Luk Nandaꞌafi 24 - Basef Buꞌwami Godi

Jisas nohafel wapoti'

¹ Wafilu nemaf anama Sande nali'ma wik, kuhimbita atona awau ohafel wafe' hi'agif. Agufuwama awama. Maria Makdalai'wi kwaloma ano'w awau agel atona Maria mama'wana Jemsi waloma Joana ea' waloma anowa wapoti'. Ea' ofa' wel maim alogw bu'wami ma'ami awau wali' wandondombami, ofa'am wafe' hi'agif.

² Ea' watologon, wati owap anama ina ata' nape nowalo uta, owa'. Enin epen nafe' nawisana nafe' na'oh wa'ol.

³ Wawis nomon ea' awau ina wati alop Dembinai Jisasi, owa'etin.

⁴ Ea' awau ukup matamea mafe'ma amama. Ea' mehip wati anom amam biam mataga felefele'ma awou. Luwaguf amamumi membal endilisi.

⁵ Ea' awau umbamahawa endilisi windiwa balagah wati etap. Ea' amam ma'ipawa ma'i, “Ipe' pafi'i pagolopa aman anama ambal napeinai ma na'ae epes saga'i ma main?

⁶ Anan ina ata' nape na'ae, owa'. Ea' nohafel ea'! Ipe' ukup mopoma basef amama fowa' nali' na'ipipemi. Nemaf anama ata' nape nalomepa ganima etap hiagoma Galili na'ipipa na'i,

⁷ ‘Ae' ataga epen endilisiwei. Esis nambimb sese'e efe'ma amam manda' waf aonai, munde lawag usu'inai tu'wanainai. Ma nimeguf biam hi'ilam, anona nemaf wapoti' etanima ehafel.’ ”

⁸ Ea' awau ukup mandanda'ma basef amama fowa' na'iami.

⁹ Ea' wakwaha hi'agif otanima wafe' wa'ipa amam alupumi ananimi 11-peleim maloma enis alupusi hiesi ananisi wapoti' ma amamaga amama.

¹⁰ Nematawa awama wanowa Maria Makdalai'wi kwaloma Joana kwaloma ano'w Maria Jems mama'wana. Awau wape waloma anowa nematawa wa'ipa amam Aposel 11-peleim.

¹¹ Ea' amam ma'i awau wambaso'mam wa'i basef atom wafimi. Owa' meme'awai.

¹² Ea' Pita nohafel nasagih nafe' hi'agif natambe' nati nomon ea', nati luwaguf mowa'anami atom ma'oh. Ea' notanima nafe' ipat okom ananinai nataneama amamaga amama matagai.

Anom amam biam mati Jisas eaf nafe' Emeusi

¹³ Nemaf anama atona anom amam biam alupumi Jisasi mohafel mafe' anona wambel sa'unai felefele' agilinama Emeus. Eaf anama nakwaha Jerusalem nafe' Emeusi kilomita 11-peleina.

¹⁴ Amam mafe' ea' manifa amamaga amama dei' matagai.

¹⁵ Amam ma'iam mandahahali'mam mafe', ea' Jisas atona nataga felefele' nafe' nalomam.

¹⁶ Ea' naep amamumi walufum, ina mati Jisas mogawana, owa'.

¹⁷ Ea' na'ipam na'i, “Ipe' bipa pa'i main pafe'?” Nahali'am na'ama, ukup amamumi aom maitu.

¹⁸ Ea' anona amam biam Kliopas nahali'ana na'i, “Epes hiesi sape Jerusalemi sati amamaga amama mataga nemaf anae' sogawam. Ea' ine' etina owa' negawai.”

¹⁹ Anan na'iam na'ama, Jisas nahali'am na'i, “Main de'im?” Ea' ma'ipana ma'i, “Amamaga amama matagama Jisas Nasaretinai. Anan dembinai profet na'ipa esis amam nematawa basef bu'wami. Anan la'ifinai ma nawalipasa basef amama nanda' maol la'ifinai ma naep Godi naloma epes wapoti'.

²⁰ Ea' amam pris dambami maloma agufumi ape'imi mase'ana nafe'ma amam gavman dambami. Ea' amam gavman manda'mana basef mohana naga'. Ea' maundana lawag usi'inai tu'wanainai.

²¹ Ea' fowa' afa' ukup ma'i endilisi wa'i, ‘Aman anama notagaha ape' Israel meape wafifipa.’ Ea' anom basef wapoti'. Amamaga amama mataga ea' nemaf dei'inai nafe'ma wanifi.

²² Dei' anowa nematawa afa'iwai wanda'afa gegelalasofa kwapete'afa. Kuhimbita atona ohafel wafe' hi'agif,

²³ ea' awo ina wati Jisas, owa'etin. Ea' otanima wafi'i wa'iam wa'i, ‘Afa' wati anom ensel si'i wa'oh wandanda'ah watolom ma'ipafa ma'i.” Anan nohafel nape namunai.” ’

²⁴ Ea' anom amam afa'imi mafe' hi'agif mati amamaga na'ama etin si'i awau wa'iam. Ea' anan ina matolona, owa'.”

²⁵ Ea' Jisas na'ipam na'i, “Ipe' bipa nomonas a'ipei. Ukup ipe'imi ea' mase'epa, ina pembale'a basef hiami amam profeti, owa'.

