Luk Nandaꞌafi 1 - Basef Buꞌwami Godi

Basef amama Luk nanda'ami mafe'mago Tiofilus

¹ O dembinai Tiofilus, fowa' amam hiami manda' basef hiami mail buk ma amamaga hiami God nanda'am mataga la'afena afa'i.

² Fowa' dambadamba Jisas nafela opeh nanda'am ea' amam dambadamba mali' mati amamaga amama naep amamumi dei' mawalipafa basef amama ea' afa' wanda'am mail buk.

³ Ae' dambadamba ali' ahali' enisa basef amama afi'i afi'i dei' egawam andeande' si'i fowa' mataga, anom amam mihi'ambamam dei' ae' egawa basef amama ofagema. Amama atom dei' ae' elagen andeande'ma enda' anom basef mefe'mago ine', dembinai Tiofilus.

⁴ Anda'ama ine' neagawa andeande' basef amama ofagema esis sawalipanami endilisimi atom.

Ensel na'ipa Sekaraia ma waulu'mana kola Jon

⁵ Nemaf anama anona king Herot dembinai gavamani numafi etap hiagoma Judia, anona aman pris nape, agilinama Sekaraia. Anan wambota Abiya, anan aman dembinai fowa'inai. Sekaraia waulu'mana Elisabet. Akwa'w kwataga wambota Aroni.

⁶ Esis bias Sakaraia Elisabet sape bo'wes ma naep Godi saila mi'uli ananinai hianai hi'alana. Ea' saila basef Godi andeande' basef ofagema a'as.

⁷ Ea' Elisabet asa'w ea' esis bias awasi a'as, ahages ea'.

⁸ Nogota anama amam hiami wambota Sakaraiai nemaf amamunai nataga ma meanda' maol Godi, ea' Sekaraia nawis ipat lu'unai Godi nanda' maol nondolalima God.

⁹ Amam maila waf amamunai mandandepana ma niowis ipat anama nomon nofa' amamaga amama nogoh alogw bu'wami ma'ami.

¹⁰ Nogota anama anan nawis naofa amamaga, esis amam nematawa hiesi sanda' lotuwi sandatama sape sanda' beten ande'.

¹¹ Ea' Sekaraia nati anona ensel dembinai Godi nataga naitu balata wa'ol lagel da'isinai. Balata anama amam pris mondolalima Goda amamaga amama alogw bu'wami ma'ami.

¹² Ea' Sekaraia natolona gegelalasana ombamahana nomonas matamea ma ensel anama.

¹³ Ea' ensel anama na'ipana na'ama na'i, “Sekaraia, ina umba mohena, owa'. God name'enama beten ine'inai ea'. Waulu'mina ine'ikwi Elisabet nambimb kola enin awani aman ine'inai. Ea' ine' nefalana agel ananinai Jon.

¹⁴ Okom ine'inai nambimb nope andeande' nendanifela awani inima. Ea' esis amam nematawa hiesi wapoti' sondanifa so'uso'uni inima netaga.

¹⁵ Dei' main, enin anona nemaf netaga dambeni nefa' agel lu'unai ma naep Dembinai. Enin ina nea' embel wainim moloma embel la'ifimi, owa'. Enin ata' nape opaf mama'wanai, Ambal Bu'unai Godi napaina si'ina nonda'ana la'ifina.

¹⁶ Anona nemaf enin netaga damben nomboma amam nematawa hiesi Israeli ma nefa'as sotanimani seafe'ma God Dembinai asasinai.

¹⁷ Enin nili' nefe'ma Dembinai nefa' pepel Godi ma neanda' maol ananinai si'i fowa' Elaija nofa'ana nanda'anai. Ea' nomboma opalef ahapasi mefe'ma awasi ma esis ukup mi'imi'ias. Ea' nomboma epes isima sosambala basef Godi ma sofa' nomonas bu'wami ma niegiambamas nonda'as sondandombam seapoma Dembinai neafi'i.”

¹⁸ Ea' Sekaraia nahali' ensel anama na'i, “Ae' atuwasi iti maina ikwafa eagawa basef amama meataga endilisi? Ae' hagewe ea' waulu'mi wapoti' ea' hage'w.”

¹⁹ Ea' ensel nagwamana basef na'i, “Ae' Gebriel, aitu naep Godi. Anan atona nasapa'e afi'i a'ipina basef amama bu'wami.

