Luk Nandaꞌafi 2 - Basef Buꞌwami Godi

Maria kola Jisas

¹ Anona nemaf anona aman gavman dembinai esis Romi Sisar Ogastus nape, nanda' anona mi'uli gavmani na'ama. Anan na'i nofa' agofa esis amam nematawa hiesi sape etap hiagoma esis Rom sumafiagoma mil buk gavmani.

² Nemaf anama dambadamba anan nali' nofa' agof. Nemaf anama anona aman Kwirinius nape gavman dembinai ma etap hiagoma Siria.

³ Ea' amam nematawa hiesi safe' wambel ofagama asasima ma sonda' agof asasimi.

⁴ Josep anan aman wambota Deviti. Ea' nakwaha Nasaret nape etap hiagoma Galili, nondowasa' nafe' wambel Deviti Betlehem. Wambel anama nape etap hiagoma Judia.

⁵ Ea' Josep nafe' naloma ano'w nemata'w Maria, esis sandandepana'w sa'i nese'akw ma esis bias sonda' agof asasimi. Ea' akwa'w opafu'w.

⁶ Esis bias ata' sapani etin wambel Betlehem, nemaf akwa'w kolanefi a' nataga.

⁷ Ea' kwali' kola awani aman ako'uni nali'i. Ipat sa'ohanai asi'ina. Ea' dei' kowa'ana lowaf kwalana nomon bokis gwa'aimi bulmakauwi malama.

Amam ensel ma'ipa amam mumafi sipsipi

⁸ Felefele'ma wambel anama anom amam mumafi sipsipi mape wa'ol mumafi sipsip mape owamb.

⁹ Ea' anona ensel nafi'i nalumai howalogon Dembinai, howalama amam ea' umbamaham endilisi.

¹⁰ Ea' ensel anama na'ipam na'i, “Ipe' ina umbamohepa, owa'. Peme', ae' ifa'mipei basef bu'wami ipe', amama monda' amam nematawa hiesi hi'ilas sondanifal endilisi.

¹¹ Dei' nemaf anae' ano'w nemata'w kwape Betlehem wambel Deviti kola enin awani aman. Anan aman anama nokwahomepa waf aonai nofa'epa peatanimani. Anan Krais, God nandandepana nasapa'ana nafi'i, anan Dembinai.

¹² Ipe' pefe' piti awani inima pegawan na'ama. Piti sanda' lowaf so'unai sowa'ana salana na'oh bokis isima sala gwa'aimi bulmakauwi malami.”

¹³ Ensel anama na'ias na'ama ma ea', mehip anom ensel hiami si'i ami misila'i gani heven mataga maloma ensel anama ea' mandagala mafela agel Godi ma'i,

¹⁴ “Ape' mafela agel God nape gani ilif endilisi lu'una. Pepel howalogon ananinai atona. Ea' epes emi sape etapi God okom bo'ona ma esis, opalef asasimi mope awanem.”

Amam mumafi sipsipi mafe' mati Jisas

¹⁵ Ea' amam ensel makwaha amam mumafi sipsipi motanima malata heven. Ea' amam mumafi sipsipi manda'ipama etin ma'i, “Wale, ata' ofe' Betlehem uti amamaga anama Dembinai nihi'ambafami.”

¹⁶ Ea' mohafel mehip mafe' mati Maria kwaloma Josep sape. Awani salana na'oh bokis nomon sala gwa'aimi bulmakauwi malami.

¹⁷ Amam matolona ea' mawalapa basef ensel na'ipamami ma awani inima.

¹⁸ Ea' amam nematawa same' basef amama amam ma'iami, esis hiesi same' basef amama gegelalasis ea' nomonas matamea.

¹⁹ Ea' Maria kwame' basef amama hiami okokomam mape okom akwa'unai.

²⁰ Ea' amam amama motanima mafe' mafela agel Godi lu'una ma'i anan dembinai bu'unai. Amam mandanifela amamaga amama hiami mame'am matulumi mataga si'i ensel na'ipamami.

