Luk Nandaꞌafi 6 - Basef Buꞌwami Godi

Jisas nape Dembinai ma nemaf anama Sabat esis Juda sapoma noma'wanai

¹ Anona nemaf esis Juda sapoma noma'wanai Sabat, Jisas nafe' anagon ea' nataga anona aof sawa witanai nawis. Ea' alupumi ananimi mafe' malomana, ea' magi anom wit maufi moka'isam lagof amamumi magwa'am.

² Ea' anom Farisi mahali'am ma'i, “Ina penda'am na'ama ma nemaf anae' Sabat mapoma noma'wanai, owa'. Dei' maina panda'am na'ama?”

³ Ea' Jisas nagwamam na'ipam na'i, “Ipe' pegawa basef amama ma waf fowa' gani dembinai King Devit nanda'anai. Nemaf anama Devit naloma alupumi ananimi nolomaham

⁴ anan nawis ipat lu'unai Godi nomon na' bret anama amam pris mondolali maso' Godanai. Ea' na'ana naso' alupumi ananimi wapoti' ma'ana etin. Ea' mi'uli ape'inai na'i amam pris atom mea'ana.”

⁵ Ea' Jisas na'ipam wapoti' na'i, “Ae' ataga epen endilisiwei, ape Dembiwei ma nemaf anama Sabata i'ipipa maina maol andeande'ma pila basef penda'ana nemaf anama.”

Nemaf anama Sabat esis Juda sapoma noma'wanai Jisas nanda' anona aman lagel aonainai bo'ona

⁶ Anona nemaf esis Juda sapoma noma'wanai Sabat nataga. Ea', Jisas nafe' nawis nomon ipat esis Juda sa'i basef sapeinai nape na'ipasa basef esis amam nematawa. Ea' anona aman nape nalomas, lagel da'isinai ananinai aona naga' nail.

⁷ Amam mawalipasa mi'uli Godi maloma anom Farisi ma'i mogolopa anona eafa meambaso'ma Jisasa anom basef baso'maimi ma monda'mana basef. Ea' manda'ana naep di'inde'ana. Ma'i muti anan nonda' aman anama bo'ona nemaf anama Sabat o owa'?

⁸ Ea' Jisas nogawa nomonas amamumi, na'ipa aman anama lagel aonainai na'i, “Ine' hafel nitu naep hiesi la'afena esis seatilina.” Ea' anan nohafel naitu.

⁹ Ea' Jisas na'ipam na'i, “Ae' a'i ihali'ipa ma mi'uli ape'inai na'iam na'imama? Nemaf ana'e ape' monda' waf bu'unai o monda' waf aonai? Na'i ape' migiambama epes ambal namunai napeis o mohas soga'?”

¹⁰ Ea' natologon tulif amam nematawa hiesi, na'ipa aman anama na'i, “Dowa lagel ine'inai usi'ina.” Ea' nando lagel nataga bo'ona wapoti'.

¹¹ Ea' amam Farisi maloma amam mawalipasa mi'uli Godi opalef wandafum kwapete' endilisi ma anan. Ea' manda'ipama ma'i, “Afa' nambimb onda' maina Jisas?”

Jisas nandandepa alupumi ananimi 12-peleim

¹² Anona nemaf Jisas nandowasa' nafe' halafutagw nanda' betena God. Ea' owamb anama laona anan nape nanda' beten nafe' ea' lala.

¹³ Aon natefi, anan nofala alupumi ananimi hiami mafi'i. Amam 12-peleim nandandepam Aposel.

¹⁴ Anona Saimon, ea' Jisas nanda'mana agel wa'ana Pita. Ea' Andru, owalomana Saimoni. Ea' Jems naloma Jon, Filip naloma Bartolomyu,

¹⁵ Matyu naloma Tomas ea' Jems nogalomana Alfiusi. Ea' Saimon anan epes hiesi Seloti.

¹⁶ Ea' Judas nogalomana Jemsi, naloma Judas Kariotinai, aman anama nawalapa Jisasa naumbih ananimi.

Jisas nanda' amam nematawa hiesi awes nanda'asi sataga bo'wes

¹⁷ Ea' Jisas niniala naloma alupumi ananimi mafe' anagon bembe'agoma, do'ok esis alupisi hiesi ananisi safi'i sali' saituma. Ea' epes hiesi safi'i. Enis safi'i wambel hiagoma Judia ea' enis safi'i wambel biefina Tair naloma Saidon nape felefele'ma naoh, enis safi'i Jerusalem.

