Luk Nandaꞌafi 3 - Basef Buꞌwami Godi

Jon napisi'as embeli nandondomba eaf Jisasi

¹ Anona afagel anona gavman dembinai esis Romi Taiberius Sisar nape dembinai ma etap hiagoma esis Romi afagof 14-peleim hi'alama anona afagel wapoti', nafe'ma 15-peleim, Pontius Pailat ata' nape dembinai gavmana etap hiagoma Ituria naloma Trakonitis wambel hiagoma Herot ata' nape dembinai numafi wambel hianai etap hiagoma Galili. Ea' Lisanias nape dembinai gavman numafi wambel hiagoma etap hiagoma Abilene.

² Ea' afagel anama atona Anas naloma Kaiafas amam biam pris dambami mape mali'ma pris hiami. Nogota anama ma afagel anama basef Godi mafi'mai Jon, Sekaraia nogalomana nape anona etap wafiguma fatauguma.

³ Ea' nafe' anama hiagoma walemb Jordan na'ipasa basef Godi amam nematawa. Na'ipasa somboma opalef sowa' alafugaha waf aonai sofa' baptais ma God nokwahomasa waf aonai esis sanda'anai.

⁴ Anon nawalapa basef amama Godi si'i profet Aisaia fowa' gani nawalapam nanda'am mail buk Baibeli ma'i, “Anona etap wafiguma fatauguma, malogel anona amani anona nemaf noga ni'i, ‘Pendondomba eaf Dembinai, penda' ana nefe' usi'ina.

⁵ Pewam gambiwah asiasinuguma ma si'igin dondo' etin, petopa' halalef laumi bandami hiami ma mowala dondo'am. Dilindila'ma penda'agon usi'igin. Ea' ufiawa amama manda' lotasila'ma sonda'am andeande'.

⁶ Ea' amam nematawa hiesi hi'ilas anona nemaf siti God nagiambama enis amam nematawa nofa'as sotanimani.’ ”

⁷ Hiesi amam nematawa safi'mai Jon ama sa'i nupisi'as embel. Ea' na'ipas na'i, “Ipe' panda' waf aonai, si'i awasi iguf awami molaipei. Emi na'ipipa ma pa'i pefa' pefe' pindihi'ama okom wandafunai Godi anona nemaf na'i neatagama ipe'i?

⁸ Ea' dei' a'ipipa. Penda' waf bu'unai ma pihi'ambas ipe' pamboma opalef endilisi paila waf bu'unai. Ipe' ina ukup mondanda' mi'i, ‘Abraham anan ahalomapa ape'inai’, owa', hapaimi. Ae' a'ipipa endilisi, God anan la'ifinai ma nonda' otamba amama motaga epes si'i awasi Abrahami.

⁹ Tamia'w nandandombol na'oh neatopa' lawah ofagem nombalefima. Maim lawah owa' mil mola su'utip bu'wami, amama anona nemaf solam sokwahom mefe'ma nif.”

¹⁰ Anan na'iam ea', esis hiesi sahali'ana sa'i, “Ape' nambimb monda' main?”

¹¹ Ea' Jon na'ipas na'ama na'i, “Emi epen siaogw biam atumi nese'anana anona enin siot a'ani, ea' emi gwa'aimi ma'omani inima nenda'am newalogam wapoti'.”

¹² Ea' anom amam mofa' takisi mafi'mai Jon ma'i nupisi'am embel ea' mahali'ana ma'i, “Dembinai, nambimb afa' onda' main?”

¹³ Ea' anan na'ipam na'i, “Ipe' pefa' otamba mondahama si'i gavman na'ipipam. Ipe' ina pefa' anom wapoti', owa'.”

¹⁴ Ea' anom soldia mafi'i mahali'ana ma'i, “Afa' nambimb onda' main?” Anan nagwamam na'ipam na'i, “Ipe' ina pembaso'ma epes piumbelis penda'as umbamohas penda'mas basef pelela'epasa moni asasinai, owa'. Ea' opalef ipe'imi mope awanema otamba ipe'imi dondo'ma ikwaf amam dambami mandandepami.”

¹⁵ Ea' dei' nomonas esis amam nematawai hiesi mohafel la'ifim, ea' ukup mandanda'ma Jon sa'i, “Jon anan Krais, ma'una God nandandepana nasapa'ana nafi'i?”

¹⁶ Ea' Jon nagwamasa basef na'ipas na'i, “Ae' apisi'ipa embel atom. Ea' anona aman nambimb niefi'i, anan la'ifinai nikila' ae'. Ae' ina aman bu'uwei ma eatagaha mandelefa su ananimi, owa'etin. Nambimb anan nese'epa Ambal Bu'unai Godi nope opalef ipe'imi nomon ea' nese'epa nif wapoti'.

