Luk Nandaꞌafi 5 - Basef Buꞌwami Godi

Jisas na'ipa Saimon Pita, dei' nowafa agof hiami

¹ Anona nemaf Jisas naitu akata walemb batupa'manai lu'unai Genesaret naloma amam nematawa hiesi sala'ambemana sape same' basef Godi.

² Ea' nati bogw sa'umi biam mala embel felefele'ma nimbap walemb batupa'manai. Ea' amam mowafa agufi mandani' mafe' masa'opa anemb amamumi.

³ Ea' Jisas nalata natoma bot Saimoni ea' na'ipana na'i, “Sapa' bot nokwaha bandagoma nefe' laogoma.” Ea' Jisas natoma bot nawalipasa basef esis amam nematawa.

⁴ Anan na'ipas ea' na'ipa Saimon na'i, “Ine' sapa' bot nofo'o walemb embel laogoma ea' pekwaha anemb mowala pewafai anom agof.”

⁵ Ea' Saimon nagwa basef na'i, “Dembinai, do'ok owamb laona afa' wanda' maol lu'unai ea' ina wagi anom agof, owa'. Ea' na'ipa ae' na'ama, dei' ekwaha anemb mowala.”

⁶ Ea' mokwaha anemb mowala mowafai agof hiami. Ea' anemb ma'i pele'etama agof hiami endilisi.

⁷ Ea' amam mofalai alupumi amamumi mape anona boti mafi'i magiambama mowafai agof malam bogw biam si'ima agof ma'i mowala.

⁸ Saimon Pita nati na'ama, ea' nindiwa nembawa natawa felefele'ma bo'wagah Jisasi na'ipana na'i, “Dembinai, ine' kwaha ae', fo'o. Ae' aman aowei, anda' waf aonai!”

⁹ Dei' main, anan naloma amam malumanai mati agof mowafami umbelimi endilisi. Ea' amam gegelalasom nomonas matamea.

¹⁰ Batausana Sebedi biam Jems naloma Jon maloma Pita mandau'umai wapoti' gegelalasoma agof amama. Ea' Jisas na'ipa Saimon na'i, “Ina umbamehena, owa'. Dei' atef nesafela maolan nenda'ana la'ela'ef ni'pa enis epes sila Ae'.”

¹¹ Ea' amam manda' bogw mafe' bandagoma, makwaha amamaga amamumi hi'alam ma'oh, ea' mailana mafe'.

Jisas nanda' anona aman awes aonai nanda' alop nambu'anai ambo'ona

¹² Nogota anama Jisas nape anona taun, anona aman awesinai alop nambu'anai nape. Anan nati Jisas nafi'i, nande' nembawa natawa etap na'ipana mehip na'i, “Dembinai, i'i ine' ni'i awi, nenda' ae' etaga bo'owe.”

¹³ Ea' Jisas nasa lagel alop aman anamai na'ipana na'i, “Ae' a'i a'e ma ine' netaga bo'wena.” Ea' dei' atef awes anama aonai nakwahona ea' nataga bo'ona.

¹⁴ Ea' Jisas na'ipana basef la'ifimi na'i, “Ina nefe' ni'ipa enin epen ni'i ae' anda'ena bo'wena, owa'. Ine' fo'o nihi'ambana alop ine'inai ma aman anama pris. Ea' nese'ana amamaga amama anan nondolalima God ea' ine' ninifelona ma nataga bo'wena si'i mi'uli ananinai fowa' gani Moses na'ipasanai na'i. Ama esis hiesi sogawa ine' ambo'wena.”

¹⁵ Owa'etin. Diga basefa amamaga amama Jisas nanda'manam aman anama gatom mafe' ganigani. Fowa' ina hiesi same' basef amama, owa'. Dei' hiesi endilisi. Amama atom dei' epes hiesi safi'i ma some' anona nonda eses awes nanda'as setaga bo'wes.

¹⁶ Ea' nimeguf hiami Jisas nafe' anama wafiguma epes a'agoma ma nape nanda' beten.

Jisas nanda' anona aman lagof bo'wagah maga'anai ambo'ona

¹⁷ Anona nemaf Jisas nape nawalipa esis amam nematawa ea' anom Farisi maloma anom mawalipasa mi'uli Godi tol mape. Anom mafi'i wambel hianai etap lu'unai biefina Judia naloma Galili. Ea' anom mafi'i Jerusalem. Ea' pepel Dembinai Godi nape Jisas, ama nanda' epes awes nanda'asi sotaga bo'wes wapoti'.

¹⁸ Ea' anom amam mofa' anona aman lagof bo'wagah maga' mailanai, na'oh lehis mofa'ana mafi'i. Ea' ma'i mofa'ana mefe' muwis ipat mombe'ana felefele'ma Jisas.

¹⁹ Ea' si'igina amam nematawa hiesi. Amam ina mati anona eafa mofa' aman anama muwis nomon, owa'. Ea' malata ipat ilif mihianama bogwan ilif mala aman anama awes nanda'anai naloma lehis nowala nomon la'afena amam nematawa mambe'ana na'oh naep Jisasi.