Esis sanda'mana agel Jisas

²¹ Nemaf nafe'ma 8i nataga, nemaf anama amam ma'i motopa'mana alop awani. Ea' matopa'mana alop awani inima amani. Ea' sofalana agel Jisas si'i ensel nali' na'ipakwanai nogota anama owa' ata' kofa' opaf.

Simeon naloma Ana sati Jisas ipat lu'unai Godi nomon

²² Nemaf anama nataga ea' ma esis sonda' awani inima noloma mama'wana sondolali sonda' ofa setaga bo'wes si'i basef mail mi'uli anama fowa' God naso' Mosesanai na'iam. Ea' esis mamasana sao'wana safe' sondowasa' Jerusalema sose'ana awani inima Dembinai Goda naep ananimi.

²³ Esis sanda'am na'ama si'i basef mape buk Baibeli ma'iama mi'uli Dembinai ma'i, “Awasi amam wali' dambadamba olami, amama ipe' pefalam pi'i amam dembinai Godi atom.”

²⁴ Ea' bias sa'i sondolalima God sila basef mail mi'uli anama Dembinai fowa' gani na'ipa Moses na'i, “Esis bias sofa' amiguf mai'unamb biam, o sofa' ambegof sa'umi biam.” Ea' sefa'am sanda'am na'ama.

^25-26 Ea' anona aman nape Jerusalemi agilinama Simeon. Anan naila waf bu'unai Godi andeande'. Anan nape nahafa nogota anama God nifi'i nigiambama esis Israel nokwaha waf aonai esis sanda'anai. Ea' ambal bu'unai Godi nape okom ananinai nihi'ambana anan ina nambimb noga' ulal, owa'. Anan ata' nepe niti Krais, Dembinai nandandepana nosapa'ana nafi'i.

²⁷ Ambal Bu'unai Godi nafelana nafe' nawis ipat lu'unai Godi. Ea' esis mamasana Jisasi sao'wana safi'i sandolalimana si'i mi'uli Godi na'iam.

²⁸ Ea' sanda'am etin, Simeon nandalombasana lagof ananimi nanifela God nafela agel ananinai lu'una na'iam na'ama na'i,

²⁹ “Dembinai, nahapila pepel hianai ae' anda' opeha ine'. Dei' ine' nenda' opaf ae'anai nupe awanena ea' ega' efo'o si'i basef endilisi atomi fowa' gani na'iami.

³⁰ Naep ae'ami atilin ea' awani aman inima ine' nasapa'ana nafi'i nofa'apa meatanimani. Na'ama dei' ine' nekwaha ae' ega' efo'o.

³¹ Ine' nanda' awani inima natagama amam nematawa hiesi satolona ea'.

³² So'uso'win inima si'i anona howalagon howalama epes isima sololama Godi nihi'ambas. Ama nonda' amam nematawa ine'isi Israel sofa' agof lu'wami.”

³³ Ea' mamasana Jisasi gegelalasis ukup asasimi matamea ma basef amama Simeon na'iami.

³⁴ Ea' Simeon na'ipasa basef bu'wami nanda'as la'ifis ea' na'ipa mama'wana Jisasi na'ama na'i, “Ine' neme'. Awani inima God nandandepan ea' ma nahambombaga enis amam nematawa Israel sowa' alafugaha enini. Ea' enis epes nofa'as sokwaha waf aonai siefi'mai enin. Enin si'i anona ikwaf God nanda'anai ma enis epes hiesi sosambala basef ananimi sondaiwa'mana.

³⁵ Awani inima napoma newalapa nomonas hiami mape mandambahi'i motaga alihim. Maria, ine' nambimb okom nimanina si'i anona bainat hi'alinai notopa' okom ine'inai.”

³⁶ Ea' ano'w nemata'w profet agili'wa Ana kwape kwalomas. Ahaloma'w ako'unai Fanuel. Wambota lu'unai akunama'wi Asa. Akwa'w ahage'w endilisi. Fowa' kwase' aman kwalomana sape afagof 7-peleim.