¹⁷ Anan nahapila anona savol lagof ananimi ma niesimba wit si'i rais amama nisimba'am andeande'. Nefa' wit bu'unai nuwis nembe'am ipat ananinai. Ea' tukwakwanimi awami nembefam nofam nif amama lu'wami fandom la'ela'ef mapani.”

¹⁸ Ea' Jon nawalapa anom basef hiami wapoti' ma neafela ukup asasimi ma sonda' waf bu'unai. Ea' nawalipasa basef bu'wami Godi.

Herot nanda' kalabusima Jon

¹⁹ Ea' Jon na'ipana basef la'ifimi aman anama Herot, gavman dembinai asasinai, ma waf aonai hianai anan nanda'anai. Anan nandalombana Herodias nemata'w sahalomana nase'akwi, ea' nanda' waf aonai hianai wapoti'.

²⁰ Dei' nowatani anona waf aonai wapoti' ma nanda' Jon nanda' kalabus.

Jon napisi' Jisas embel

²¹ Jon napisi'a amam nematawa hiesi ma ea', napisi' Jisas wapoti'. Jisas nofa' baptais ea', anan ata' nanda' beten etin ea', heven uta nandausi'.

²² Ea' Ambal Bu'unai Godi nisila'i si'i amil mai'una nufia' nisilamanai. Ea' anona malogel na'i natagai heven ilif na'i anom basef na'i, “Ine' Nogalome ae'inai. Ae' okom nohafel nainailina endilisi. Okom ae'inai bo'ona ma ine'.”

Agofa epes hiesi bafapana Jisasi

²³ Nemaf anama Jisas nasefela opeh nanda'am, afagof ananimi mataga felefele'ma 30-peleim. Esis amam nematawa ukup mandanda' etin ma'i anan nogalomana Josepi.

²⁴ Bafapana Jisasi agufuma amama. Josep, anan Heli nogalomana. Ea' Heli, Matat nogalomana. Ea' Matat, Livai nogalomana. Livai, Melki nogalomana. Melki, Janai nogalomana. Ea' Janai, Josep nogalomana.

²⁵ Josep, Matatias nogalomana. Matatias, Emon nogalomana. Emon, Nahum nogalomana. Ea' Nahum, Esli nogalomana. Ea' Esli, Nagai nogalomana.

²⁶ Nagai, Mat nogalomana. Mat, Matatias nogalomana. Ea' Matatias, Semen nogalomana. Ea' Semen, Josek nogalomana. Josek, Joda nogalomana.

²⁷ Joda, Joanan nogalomana. Joanan, Resa nogalomana. Resa, Serubabel nogalomana. Serubabel, Sealtiel nogalomana. Sealtiel, Neri nogalomana.

²⁸ Neri, Melki nogalomana. Melki, Adi nogalomana. Adi, Kosam nogalomana. Kosam, Elmadam nogalomana. Elmadam, Er nogalomana.

²⁹ Er, Josua nogalomana. Ea' Josua, Elieser nogalomana. Ea' Elieser, Jehoram nogalomana. Jehoram, Matat nogalomana. Ea' Matat, Livai nogalomana.

³⁰ Livai, Simeon nogalomana. Ea' Simeon, Juda nogalomana. Juda, Josep nogalomana. Ea' Josep, Jonam nogalomana. Jonam, Eliakim nogalomana.

³¹ Eliakim, Melea nogalomana. Melea, Mena nogalomana. Mena, Matata nogalomana. Matata, Natan nogalomana. Natan, Devit nogalomana.

³² Devit, Jesi nogalomana. Jesi, Obet nogalomana. Obet, Boas nogalomana. Boas, Salmon nogalomana. Salmon, Nason nogalomana.

³³ Nason, Aminadap nogalomana. Aminadap, anan Atmin nogalomana. Atmin, Arni nogalomana. Arni anan Hesron nogalomana. Hesron, Peres nogalomana. Peres, Juda nogalomana.

³⁴ Ea' Juda anan Jekop nogalomana. Jekop anan Aisak nogalomana. Aisak, Abraham nogalomana. Abraham, Tera nogalomana. Tera, Nahor nogalomana.

³⁵ Nahor, Seruk nogalomana. Seruk, Reu nogalomana. Reu, Pelek nogalomana. Pelek, Eber nogalomana. Eber anan Sela nogalomana.

³⁶ Sela anan Kenan nogalomana. Kenan, Arpaksat nogalomana. Arpaksat, Siem nogalomana. Siem, Noa nogalomana. Noa, Lamek nogalomana.

³⁷ Lamek, Metusela nogalomana. Ea' Metusela, Enok nogalomana. Enok, Jaret nogalomana. Jaret, Mahalalel nogalomana. Mahalalel, Kenan nogalomana.

³⁸ Kenan, Enos nogalomana. Enos, Set nogalomana. Set, Adam nogalomana. Adam, God nogalomana. Bafapana Jisasi ea' ma'um.