²⁰ Nogota anama Jisas natolom nogawa amam mombale'efana la'ifinai ma niegiambama aman anama awes nanda'anai. Ea' na'ipa aman anama na'i, “Ine' epen ae'inai. Waf aonai ine' nanda'anai ae' akwahomenana ea'.”

²¹ Ea' amam mawalipasa mi'uli Godi maloma amam Farisi atom ukup atifim mandanda' ma'i, “Aman anama emi egafuna nanda' God findiwanai? Owa'etina anona aman la'ifinaima nekwaha waf aonai. God atona nakwaha waf aonai.”

²² Jisas nogawa nomonas amamumi. Ea' na'ipam na'i, “Dei' maina ukup ipe'imi mape na'ama?

²³ Dei' amamaga maim ipe' pa'i ahifima ae'? Ae' la'ifiwei ma i'ipa awes nanda'anai i'i, Ae' ekwahomena waf aonai ine' nanda'anai o i'ipana i'i, fela lehis ine'imi nehafel nefe'. Basef amama ma nefela lehis ananimi, ipe' pa'i amama ahifima ae'.

²⁴ Ea' ae' a'i ipe' pegawa ae' ataga epen endilisiwei, la'ifiwei ma ekwaha waf aonai hianai amam nematawa sape etapi sanda'anai. Ae' a'i ihi'ambepa ae' la'ifiwei ma enda' amamaga amama.” Ea' anan na'ipa aman anama awes nanda'anai na'i, “Ae' a'ipina endilisi, ine' hafel fela lehis ine'imi fa'am nefe' ipat ine'inai.”

²⁵ Jisas na'ipana etin na'ama, nohafel naitu nafela lehis ananimi naep amam nematawa hiesi. Ea' ata' nafe' etin eaf, nandanifel nafela agel Godi lu'una nafe' ipat ananinai.

²⁶ Ea' amam nematawa isima hiesi gegelalasis kwapete'as umbamahas endilisi safela agel Godi lu'una sa'i, “Dei' ape' mati anona waf dambainai fowa' owa' meatolonai.”

Jisas nofala anona aman Livai

²⁷ Amama mataga ea', Jisas nohafel nafe' nati anona aman nofa' takisi tol nape ipat sofa' takisanai, agilinama Livai. Ea' Jisas na'ipana na'i, “Ine' fi'i nila ae'.”

²⁸ Ea' nohafel nailana nafe'. Amamaga hiami ananimi nakwahom ma'oh.

²⁹ Ea' Livai nanda' anom gwa'aimi lu'wami ipat ananinai nanifela Jisas. Ea' amam hiami manda' waf aonai mofa' takisi maloma anom amam wapoti' mape ma' gwa'aimi maloma amam biam.

³⁰ Ea' anom Farisi maloma anom amam mawalipasa mi'uli Godi, amam Farisi, mape manda' megah maham ma amam alupumi Jisasi ma'i, “Dei' maina ipe' pape pa' gwa'aimi paloma amam mofa' takisi maloma amam amama manda' waf aonai? Na'ama ina andeande', hapaimi.”

³¹ Ea' Jisas nagwamam na'ipam na'i, “Isima awes a'asi ina safe'ma dokta, owa'. Esis bu'wasi. Ea' isima awes nanda'asi etis safe'ma dokta.

³² Ae' ina afi'i ma efala epes sape andeande'i somboma opalef, owa'. Ae' afi'i ma efala epes sanda' waf aonai etis somboma opalef sokwaha waf aonai sefe'ma God.”

Waf sololama gwa'aimi

³³ Ea' enis epes sa'ipa Jisas na'ama sa'i, “Alupumi Joni maloma alupumi amam Farisi ukup mapoma basef Godi. Ea' anom nimeguf wikifah hiami amam mololama gwa'aimi monda' beten etin. Ea' alupumi ine'imi owa' monda' waf anama. Amam ma' gwa'aimi embel maim nimeguf hiami.”

³⁴ Ea' nagwamas na'i basef womun etin na'i, “I'i enis sonda' anom gwa'aimi lu'wami ma enis aman nemata'w bias sondase'ama, ipe' ina la'ifipama penda' esis alupisi sondaiwa'ma gwa'aimi nemaf anama anan naso' nemata'wi nape nalomas, owa'etin.

³⁵ Ea' nemaf anama anan naso' nemata'wi nokwaha esis nafe' anagon laogoma, esis sakwaha gwa'aimi.”

³⁶ Ea' Jisas na'ipasa anom basef womun etina luwaguf na'i, “Ina andeande'ma petopa' lowaf namunai pesana neloma anona lowaf apinai, owa'. I'i enis sonda'am na'ama, lowaf ina noloma apinai na'ama etin, owa'. Namunai pele'etana etin.

³⁷ Ea' ina enin epen nakolo'wa embel wainim dambaimi agwahup apinai mafinina, si'i botowagof, owa'. I'i enin nenda'am na'ama, wain netef hiana, nohape' agwahup anama pepe'etana ea' wain kolo'olana aona hi'ilana.

³⁸ Ea' wain dambainai sakolo'wana agwahup dambainai atona.

³⁹ Ea' emi noga' wain apinai enin ina atuwasi okom ni'i wain dambainai, owa'. Enin na'i, ‘Wain apinai bu'unai nikila' dambainai.’ ”