²⁰ Ine' name'am etin, ine' owa' nembale'a basef ae'ami. Na'ama etin dei' malogel ine'inai nese'ena, ina nambimb ni'i, owa'etin. Ea' nefe' nefe' neatagama amamaga amama ae' a'ipinami meatagamena. Basef amama ae'ami nambimb meataga na'ama etin anona nemaf God na'ianai.”

²¹ Ea' esis amam nematawa hiesi sape sohafa Sekaraia ande' ukup matamea sa'i, “Main natagamana nape nogota laona ipat lu'unai Godi nomon?”

²² Anan nawisi ande', ina na'i anom basefa esis, owa'. Na'ama esis sogawana sa'i anan nati anom amamaga mandati na'ami ipat lu'unai Godi nomon. Ea' anan nape nanda'masa lagel atona na'ipasa amamaga, ea' malogel ananinai nase'ana nape.

²³ Maol Sakaraiai hi'alana, notanima nafe' wambel ananinai.

²⁴ Anan nape anom nimeguf, waulu'mana anani'wi Elisabet a' opafu'w. Ea' kwandambaho' etin kwape ipat aomb wanemb biamb kwa'i na'ama kwa'i,

²⁵ “Dei' Dembinai okom na'ina'i ae' ma nagiambame na'ama. Fowa' ae' asawe, ambal ae'anai aona ma esis amam nematawa ea' dei' owa'etin.”

Anona ensel na'ipa Maria ma kola Jisas

²⁶ Elisabet opafu'wa aomb wanemb biamb ea', dei' anona aon wapoti' wanemb wanemb. Dei' God nasapa' ensel anama Gebriel nafe' anona wambel Nasaret nape etap hiagoma Galili.

^27-28 Wambel anama ano'w nemata'w awiawai'wi kwape, agel akwa'unai Maria. Ina dei' kwase' anona aman, ata' owa'. Dei' sandandepa'wa kweaso' anona aman agilinama Josep. Anan nataga wambota anama akunamana king Deviti. Ea' ensel anama nafe'ma akwa'w na'i, “Nemaf bu'wafi, nemata'w. Dembinai God okom na'ina'i ine' endilisi. Anan nofalo'mena nape nalomena la'ela'ef numafina.”

²⁹ Maria kwame' basef amama okom akwa'unai a' nimanina endilisi. Okom akwa'unai natanea na'i, “Basef amama ofagema mataga mi'imama?”

³⁰ Ea' ensel anama na'ipa'w na'i, “Maria, ina ombamohena, owa'. Okom Godi bo'onama ine'.

^31-32 Ine' neme'. Nambimb ine' opafina nela enin awani aman. Ea' nenda'mana agel Jisas. Anona nemaf anan nope aman dembinai, sefela agel ananinai lu'una. Ea' sofala Anan nogalomana God nape ilifi. Anona nemaf dembinai God nenda' awani inima nofa' agel lu'unai nepe dembinai king si'i fowa' gani Devit nape king. Devit anan wambota anama dei' awani inima neataganai.

³³ Anona nemaf enin nepe dembinai king numafi epes hiesi Jekopi la'ela'ef. Enin etin nepe dembeni la'ela'ef ma amamaga hiami moloma epes ananisi.”

³⁴ Ea' Maria kwa'ipa ensel anama kwa'i, “Amama meataga mi'imama? Ae' ina dei' aso' anona aman, ata' owa'etin.”

³⁵ Ea' ensel anama nagwama'wa basef na'i, “Ambal Bu'unai Godi nifi'mai ine', pepel God nape ilifi nose'alina. Ea' dei' awani inima nambimb nelani enin bo'wen. Ea' esis nambimb sefela agel ananinai lu'una sofalana si'i Anan Nogalomana Godi.

³⁶ Neme', amani'mina ine'ikwi Elisabet akwa'w hage'w ea', dei' ea' opafu'w. Fowa' esis sa'i, ‘Akwa'w asa'w, ea' dei' akwa'w opafu'w aomb wanemb wanemb akwa'umi mafe' ea'.

³⁷ Owa' anom amamaga ahifima God nonda'am, owa'etin.”

