Jems 5 - Basef Buꞌwami Godi

Basefa epes amamaga hiamisi

¹ Ipe' amamaga hiamipei, ipe' peme' ae' dei' a'ipipa! Ipe' ukup mopoma nimanimi lu'wami anona nemaf motagama ipe' ea' pelef mehip.

² Amamaga ipe'imi hiahaom sosaf maim ipe'imi pepe'atam mape ea' sopafowa matotopa' luwaguf maim ipe'imi hi'alam.

³ Moni ipe'inai gol siliwa nowa'w nasagiham aom. Nowa'w anama si'i enin epen ni'ipipa waf aonai ipe' panda'anai nataga nandawalap. Ea' nowa'w anama nonda' alop ipe'inai si'i nif fandumi. Ipe' piwaniam hiahaom otamba maim ma nimeguf akutaimi motaga felefele'ma God nonda'mepa basef.

⁴ Ipe' peme'. Ipe' ina pase'am otamba amam manda' opeh mala' gwa'aimi aof ipe'inai, owa'. Ipe' pefa' otamba amamumi, pati amam malopa otamba amamumi. Amam malopa otamba amamumi ea' God la'ifinai ma amamaga hiami name' lef amamunai.

⁵ Nogota ipe' pape etap anae', pe ipe'inai bo'ona pefa' amamaga bu'wami endilisi pa' gwa'aimi hiami manda'epa pataga lu'ulu'upa. Ea' nemaf anama si'i saha mafis lu'wami anona nemaf notaga nehepa.

⁶ Ipe' panda' basef baso'omaimi pambaso'ma epes bu'wasi pahas saga'. Ea' epes isima basef a'as. Ina sagwamepa wandaf, owa'.

Ipe' pitu la'ifipa pefa' nimanimi pehafa Dembinai notanimani

⁷ Sahin owan ae'ipei, ipe' pitu la'ifipa opalef awanem pehafa nemaf anama Dembinai niefi'ianai. Ipe' ukup mopoma anona aman nafomona aofi. Anan nohafa anona nemaf gwa'aimi bu'wami sotalom otamba hiami notaga. Anan opaf awanena naitu la'ifina nape nohafa nogota laona ma asaf nilai nonda' gwa'aimi hiami motaga aof ananinai.

⁸ Ipe' wapoti' penda' opalef ipe'imi la'ifim ea' pepe opalef awanem. Dei' main, nemaf Dembinai notanima niefi'ianai felefele' notaga.

⁹ Ipe' ina piti waf sahin owan ipe'si sanda'anai pi'i aona, owa'. Na'ama anona nemaf God nowaloga ipe'. Jas nape felefele'ma uta.

¹⁰ Sahin owan ae'ipei, ipe' ukup mopoma amam profet fowa' mawalipasa basef Godi ma agel Dembinai. Amam opalef awanem maitu la'ifima nimanimi lu'wami matagamami.

¹¹ Ape' ukup ma'i amam maitu la'ifim dei' ma'i amam mandanifel. Ipe' pegawa aman anama Jop. Anan naitu la'ifina opaf awanena ma nimanimi matagamana. Nape la'ela'ef nogota laona, Dembinai nagiambamana. Dembinai na'i uwahipipa ape' endilisi ea' okom nainailapa.

Ape' ina mi'i basef endilisimi gani ilif, owa'

¹² Ipe' sahin owan ae'ipei, basef mali'i ipe' pielami amama. Ipe' owa' pi'i heven ilif o etap anae' o anom amamaga penda' basef ipe'imi mataga la'ifimi, owa'. Ipe' ina penda' basef ipe'imi la'ifimi endilisimi pi'i gani ilif, owa'. Ipe' ukup mi'i, “A'e” pi'i, “A'e”. Ipe' ukup mi'i, “Owa'”, pi'i, “Owa'”. Ama God ina nowaloga ipe' ma basef amama ipe'imi.

Beten anama epes bu'wasi sanda'anai, anama la'ifina

¹³ I'i enin epen ipe'ini nefa' nimanimi, enin nenda' beten nihali' God. I'i enin epen nendanifel, enin nenda' awalefa nefela agel Godi.

¹⁴ I'i enin epen ipe'ini awen, enin nefala amam agufumi siosi mifi'i monda'man beten mohali' God ea' mokolo'wa wel bu'wami alop ananinai ma agel Dembinai. Ama nonda' epen inima bo'wen.

¹⁵ I'i amam mombale'ef endilisi ma monda' beten mohali' God, epen inima netaga bo'wen. Dembinai nigiambaman netaga bo'wen. I'i epen inima nali' nenda' waf aonai, God nokwaha waf aonai enin nanda'anai.

¹⁶ Amama atom dei' ipe' pewalapa waf aonai ipe' panda'anai atona etin ea' penda' beten ama ipe atona etina God nonda'epa bo'wepa. I'i enin epen bo'wen, beten ananinai la'ifina endilisi.

¹⁷ Aman anama Elaija fowa'inai, anan aman si'i ape' epes mape etapi. Anan okom napoma God ea' nanda' beten nahali'ana ma nasopama asaf, ea' ina nalai etap asasinai nogota laona afagof si'imi wanom tu'waninai.

¹⁸ Afagof amama mafe'ma ea', nanda' beten nahali' God wapoti', otaga akutina asaf nalai gwa'aimi mataga etap malo andeande' wapoti'.

I'i enin epen nekwaha bale'ef ananinai, ape' migiambaman

¹⁹ Sahin owan ae'ipei, i'i enin epen ipe'ini nekwaha nembale'efa basef endilisimi Godi, ma enin epen nigiambaman nefa'an nitanimani, ipe' ukup mopoma basef amama.

²⁰ Emi egafis sagiambama epen nanda' waf aonai ma nekwaha waf enin nanda'anai nitanimani, epes isima sagiambamani sefa'an natanimani nakwaha neaga'. Amama atom God dei' nakwaha waf aonai hianai enin nanda'anai.