¹⁸ Esis safi'i ma some' basef ananimi ma natofa awes nanda'asi. Ea' esis amam nematawa ambagof awami mahambombagasi safi'i, Jisas nanda'as bo'wes wapoti'.

¹⁹ Pepel ananinai nafe' nanda' esis hiesi bo'wes. Ea' dei' esis hiesi sa'i sombale'efana.

Jisas na'ipasa waf sealifanai ea' seandanifelonai

²⁰ Jisas nati amam alupumi ananimi na'ipam na'i, “Ipe' kwahupei otamba maim a'ipei, ipe' pawis ea' wambota Godi numafipa. Amama atom dei' ipe' pandanifel pape.

²¹ Ipe' epes nolomahipei, dei' pandanifel pape andeande'. Dei' main, anona nemaf ipe' pea' gwa'aimi elihipa endilisi. Ipe' epes opalef nimanima palef, dei' pandanifel pape andeande'. Dei' main, anona nemaf ipe' pandanifel pinda'iaf.

²² Ae' ataga epen endilisiwei. Nambimb enis epes siti ipe' pila ae', esis opalef aoma ipe' endilisi. Ea' sowa' alafugaha ipe' sese'epa agof awami endilisi si'i ipe' epes aopai sindaiwa'mepa sogalo'mepa.

²³ Nemaf anama esis sonda'epa na'ama, ipe' pendanifel pialemb etin. Dei' main, amamaga hiami bu'wami ipe'imi ma'oh heven ilif. Fowa' gani akupas bafapas asasisi sanda' amam profet aom na'ama etin.

²⁴ Ipe' otamba wiga maim hiamipei, ipe' pindumafuma ma amamaga awami nimanimi meatagamipei. Dei' main, ipe' dei' pefa'am ea' amamaga monda'epa pandanifelamami.

²⁵ Ipe' dei' pa' gwa'aimi elihipei, pindumafuma ma amamaga awami nimanimi meatagamipei. Dei' main, anona nemaf ipe' nolomehepa. Ipe' dei' panda'iafi, ipe' pindumafuma ma amamaga awami nimanimi meatagamepa. Dei' main, anona nemaf ipe' pelefa penda'aga endilisi.

²⁶ Ipe' dei' epes hiesi hi'alas safela agof ipe'mi sa'i ipe' bu'wipei, ipe' pindumafuma ma amamaga nimanimi lu'wami meatagamipei. Dei' main, fowa' akusas bafasas asasisi sa'ipam na'ama etina amam profet mambaso'mami ma'ipasa basef Godi. Sanda'mamam na'ama etin, safela agof amamumi.

Anom basefa ukup mimila epes isima naumbih

²⁷ Ea' ipe' pame' basef ae'ami, ipe' ukup mimila naumbih ipe'isi, penda'masa waf bu'unai isima opalef aoma ipe'i.

²⁸ Ipe' pihali' Goda nonda'mas waf bu'unai ma epes isima sanda'mepa waf aonai. Ea' penda' betena epes isima sanda'epa aopei.

²⁹ I'i emi egelin nehepa aomb wa'ol, pendamboma nehepa wa'ol wapoti'. I'i emi egelin nefa'epa saket ipe'inai, ina pinda'imana, owa'. Pese'ana wapoti'.

³⁰ I'i emi egefin nefalepama anom amamaga, ipe' pese'anam. Ea' i'i emi egefin nefa' amamaga ipe'imi, ipe' owa' pi'ipana mehipa negwamepam, owa'.

³¹ Maina waf ipe' pa'i esis sanda'mepana ipe'i, ipe' penda'masana na'ama etin.

³² I'i ipe' ukup mimila epes isima ukup maimaila ipe' etipa, nambimb pefa' maim amamaga bu'wami ma waf anama? Owa'etin. Epes sanda' waf aonai esis sanda'ana na'ama etin. Ukup maimaila epes isima ukup maimailasi.

³³ I'i ipe' penda' waf bu'unai ma isima sanda' waf bu'unai atona ma ipe'i, nambimb emi nefela agof ipe'imi? Owa'etin. Epes isima sanda' waf aonai esis wapoti' sanda' waf na'amainai.

³⁴ I'i ipe' pese'asa anom amamaga epes isima ipe' pegawa esis nambimb seagwamepami, anona nemaf emi nefela agof ipe'imi? Owa'etin. Epes sanda' waf aonai wapoti' sase'asa anom amamaga enis sanda' waf aonai, ma esis seatanima seafa'am na'ama etin mondagwama si'i sali' sase'asam.

