes isima sotala amamaga bu'wami atumi ma moni hianai sala luwguf bu'wami atumi, epes isima sape ifagw bu'wami king dambami atom mapeimi.

²⁶ Dei' ipe' pafe' pati main? Pafe' pati anona aman profet? Endilisi ae' a'ipipa, anan profet dembinai nikila' profet hiami hi'alam.

²⁷ Aman anama ea' ma'una anan atona si'i basef mape Baibeli na'iama God fowa' gani na'iam na'i, ‘Ine' neme', anona nemaf ae' esapa' aman nofa' basef Ae'ami nili' nefe' nendondombamena eaf ine'inai.’

²⁸ Ae' a'ipipa endilisi. Jon dembinai nikila' amam hiami ma etap anae'. Ea' emi egafis dei' siowis wambota Godi numafias, isima dembesi sikila' Jon. Ea' emi egafis agof a'asi ma wambota Godi, esis wapoti' dei' sape dembesi sikila'ana.”

²⁹ Ea' amam mofa' takisi maloma epes hiesi same' basef Jisasi esis sa'i, “A'e, waf Godi andeande'.” Dei' main, Jon atona napisi'asi.

³⁰ Ea' amam Farisi maloma amam mawalipasa mi'uli Godi ina mofa' baptaisa Jon, owa'. Amam manda'am na'ama dei' mandamboma mowa' alafugaha eaf bu'unai God nihi'ambamanai.

³¹ Ea' Jisas na'i, “Dei' ae' indili'wifa ipe' amam nematawa dei' pape etap anae'i i'imama? Ae' i'ipipa maim basef womun etina pegawa waf ipe'inai?

³² Ipe' pape si'i enis awasi sandakolas sapoma sofala enis awasi sa'i, ‘Ape' mandanifel mufapula batagwa ipe', ea' ipe' ina palemb. Ape' manda' awalef malef matamea, ea' ipe' ina palef.’

³³ Aman anama Jon napisi'as embeli nafi'i, ina na' gwa'aimi embel wainim, owa'. Ea' pa'i ambal aonai napaina.

³⁴ Dei' ae' ataga epen endilisiwei afi'i a' gwa'aimi maloma embel wain, ea' patolowe pa'i, ‘Piti anan aman na' gwa'aimi hiami, na' embel wain hianai endilisi. Anan alupunai ma amam mefa' takisi maloma amam manda' waf aonai!’

³⁵ Ea' emi egafis sila gawa bu'unai Godi, esis isima sihi'ambapa gawa anama Godi bu'unai endilisi ma sombale'efana!”

Ano'w nemata'w kwanda' waf aonai kwakolo' sanda bo'wagah Jisasi

³⁶ Anona aman Farisi nahali' Jisasa nifi'i nea' gwa'aimi nolomana. Ea' nafe' ipat anama Farisi nalomana ma' gwa'aimi.

³⁷ Ea' ano'w nemata'w kwape taun anama kwanda' waf aonai. Akwa'w kwame' basefa Jisas na' gwa'aimi ipat anama. Ea' kofa' anona botol bu'unai si'i owap embel sanda alogw bu'wami ma'anai kwafi'i.

³⁸ Ea' kwawis kwafe' kwaitu alafuga Jisasi felefele'ma bo'wagah ananimi kwalef. Ea' embif akwa'umi maluwi mowala bo'wagah Jisasi ea' kwanda' auf balagaimi kopati' embif akwa'umi, kwape kwasisi' bo'wagah ananimi kwanda' lotumana. Ea' kwakolo' sanda anama bo'wagah ananimi.

³⁹ Ea' Farisi anama nahali' Jisas nafi'i nati amama, nomonas ananimi matamea na'i, “I'i aman anama endilisi anan profet, anan nogawa nemata'w akwama kwahapila anani, nogawa waf akwa'unai. Dei' main? Akwa'w kwanda' waf aonai.”

⁴⁰ Ea' Jisas nagwamana nomonas amama Farisi anama na'ipana na'i, “Saimon, ae' a'i i'ipina anom basef.” Ea' Saimon na'i, “Tisa, ine' walapa basef ine'imi.”

⁴¹ Ea' Jisas na'i, “Amam biam anona wiaf napoma amoma anona aman otamba hiamunai. Anona nowaola wiafa 100 kina ea' anona 10 kina atona.

⁴² Amam biam ina la'ifima meagwa wiaf anama, owa'. Ea' dei' aman anama nakwahomoma wiaf anama amam biam. Ea' amam biam nambimb emi okom ninila anan endilisi nikila' anona?”

⁴³ Ea' Saimon nagwa basef na'ama na'i, “Ae' a'i aman anama nase'ana wiaf lu'unai 100 kinai.” Ea' Jisas na'i, “Ine' nawalogam andeande'.”

⁴⁴ Ea' nandamboma nati nemata'w akwama na'ipa Saimon na'i, “Ine' niti nemata'w akwama? Ae' afi'i awis ipat ine'inai. Ine' owa' nase'e embel esa'opa bo'wagah ae'ami, owa'etin. Ea' nemata'w akwama kwasa'opa bo'wagah ae'ami ma embif maluwi naep akwa'umi. Ea' kopati'am balaga akwa'unai.

⁴⁵ Ine' owa' niesisi' ae'. Ea' do'ok ae' afi'i awis etin, akwa'w kwape kwasisi' bo'wagah ae'ami la'ela'ef kwape kwafi'i kwataga dei'.

⁴⁶ Ine' owa' neanda' wel nekolo'am ma balaga ae'anai. Ea' akwa'w kwakolo'am bo'wagah ae'ami embel sanda bu'unai.

⁴⁷ Na'ama dei' ae' a'ipina. Akwa'w okom nainaila ae' endilisi. Waf anama okom nainaila ae'anai nihi'ambapa waf aonai akwa'unai hianai ae' akwahomakwana hi'alana. Emi epen God nokwahoman waf aonai ananinai kwasala'una, epen inima enin nambimb ina okom ninila God endilisi.”

⁴⁸ Ea' Jisas na'ipakw na'i, “Ae' akwahomena waf aonai ine'inai.”

⁴⁹ Ea' amam mape ma' gwa'aimi malumanai mape ukup matamea manda'ipama ma'i, “Aman anama emi egafuna na'i la'ifina ma nokwaha waf aonai?”

⁵⁰ Ea' Jisas na'ipa nemata'w akwama na'i, “Ine' nembale'efa ae' la'ifiwei. Amama atom God nakwahomena waf aonai ine'inai nofa'ena netanimani. Ine' fo'o, ea' opaf ine'inai nope awanena.”