³⁸ Ea' Maria kwagwamana basef kwa'i, “Ae' ape anda' maol Dembinai. Ae' a'i Anan nonda'meam motaga si'i ine' na'i.” Ensel anama na'ipakw na'ama ma ea', nakwaho'w nafe'.

Maria kwafe' kwati Elisabet

³⁹ Nemaf anama Maria kohafel mehip kondondomba amamaga kondowasa' anona wambel nape halafutagw anona etap hiagoma Judia,

⁴⁰ kwafe' kwawis ipat Sakaraiai kwanda'makwa nemaf bu'wafi Elisabet.

⁴¹ Elisabet kwame' Maria ata' kwanda'makwa gude etin, awani Elisabeti fete' etin nape opaf akwa'unai nomon. Ea' Ambal Bu'unai Godi si'inama akwa'w,

⁴² koga kwa'i mehip kwa'i, “God nofalo'mena nanda'ena nandanifel endilisi. Danifel ine'inai nikila' danifel anowa nematawa ofa'anai. Ea' awani inima nambimb nelan, enin wapoti' God nofalo'mana nonda'ana nondanifel.

⁴³ Ae' gegelalasowe ma God okom bo'oma ae' nanda'e endanifel ma nanda' ine' mama'wana Dembinai ae'anai nafi'mai ae'.

⁴⁴ Neme', aligah ae'ami ata' mame' nemaf bu'wafi ine'inai atona, batawin nape opaf ae'anai nendanifel fete' etin nape.

⁴⁵ Ine' nandanifel endilisi, nembale'efa basef Dembinai na'ipinami nambimb meataga na'ama etin si'i anan nali' na'ipina.”

Awaf Maria kwanda'anai

⁴⁶ Ea' Maria kwanda' anona awaf kwa'i, “Ae' a'i basefa Anan Dembinai afela agel ananinai lu'una. Okom ae'anai napoma basef amama,

⁴⁷ God nofa'e etanimani. Dei' andanifel ma anan.

⁴⁸ Dei' main? Ae' nemata'w anda' maol Ananinai, ae' falafuwei, ea' anan okom napoma ae' nagiambame. Ipe' peme'. Dei' epe anona nemaf owagama wapoti' epes hiesi sigi' seatagai la'ela'ef sehafel seapani sofale si'i, ‘Dembinai God nagiambame nase'e danifel.’

⁴⁹ Dei' main, God la'ifinai endilisi nanda'me amamaga pepel ma ae' eafela agel ananinai lu'una nape andeande' la'ela'ef.

⁵⁰ Okom dahowinai ananinai nape la'ela'ef ma emi egafis umbamahasa sa'i sila Anan. Ea' nape la'ela'ef naloma epes isima sope na'ama etin dei' awasi bafasas ehasas anona nemaf seatagai.

⁵¹ Lagel ananinai nanda' amamaga la'ifimi. Ea' ukup asasimi ma'i esis etis sofa' agof lu'wami ea' nali'amonas safe' gani gani hiagoma.

⁵² Anan natalogofa amam king dambami ea' nafela agofa isima sape owina enis epes.

⁵³ Anan nase'asa amamaga bu'wami ma isima nolomahasa waf bu'unai, ea' epes isima amamaga hiamisi, natofam mafe' etin.

^54-55 Anan okom napoma basef na'aim ananimi endilisimi la'ela'ef mope owagama gani. Amama fowa' gani na'iam naloma bafapapa akupapa. Basef amama fowa' gani na'ipa Abraham naloma wambota ananinai owagama sigi' setagai. Ama anona nemaf neati esis uwahipisa niegiambamas la'ela'ef. Anan nagiambama ape' Israel manda' maol Ananinai.”

⁵⁶ Maria kwape kwaloma Elisabet aomb wanemb, ea' kotanima kwafe' wambel akwa'unai.

Elisabet kola Jon napisi'as embeli

⁵⁷ Nemaf anama nataga ea' Elisabet kola so'uso'win aman.

⁵⁸ Esis wambel atona saloma esis wambota akwa'unai seme' basef ma Dembinai nati owahipi'w endilisi ma kola awani inima. Ea' esis sandanifel saloma'w.

⁵⁹ Nimeguf 7-peleim mafe' mali'mana ea', nemaf nafe'ma 8i, esis safi'i sa'i seatopa'mana alop ananinai, ea' sa'i sofalana agel Sekaraia si'i ahalomana.