³⁵ Ea' ipe' ukup mila naumbih ipe'isi, penda'mas waf bu'unai esis pese'asa amamaga. Ipe' ina ata' pi'i anona nemaf esis sogwamepam, owa'. Ipe' penda'as na'ama anona nemaf God la'ifinai nape ilifi nese'epa amamaga lu'wami bu'wami ma pepe awasi ananipei. Dei' main, anan na'i uwahipis esis isima owa' seanifelonae saloma isima sanda' waf aonai.

³⁶ Ahalomepa ipe'inai na'i uwahipis esis sanda' waf aonai. Ipe' penda'am na'ama etin si'i anan nati esis uwahipis.

Waf mowaloga enis epes si'i anona jas dembinai

³⁷ Ipe' ina pewaloga enis epes si'i anona jas dembinai nawaloga basef kot lu'unai, owa'. Ama anona nemaf God ina nowalogepa, owa'. Ipe' ina pembaso'ma enis epes, owa'. Ama anona nemaf God ina nombaso'ma ipe' wapoti', owa'. Ipe' pekwaha waf aonai enis sanda'ma ipe'anai. Ama anona nemaf God nogwam nokwaha waf aonai ipe'inai.

³⁸ Ipe' pese'asa amamaga enis epesa God nose'epa amamaga ipe'. Anona nemaf anan nose'epa amamaga hiami si'im mosaminiala ma ipe'. Ikwaf ipe' pease'asana enis epesi, ikwaf anama atona God nese'epana ipe'.”

³⁹ Ea' Jisas na'ipasa anom basef womun etin wapoti' na'i, “A'i enin epen naep mase'ani la'ifinama nihi'ambaman eaf enin epen naep mase'ani? Owa'etin. Atuwasi esis bias sondakolas dogwas sefe' sowala etin kwambiwag.

⁴⁰ Epes sanda' skul etini ina sape dambes sikila' tisa asasinai, owa'. Esis sanda' skul sambefan ea', sotaga na'ama etin si'i tisa asasinai.

⁴¹ Dei' maina ipe' pati usan sa'unai nape naep sahin owan ipe'isi, ea' ipe' owa' pegawa hapataf lu'unai nape naep ipe'imi?

⁴² Dei' maina ipe' ata' pa'ipa alupisi pa'i, ‘Owalome, ae' a'i iwafamenana usan sa'unai nape naem ine'inai.’ Ea' ine' hapataf lu'unai anama nape naep ine'imi. Ipe' malogof biamipei pambaso'mami. Ipe' ata' pili' pewafa hapataf lu'unai nape naep ipe'imi, ma piti andeande' pewafamenan usan sa'unai nape naep alupisi ipe'isi.

Lawag aonai nola gwa'aimi awami

⁴³ Lawag bu'unai ina nola gwa'aimi awami, owa'. Ea' na'ama etin lawag aonai ina nola gwa'aimi bu'wami, owa'.

⁴⁴ Ape' mati gwa'aimi mailami, mogawa lawah bu'wami awami. Ape' ina mola su'utip fik si'i ahip anona mandof higataunai, owa'. Ea' ina mola su'utip wainim anona mandof pipi'embin, amama wapoti' owa'.

⁴⁵ Epes na'ama etin. Epes bu'wasi, esis ukup bu'wami mapeis ukup asasimi sawalapa waf bu'unai. Ea' epes awasi waf hianai aonai napeis ukup asasimi. Ea' sawalapa waf aonai atona. Dei' main, waf bu'unai aonai nape si'ina ukup asasimi, anama atona dei' malogof mawalapana nawisi ande'.

Waf biefina sala' ifagw

⁴⁶ Dei' maina ipe' pa'i ae' Dembiwei, Dembiwei, ea' ipe' owa' pila malogel ae'anai?

⁴⁷ Emi egafis sifi'mai ae' sieila malogel ae'anai, dei' ae' indila'wifa waf ananinai ma ipe' pegawana.

⁴⁸ Epen inima si'i anona aman nala' ipati. Anan nandoma olalef mowala gani etap owin otamba ma'oma. Ea' nala' ipat netawa etap anama otambaiguma la'ifiguma. Ea' asaf lu'unai nalai, walemb nawisi lu'una embel kolo'walami mafe', ipat ina nandagwamba, owa'. Dei' main? Aman anama nanda'ana la'ifina.

⁴⁹ Ea' emi egefin name' basef ae'ami owa' nilam, inima si'i anona aman nala' ipat falafunai. Anan nanda'ana nala'ana etin natoma etap atona ilif. Ea' anom nimeguf mafe' ea' walembeh mawisi embel magwale'ana nowa aona hi'alana.”