Luk Nandaꞌafi 4 - Basef Buꞌwami Godi

Satan nagwamba Jisas anona etap wafiguma fatauguma epes a'agoma

¹ Ambal Bu'unai Godi nape si'inama Jisas ea' nakwaha walemb anama Jordan nandegiai natanima nafe'. Ea' Ambal Bu'unai Godi nofa'ana nafe' anona etap wafiguma fatauguma epes a'agoma.

² Jisas nape anama nimeguf hiami ea' Satan nafi'i nagwambana aon si'inai tu'waninai. Jisas ina na' gwa'aimi, owa'. Nolomahana.

³ Ea' Satan na'ipana na'i, “Ine' na'i ine' Nogalomana Godi, dei' kipa owap anama na'oh etapi notaga si'i bret.”

⁴ Ea' Jisas nagwamana basef na'ipana na'i, “Baibel na'i bret atona ina nose'asa ambagof namumi epes, owa'.”

⁵ Ea' Satan nao'wana mafe' anona halaf launai endilisi nihi'ambana amamaga hiami bu'wami mape etap hiagoma maloma amam nematawa. Nihi'ambana la'ifina mehip etin.

⁶ Ea' na'ipana na'i, “Amamaga hiami pepel amama amam king hi'alam mumafiami maloma epes hiesi agel lu'unai, amamaga bu'wami hiahaom maim, amamaga amama hiami God nase'eami ae'ami. Ea' dei' i'i ese'anam enin epen, ae' ese'anam.

⁷ I'i ine' nindiwa nembawa netawa nenda' lotu ma ae', amamaga amama ine'imi atom.”

⁸ Ea' Jisas nagwamana basef na'ipana na'i, “Baibel na'iam na'ama na'i, ‘Ipe' penda' lotuma Dembinai God ipe'inai atona, ea' penda' opeh ananimi atom.’ ”

⁹ Ea' Satan nao'wana nondowasa' Jerusalem nahaponana naitu ipat Godi lu'unai sanda' lotuwanai ilif. Ea' Satan na'ipana na'i, “Ine' na'i ine' Nogalomana Godi, dei' netoma nukupa' newa etap.

^10-11 Dei' main, anom basef Godi mail buk Baibeli ma'i na'ama ma'i, ‘God ni'ipa amam ensel Ananimi mifi'i muhapilina lagof amamumi mumafina ma otamba ina moha bo'wagah ine'imi, owa'.’ ”

¹² Ea' Jisas nagwamana basef na'i, “Anom basef Godi wapoti' mape na'ama ma'i, ‘Ipe' ina pegwamba Dembinai God ipe'inai nonda' waf aonai, owa'.’ ”

¹³ Satan nagwambana ma ea', nakwaha Jisas nafe' nohafana ma anona nemaf nifi'i neagwambana wapoti'.

Jisas nafela maol nanda'ana gani etap hiagoma Galili

¹⁴ Pepel Ambal Bu'unai Godi nape opaf Jisasi ea' natanima nafe' etap hiagoma Galili. Ea' same' basef gato mafe' anan mafe'agon hi'alagon wambel hiagoma Galili.

¹⁵ Anan nawalipasa basef Godi ifagw esis Juda sa'i basef sapeimi. Ea' amam nematawa hiesi safela agel ananinai lu'una.

Esis Nasaret sase'ana alafugaha Jisas

¹⁶ Ea' Jisas nafe' Nasaret taun anama ofagama, fowa' anan ata' so'uso'win napoma. Nape ea' nemaf anama Sabat esis Juda sapoma noma'wanai, nafe' nawis ipat esis Juda sa'i basef sapeinai si'i la'ela'ef nanda'am. Anan naitu natalifa basef Godi, ea' sase'ana anona pepa lounai.

¹⁷ Pepa anama anom basef Godi fowa' gani profet Aisaia nanda'am mailanai. Anan naofa pepa anama nati anom basef natalifam ma'i na'ama ma'i,

¹⁸ “Ambal bu'unai Dembinai nape ae'. Ea' nandandepe ma eawalapa basef bu'wami ma epes isima kwahusi amamaga a'ami. Nasapa'e afi'i ma ewalapa basef na'ama i'i, ‘Ipe' panda' kalabusi pekwaha kalabus pefe' wafifipa. Ipe' epes naep masi'ipei, ipe' piti andeande' wapoti'. Anan nasapa'e afi'i iegiambama isima sofa' nimanimi seape andeande'.

¹⁹ Ea' i'ipasa basef hiesi ma nogota anama bu'unai ma Dembinai niti uwahipis nigiambamas seape andeande'.’ ”

²⁰ Ea' Jisas nambomefa pepa anama nase'anana anona aman numafi ipati ea' anan nape. Ea' amam nematawa hiesi sape nomoni sati anan atona.

²¹ Ea' na'ipas na'i, “Ipe' pame' ae' atalifa basef Godi fowa'imi etin ea', dei' mataga alihim endilisi mandawalapa ae'.”

²² Ea' esis hiesi safela agel ananinai lu'una sa'i anan aman bu'unai ea' gegelalasisa basef bu'wami mataga malogel ananinai. Ea' esis sandahali'ma sa'i, “Aman anama Josep nogalomana?”

