Jon Nandaꞌafi 15 - Basef Buꞌwami Godi

Jisas anan si'i lawag wain si'ina endilisi

¹ Ae' si'i lawag wain si'ina endilisi. Ahalome ae'anai Anan si'i ofagenama aofi. Aof anama sawa lawah su'utip wainim gwa'aimi mailami.

² Agof hiami su'utip owa' mielami, amama Ahalome natopa'am nakwahom. Ea' anom agof mail mola gwa'aimi amama anan nandombasom natopa'am bandam ama nambimb mope bo'om mil mola gwa'aimi hiami andeande'.

³ Basef amama Ae' a'ipipami monda'epa pataga bo'wepa ea'.

⁴ Ipe' pepe ae' ea' ae' nambimb epe ipe'. I'i agof atom wafim, ina mola gwa'aimi, owa'. I'i agof owa' mondala la'ifim lawag si'ina, amam ina molo andeande', mil mola gwa'aimi, owa'. Ea' na'ama etin si'i ipe'. I'i ipe' owa' pepe peloma ae', ipe' wapoti' ina pela anom gwa'aimi, owa'etin.

⁵ Ae' si'i lawag si'ina, ipe' si'i agof. Emi egafis sope Ae' ma Ae' ape esis, nambimb sola gwa'aimi hiami. I'i ipe' pekwaha Ae', ipe' etipa ina nambimb penda' anom amamaga, owa'.

⁶ Emi egafis owa' seape ae'i, esis sogalo'mas si'i satopa' agof alimi. Ama satamam saofam nif fandom hi'alam.

⁷ I'i ipe' pepe ae' ma basef ae'ami mope nomona ipe', ipe' pihali' ae' ma maim basef pendahama ukup ipe'imi ma'iam, anona nemaf amamaga amama motagamepa na'ama etin.

⁸ I'i ipe' pela gwa'aimi hiami, Ahalome ae'anai nofa' agel lu'unai. Ama pihi'amba amam nematawa hiesi ipe' pepe alupipei Ae'ipei.

⁹ Ahalome okom nainaila Ae', ea' na'ama etin Ae' okom nainaila ipe'. Ipe' la'ela'ef pepe okom ae'anai la'afena pegawa okom ae'anai nainailipa endilisi.

¹⁰ I'i ipe' pila mi'uli ae'anai andeande', nambimb pepe okom ae'anai nomon si'i ae' aila mi'uli Ahalome andeande'ma ape okom ananinai nomon.

¹¹ Ae' a'ipipa basef amama ma a'i danifel anama ae'anai nepe nelomepa ea' danifel ipe'inai nepe opalef ipe'imi si'im.

¹² Mi'uli ae'anai anama. Ipe' ukup mimila sahin owan ipe'isi atona etin si'i ae' okom nainailipa.

¹³ Emi egafis ukup mimila alupisi ma sokwaha ambagof asasimi atom soga', ma sigiambama alupisi asasisi, waf anama nikila' waf bu'unai hianai.

¹⁴ I'i pila mi'uli a'ipipanai andeande' ipe' alupipei ae'ipei.

¹⁵ Epen agel a'ani dembinai ananinai ina na'ipana basef alihima maol anan nienda'anai, owa'. Ea' ae' a'ipipa basef hiami Ahalome ae'anai na'ipiami. Na'ama dei' ae' ina efalepa epes falafipei agof a'ipei, owa'. Ae' efalepa alupipei endililsi.

¹⁶ Ipe' ina pali' pesaho' ae' ipe'iwei, owa'. Ae' ali' andandepepa ea' ae'ipei. Ea' anda'epa panda' opeh bu'wami. Ama pefe' penda' opeh bu'wami si'i lawah mola gwa'aimi ma opeh bu'wami ipe'imi mope andeande'. Penda'am na'ama ma i'i ipe' penda' beten pihali' Ahalome ma anom amamaga agel ae'anai, anan nose'epa.

¹⁷ Ae' ase'epa mi'uli ipe' na'ama. Ipe' ukup mimila sahin owan ipe'isi atona etin.

Nambimb epes saila waf etapanai sofala alupusi Jisasi naumbih

¹⁸ I'i esis amam nematawa saila waf etapanai si'i sonda'mepa naumbih, ipe' pegawa esis fowa' sali' sanda'ma ae' naumbih wapoti.

¹⁹ I'i ipe' epes etapipei, esis saila waf etapanai ukup mimilipa si'i ipe' epes asasipei etipa. Ea' ipe' ina epes etap anae'ipei, owa'. Ae' esahe'epa ea' ma pekwaha waf etapanai. Ea' dei' esis saila waf etapanai sonda'mepa naumbih.

²⁰ Ipe' ukup mopoma basef amama ae' a'ipipa emi andeande'. Basef amama ma'i Ae' Dembiwei ipe'iwei ma'i epen agel a'ani nanda' opeh etini, enin ina nape ilifa dembinai ananinai, owa'. Ae' sali' sanda'me waf aonai, ea' nambimb esis sonda'mepa waf aonai, sonda'epa awepa wapoti'. I'i esis sila basef ae'ami, nambimb esis siela basef ipe'imi wapoti'. Owa'etin.

²¹ Esis ina sogawa Ahalome nasapa'e afi'i, owa'. Ipe' ukup mopoma agel ae'anai, ea' ae'ipei. Ea' esis saila waf etapanai sonda' amamaga awami hiami ma ipe'.

²² I'i ae' owa' ifi'i ie'ipasa basef amama, esis ofagema ma waf aonai a'as. Owa'etin. Dei' esis owa' anona eafa sombaho'a waf aonai asas sanda'anai, owa'.

²³ Emi egafis sonda'me naumbih, esis sonda' naumbiha Ahalome ae'anai wapoti'.

²⁴ Esis saila waf etapanai ina sati anona aman nanda' opeh mandahama opeh ae' anda'ami, owa'. I'i ae' owa' enda 'opeh amama, esis ofagenama waf aonai a'as. Ea' dei' sati opeh ae'ami la'ifimi ea' sowa' alafugaha ae' ukup aom endilisi ma ae' aloma Ahalome ae'anai wapoti'.

²⁵ Ea' waf anama asasinai nafe' na'ama etin si'i anom basef mail mi'uli esis Judai ma'i, ‘Esis ukup aoma ae' etin. Ae' basef ofagema a'e.’

²⁶ Ea' Anan nigiambamepa nonda'epa la'ifipa, Anan napani naloma Ahalome nambimb nifi'i. Ea' Ae' nambimb esapa'ana nifi'mai ipe'. Anan Ambal Bu'unai Godi nawalapa basef endilisimi. Nemaf anama Ae' esapa'ana nifi'mipei, nowalapa basefa ae'ami.

²⁷ Ae' a'ipipa, ipe' wapoti' nambimb pi'i basef ae'ami pewalapama esis. Dei' main, ipe' fowa' dambadamba pati asefela maol anda'ana palome pape la'ela'ef pafi'i pataga dei'.”