Kolosi 4 - Basef Buꞌwami Godi

¹ Ipe' agufipei ma esis agof a'asi sanda' maolanipei, ipe' penda' waf bu'unai andeande'ma esis. Ipe' pegawa Dembinai ipe'inai nape otaga ilif.

Waf sanda' betenanai naloma waf seafe' andeande'

² Ipe' penda' beten la'ela'ef. Beten ipe'inai, ipe' ukup bo'om pepe andeande' pinifela God.

³ Ipe' penda' beten pihali' Goda nagiambamafa wapoti' na'ama. Anan nusi'amafa uta afa' ma owalapa basef Ananimi. Ama awalapa basef amama Krais fowa' mape mandambahi'i. Amama atom dei' ae' ape kalabus.

⁴ Ipe' penda' betena nambimb ae' ewalapa basef amama mandambahi'i motaga alihim si'i okom Godi na'i ae' enda'am.

⁵ Esis sape ande'ma Kraisi, ipe' ukup mope andeande'ma fe' pe ki ipe'inai. Maim nimeguf eaf nogal ipe' pi'ipasa basef Kraisi, pi'ipasam.

⁶ Basef ipe'imi la'ela'ef motaga bo'oma pegwa basefa epes hiesi dende'ma amamaga maim ukup asasimi mapomami.

Pol nasapa' Tikikus naloma Onesimus mafe'ma esis Kolosi

⁷ Tikikus anan sahalomapa ape'inai endilisi ae' okom nainailana. Anan nanda' maol Dembinai andeande', ae' alomana wandao'oma wanda'anai. Anan nambimb nefe'mago ipe' nowalapa basef ni'ipipama ae' dei' ape a'imama.

⁸ Ae' a'i esapa'ana nefe'mago ipe' ma pegawa afa' wape wa'imama ma nonda'epa petaga la'ifipa opalef ipe'imi.

⁹ Anan no'wa Onesimus mefe'mago ipe', anan owalomapa nombale'efanai afa' ukup maimailanai nanda' maol Godi andeande'. Anan nape wambota ipe'inai. Nambimb amam biam mi'ipipago amamaga hiami mataga na'ae.

Pol nasapa'i danifel ma nemaf bu'unai ma esis Kolosi

¹⁰ Aristarkus anan nanda' kalabus nalome, anan wapoti' na'iago nemaf bu'unai ma ipe'. Ea' Mak wapoti', Barnabas taganamana nanda'mepago nemaf bu'unai ma ipe' wapoti'. I'i netagama ipe', pe'wanago si'i ae' a'ipipago.

¹¹ Ea' Jisas agel wa'ana Jastus, anan wapoti' nanda'mepago nemaf bu'unai ipe'. Ama epes hiesi Juda, amam atom manda' maol malome ma wihi'amba hiesi siowis wambota Godi numafias. Amam magiambame ma maol anama.

¹² Epafras anan nandanifel nanda'mepago nemaf bu'unai ipe'. Anan wapoti' wambota ipe'inai, nanda' maol Krais Jisasi nape owina anan. La'ela'ef nanda' beten la'ifinai ma ipe'. Anan nanda' betena God nonda' ipe' pitu la'ifipa si'i epes dembipei pegawa God andeande' ma pembale'ef la'ifipa pila okom Godi la'ela'ef.

¹³ Ae' atowe egawa Epafras, na'ama dei' awalapana a'i anan nanda' maol lu'unai endilisi ma nagiambama ipe' paloma esis amam nematawa wambel anama biefina Laodisia naloma Hierapolis.

¹⁴ Luk anan dokta epen ape'inai ukup maimailanai, anan naloma Demas amam manda'ago nemaf bu'unai ma ipe'.

¹⁵ Ipe' pese'aso danifel ma nemaf bu'unai ae'anai ma esis alupusi sape Laodisia. Ea' penda'masago nemaf bu'unai ma Nimfa kolomago esis Kristen sios sandatama etifigin ipat akwa'unai.

¹⁶ Ipe' pitalifa pas amama ea'pesapa'am mefe'mago esis Kristen sios sape Laodisia, ma esis wapoti' satolom sogawam. Ea' pas amama ae' asapa'am mafe'ma esis Laodisia wapoti', amama ipe' petolom pi'iam.

¹⁷ Ea' ipe' pi'ipago Arkipus na'ama pi'i, “Ine' nimafi maol anama nefa'ana ma Dembinai andeande' nimbefana.”

¹⁸ Dei' ae' Pol ahapila pen lagel ae'anai atona anda'mepago basef amama bandami atom. Dei' anda'mepago nemaf bu'unai ipe' hipei. Ipe' ukup mopoma ae' amam mowa'e sen ata' ape kalabus la'ela'ef. Ae' a'i okom lu'unai Godi nigiambamago ipe' na'a numafipago nope nolomago ipe'. Ea' ma'um.