³⁷ Ea' waulunama'w naga'. Ea' kwape etin, kwafe' kwafe' dei' afagof akwa'umi mataga 84-peleim. Akwa'w ina kwakwaha ipat lu'unai Godi anom nimeguf, owa'etin. Akwa'w kololama gwa'aimi kwape kwanda' beten ea' kwanda' lotu kwahapila opeh Godi kwanda'am kwafe' owamb alip.

³⁸ Nemaf anama dei' atef akwa'w kwafi'i anama Simeon naloma Josep Maria saituma kwanifela God. Enis wapoti' saitu na'ama sape sehafa nemaf anama nambimb God nigiambama esis sape Jerusalemi nofa'as setanimani seape wafifis. Ea' akwa'w wapoti' kwa'ipasa basefa so'uso'win inima.

Josep nao'was satanima safe' Nasaret

³⁹ Esis Josep naloma Maria sanda'am sailam ea' opeh ahalomana si'i Dembinai fowa' gani na'iama mi'uli ananinai ea' satanima safe' Nasaret asasima ofagama etap hiagoma Galili.

⁴⁰ Ea' so'usowin Jisas nataga dambena la'ifina ma gawa hianai. Ea' God okom nainailana nagiambamana etin nanda'ana la'ifina.

Jisas ata' sa'ona nape ipat lu'unai Godi

⁴¹ Afagof danda mamasana Jisasi sondowasa' safe' Jerusalema sanda' gwa'aimi lu'wami sofalam sa'i Pasova.

⁴² Afagof Jisasi dei' mataga 12-peleim mahape'ana ea' sao'wana sondowasa' Jerusalem saila waf asasinai si'i afagof danda sanda'anai.

⁴³ Ama nimeguf amama Pasovaimi hi'alam, esis mamasana satanima safe'. Ea' sa'usa'win ina nafe' nalomas, owa'. Sakwahona napani Jerusalem. Esis ina sagawa anan napani, owa'.

⁴⁴ Sa'i nali' nafe' naloma enis epes safe'. Esis safe' anona nemaf si'ina hi'alana, ea' sagolopana la'afena esis wambota atona saloma esis alupisi.

⁴⁵ Esis mamasana sagolopana sati owa'etin, ea' satanima safe' Jerusalem sagolopana.

⁴⁶ Esis bias sagolopana safe' nimeguf wanom. Ea' satolona nape nomon ipat lu'unai Godi. Anan nape naloma amam Juda gawaimi mawalipasa mi'uli Godi. Nape nagahembe'ma basef amomumi ea' nahali' amam.

⁴⁷ Amam dambami maloma esis hiesi same' basef ananimi, gegelalasoma basef maloma gawa ananinai nagwamama basef amam.

⁴⁸ Ea' mamasana satolona nape la'afena amam dembemi nalomam mape ea' gegelalasam kwapete'. Ea' mama'wana kwa'ipana kwa'i, “Nogalome, dei' maina ine' nanda' na'ama ma afa'? Ahalomena naloma ae' opalef afa'imi nimanim endilisi ma wagolopena.”

⁴⁹ Ea' anan nagwamas na'ipas na'i, “Dei' maina ipe' bipa pagolope pafe' hi'alagon? Ae' dei' ape anda' opeh ipat Ahalome Godi, amama ipe' pegawam o owa'?”

⁵⁰ Ea' esis ina sogawa basef anan na'ipasami ofagema, owa'.

⁵¹ Ea' Jisas nafe' naloma esis bias safe' Nasaret, name' esis naila abasef asasimi nimeguf hiami. Ea' mama'wana anani'wi okom napoma basef hiami ma amamaga amama matagama sa'usa'win akwa'uni nape okom akwa'unai.

⁵² Jisas ea' nataga dambena. Ea' gawa ananinai nataga lu'una andeande' bo'ona, ea' God naloma epes wapoti' satolona ambo'ona endilisi.