²⁶ Krais anan ata' nili' nofa' nimanimi ea' nigi' nofa' pepel howalagon ananinai nigi'.”

²⁷ Ea' nali' nasefela basef hiami Baibelimi amam profet maloma Moses manda'ami nawalipamam. Na'ipam basef amama hiami ma'i anan nawalipamam ofagema hi'alam.

²⁸ Ea' amam mafe' mataga felefele'ma wambel anama ma'i meafe'ma. Ea' Jisas na'i ata' nefe' etin,

²⁹ ea' ma'ipana ma'i, “Ine' nepe nelomafa. Aon nowala felefele'ma owamb.” Ea' nawis nape nalomam.

³⁰ Amam ma'i mea' gwa'aimi, anan nape nalomam nafela bret nanifela God nawalona nase'amana.

³¹ Anan nanda'am na'ama ma amam ea' naep amamumi pele'atam dei' mogawana. Ea' nohafel nafe' nakwaha amam matimana owa'.

³² Ea' ma'i, “Afa' wafi'i eaf ukup afa'imi ea' mohafel endilisi ma anan nawalapa basef mape Baibeli na'ipafam nogota anama.”

³³ Amam ma'iam na'ama ea', dei' atef mohafel motanima mafe' Jerusalem. Ea' mati alupumi 11-peleim Jisasi maloma enis alupusi amamisi sandatama sape.

³⁴ Ea' sa'ipa amam biam sa'i, “Endilisi etis Dembinai notanima nohafel! Saimon natolona ea'.”

³⁵ Ea' amam biam ma'ipasa amamaga amama do'ok matolom eafi. Ma'ipasam ma'i, “Anan nalomafa wape nawala bret watolona ea' ogawana.”

Esis alupusi Jisasi satolona

³⁶ Esis ata' sa'i basef amama atom, Jisas naitu la'afena esis na'ipas na'i, “Ae' a'i opalef ipe'imi mope awanem.”

³⁷ Ea' satolona sohafel gegelalasis kwapete' umbamahas. Esis sa'i sati anona gamba.

³⁸ Ea' na'ipas na'i, “Ipe' gegelalasipa kwapete'epa ma main? Dei' maina ukup ipe'imi matamea?

³⁹ Ipe' piti lagufi bo'wagah ae'ami. Ae' atowe ea' ma'uwi ape si'iwi. Ipe' pesa lagofa ae' peme'e. Gambefah ina alop naloma bihitagof mapeis si'i pati mape alop ae'anai, owa'.”

⁴⁰ Anan na'iam na'ama ma ea', nihi'ambasa lagofi bo'wagah ananimi.

⁴¹ Ea' sandanifela sati anan. Ea' esis gegelalasis kwapete' ukup matamea, owa' ata' seambale'efanai. Ea' nahali'as na'i, “Ipe' anom gwa'aimi o owa'?”

⁴² Ea' sase'ana anona aol tu'waninai saofanai.

⁴³ Nandalombasana na'ana ama naep asasimi.

⁴⁴ Ea' na'ipas na'i, “Fowa' ae' ata' ape alomepa, a'ipipa ea' ma basef hiami mail buk Baibeli ma mi'uli God fowa' gani naso' Mosesanai. Buk anama amam profeti maloma Buk Songi, basef amama hiami ma'i ae'. Basef amama hiemi dei' mataga endilisi mandawalap alihim.”

⁴⁵ Anan nihi'ambas andeande'ma ukup asasimi ma segawa basef mail Buk Baibeli.

⁴⁶ Ea' na'ipas na'i, “Fowa' gani amam manda' basef amama mail buk Baibeli ma'i Krais nefa' nimanimi sohana noga' ma nimeguf bi'am hi'ilam anona neafe'ma wanomi, notanima nohafel hi'agif wapoti'.

⁴⁷ Ama agel ananinai anona nemaf alupusi ananisi sili' sowalapa basef Jerusalem ea' si'ipasam amam nematawa hiesi hi'ilas sape wambel hiagomai ma seamboma opalefa God nokwahomasa waf aonai esis sanda'anai.

⁴⁸ Ipe' pati amamaga amama matagamai ma nambimb pi'ipa amam nematawa hiesi.

⁴⁹ Ipe' peme! Anom amamaga la'ifimi fowa' Ahalome na'iam endilisi na'i niesi'ipami felefele' miefi'imipei. Ipe' pepe la'ela'ef taun anama pefe'ma petaga nemaf anama la'ifimi amama misila'i heven ilifi meafi'mai ipe'.”

God nofa' Jisas nalata heven ilif

⁵⁰ Jisas nao'wa esis amam nematawa hiesi safe' sataga felefele'ma Betani ea' nasa'ma lagof malata nofalo'masa nonda'as la'ifis.

⁵¹ Anan ata' nofalo'mas etin, God nagiana nakwaha esis nalata heven ilif.

⁵² Ea' sanifelana sanda' lotumana ea' sandanifel endilisi sotanima safe' Jerusalem sandanifel la'ela'ef sape.

⁵³ Ea' la'ela'ef sape ipat lu'unai Godi sanda' lotuwanai safela agel ananinai lu'una endilisi.