²³ Ea' Jisas na'ipas na'ama na'i, “Endilisi etis ipe' nambimb penda' basef amama womun etina ae' pi'i, ‘Dokta, ine' nenda' alop ine'inai notaga bo'ona nili', ea' pi'i wapoti' pi'i waf anama nali' nanda'ana Kaperneam, anama ape' mame'ana ea'. Ine' dei' nenda'ana notaga na'ae wambel ofagama ine'ima.’ ”

²⁴ Ea' anan na'iam na'ama wapoti' na'i, “Ae' a'ipipa endilisi! Anona profet epes ina sase'ana opalef same' basef ananimi wambel ofagama ananima, owa'.

²⁵ Ae' a'ipipa endilisi. Nogota anama fowa' gani Elaija napenai owaf atona naluwi, asaf ina ata' nalai afagof wanom aomb wanemb wanemb, owa'etin. Ea' nolomahas lu'unai nataga ganima hiagoma. Nogota anama nematawa hiawai Israeliwai amam maga' mialifawa wapen.

²⁶ Ea' God ina nasapa' Elaija nafe'ma anowa awamai, owa'etin. Anan nasapa'ana nafe'ma ano'w nemata'w kwape Serafat, wambel nape anona etap lu'wagoma Saidon. Ea' akwama ato'w.

²⁷ Ea' nogota anama anona awes aonai nataga nanda' alop esis amam nematawa Israeli alop pambo'. Ea' ina enin epen asasini nataga bo'wen, owa'etin. Anona aman Naman Siriainai ea' anan atona nataga bo'ona.”

²⁸ Ea' esis hiesi sape ipat anama same' basef amama, nomonas wandafum kwapete'a Jisas.

²⁹ Ea' sohafel sagalo'mana nawisi taun ande'. Taun anama asasinai natoma halafuta ilif. Ea' sofa'ana safe' halafuta anama sa'i sogwale'ana nowala tata.

³⁰ Ea' anan nisila' esis hiesi nafe'.

Jisas natofa ambagof awami mape anona amani ambo'ona

³¹ Ea' Jisas niliana Kaperneam anona taun nape etap hiagoma Galili. Anan nape ea' nemaf anama Juda sapoma noma'wanai sa'i Sabat, anan nawis nomon ipat esis Juda sa'i basef sapeinai nawalipasa basef Godi.

³² Same'ana sa'i anan nofa' agel lu'unai dei' na'ipasa basef la'ifimi. Ea' sohafel gegelalasis kwapete'as endilisi.

³³ Anona aman ambafuh manda'anai nape ipat anama, ambal aonai napaina. Anan na'i mehip endilisi na'iam na'i,

³⁴ “E! Jisas ine' Nasaretinai, na'i nifi'i nenda' maina ape'? Ine' nafi'i ma nehambombagapa? Ae' egawa ine' nogalomana God bu'winai andeande'.”

³⁵ Ea' Jisas ninifalona na'ama na'i, “Ine' aonai awinai sopama malogel kwaha aman anama.” Ea' ambalip anama nakwahona nowa etap la'afena esis hiesi nawisi nafe', ina ata' nahambombagana wapoti', owa'etin.

³⁶ Esis hiesi gegelalasis sandakoto'ma sanda'ipama sa'i, “Amama maim basef? Anan natofa ambagof awami na'ipam si'i anona aman la'ifinai nofa' agel lu'unai. Ambagof awami mame' basefa anan, makwahona mafa' mafe'.”

³⁷ Ea' basef amama nanda' amamaga amama la'ifimi mafe'agon hi'alagon wambel nape felefele'i.

Jisas nanda' Saimon Pita nandagi'mokwi ambo'okw

³⁸ Saimon nandagi'mokwi awesi'w alop ako'unai nifina kwapete'. Ea' Jisas nohafel nakwaha ipat anama sanda' kolasanai, nafe' nawis ipat Saimoni. Ea' sahali'ana ma niegiambama'w.

³⁹ Ea' anan nafe' naitu felefele'ma akwa'w natofa awes anama nafe' nakwaha akwa'w. Ea' kohafel mehip kwanda'masa gwa'aimi esis.

Jisas nanda' amam nematawa hiesi sataga bo'wes

⁴⁰ Aon newala naso', esis amam nematawa sofa'ai enis awes naninani nanda'asi sofa'as safi'mai Jisas. Ea' nasa lagofas atona etin nanda'as bo'wes hi'alas.

⁴¹ Ea' ambagof awami hiami makwaha esis hiesi mawisi mafe' ea'. Ambagof amama awami mofalana mehip ma'i, “Ine' nogalomana Godi.” Amam mogawa anan Krais, God nandandepana nasapa'ana nafi'i. Ea' Jisas ninifalom na'i ina ata' mi'i anom basef, owa'. Mosopama malogof.

Jisas nawalapa basef Godi taun hianai

⁴² Kuhimbita atona Jisas nakwaha wambel anama nafe' anagon wafiguma fetauguma epes a'agoma. Esis safe' sogolopana satolona safe'ma anan. Esis sa'i anan ina nokwaha esis nofe', owa'. Sa'i sembalo'ana nope la'ela'ef nolomas.

⁴³ Ea', na'ipas na'i, “Ae' a'i ewalapa basef bu'wami ma epes siowis wambota Godi numafias. A'i ewalapa basef amama anagon taun hianai wapoti'. Dei' main, God nasapa'e afi'i enda' maol anama atona.”

⁴⁴ Ea' nafe' nawalapa basef Godi ifagw esis Juda sai basef sapeimi nawalapam nafe' etap hiagoma Judia.