⁶⁰ Ea' mama'wana kwa'i, “Owa'. Ape' monda'mana anona agel Jon.”

⁶¹ Ea' esis sa'ipakw sa'i, “Owa', esis wambota ine'inai tagasi ina enis sanda' agel anama Jon, owa'etin.”

⁶² Ea' sanda' lagof atom sahali' ahalomana sa'i anan ni'i nonda'mana maina agel.

⁶³ Ea' Anan nanda' logel atona na'ipas sofa'ai anota selet ma nonda' agel nogalomanai. Ea' nanda'ana na'i, “Agel ananinai Jon.” Ea' esis gegelalasis kwapete'.

⁶⁴ Anan ata' nanda' agel etin, noga na'i malogel ananinai, afega ananinai neawi andeande', nandanifel nafela agel Godi lu'una.

⁶⁵ Ea' esis hiesi wambel anama umbamahas. Ea' dei' amamaga amama gatom mafe' wambel hi'agoma nape halafutagw etap hi'agoma Judia.

⁶⁶ Ea' amam nematawa hiesi same' basefa amamaga amama, ukup asasimi matamea mafe' sa'i, “Anona nemaf awani inima nepe ni'imama?” Dei' main, esis sogawa pepel la'ifinai Dembinai nape nalomana.

Basef Sakaraiai

⁶⁷ Awani inima Jon ahalomana Sekaraia, Ambal Bu'unai Godi nape si'ina anan ea' nawalapa basef Godi si'i amam profet fowa' gani mawalipasam na'i,

⁶⁸ “Ae' a'i ape' mofela agel Godi Dembinai lu'una, God ape' Israeli. Anan nafi'i nagiambama ape' amam nematawa ananipai. Ea' natagahepa makwaha waf aonai ape' manda'anai.

⁶⁹ Ea' nandandepa anona aman la'ifinai nambimb nofa'apa nokwahamapa waf aonai meatanimani. Fowa' gani Devit nanda' opeh Godi, ea' dei' aman anama nofa'apa motanimani, anan akunamana Deviti.

⁷⁰ Basef amama si'i fowa' gani nawalapama amam profet bu'wami ananimi ma'iam malogof amamumi.

⁷¹ Ma'i anona nemaf anan nofa'apa meatanimani mokwaha lagof esis naumbih ape'isi soloma epes isima ukup aom endilisi ma ape'i.

⁷² Fowa' gani anan na'i anona nemaf nieti akusapa ape'isi fowa'isi uwahipis nigiambamas. Ea' anan okom nopoma basef bu'wami fowa' gani na'iam endilisi mope owagama gani.

⁷³ Anan na'i basef amama endilisimi atom na'iam la'ifimi gani ilif naloma akunamapa ape'inai Abraham.

⁷⁴ Ma anan na'i notagahepa ma lagof esis naumbih ape'isi ma meanda'mana opeh ananimi, ina umbamohapa, owa'.

⁷⁵ Anan na'i basef amama ma ape' mope etap anae' monda' opeh ananimi nimeguf hiami danda mefe' mefe' meatagama meaga'. Ma naep ananimi monda' opeh amama ma waf ananinai bu'unai andeande'.

⁷⁶ Ea' ine', awani ae'inai, basef ine'imi amama. Anona nemaf sofalena profet nanda' opeha God pepel hianainai. Dei' main, nambimb ine' nefe' nili'ma Dembinai nenda'mana eaf ananinai.

⁷⁷ Ama neawalipa amam nematawa ananisi seagawa anan nefa'as seatanimani. Ama neakwaha waf aonai asasinai.

⁷⁸ God ape'inai nati esis uwahipis endilisi dei' nakwahamasa waf aonai asasinai. Anan nambimb nosapa'i howalagon mape heveni mifi'mai ape' molomapa mope la'ela'ef.

⁷⁹ Ama howalama epes sape akoti, ea' isima ga' na'i neatagamasi. Ama nenindina ape' ma meape eaf opalef awanami.”

⁸⁰ Anom nimeguf mafe' ea', awani inima nataga damben la'ifina ea' okom ananinai negawa. Anan nape etap wafiguma epes a'agoma nape nape ma nemaf anama nataga nandawalap alihinama naep esis Israeli.