Jems 4 - Basef Buꞌwami Godi

Emi okom nainaila waf etapanai, enin nanda' naumbih naloma God

¹ Maina waf ofagena ma nanda' ipe' panda' lopa' fitap pape la'afena ipe'? Ukup awami atom mafela ipe' dei' panda' lopa' fitap la'ela'ef opalef nomon, alop ande' wapoti'. Ea' amama atom.

² Ipe' ukup ma'ima'i amamaga hiami mamumami ea' ipe' ina pefa'am, owa'. Ea' dei' ukup aom paha epes saga'. Ipe' gegelalasipa ma amamaga hiami enis epesi, ea' ipe' ina la'ifipa pefa'am, owa'. Ea' ipe' panda' lopa' fitapa pa'i pefa'am. Owa'etin. Dei' main, ipe' ina pahali' Goda amama, owa'.

³ Nemaf anama ipe' panda' betena pefa' amamaga amama, ipe' ina pefa'am, owa'. Dei' main, ukup ipe'imi ina mape bo'om etifima pahali' God, owa'. Ipe' ukup ma'i pefa' amamaga penda'am pefa'am pekwahom amama ukup ipe'imi atom.

⁴ Ipe' pakwaha waf Godi ea' pafe'ma waf aonai si'i amam nematawa sakwaha waf bu'unai dase'amainai ma sanda' waf aonai so'a waolanai. Ipe' pegawa amama. Emi egafis ukup maila waf etapanai, esis sanda' naumbih saloma God. Dei' pegawam. Emi egafis ukup maila waf etapanai, esis dei' sanda' naumbih saloma God.

⁵ Ipe' ina pi'i basef Godi mail buk Baibeli falafumi, owa'. Basef amama ma'i na'ama ma'i, “Ambal anama napaipai God nase'apana nanda'apa ukup matamea ma mofa' amamaga mamumami hiami.”

⁶ Ea' God nagiambamapa na'a nanda'apa mataga la'ifipa. Waf anama Godi nikila' waf aonai si'i basef mail Baibeli ma'iami, “God nosambala epes isima sasambala basef Ananimi ea' nagiambama epes isima sanda' esis safe owina Anan.”

⁷ Ea' dei' ipe' pefe' owina God. Ipe' pewa' alafugaha Satana anan nokwahipa nofa' nefe'.

⁸ Ipe' pifi'i felefele' endilisi ma Goda Anan nifi'i felefele' endilisi ma ipe'. Ipe' panda' waf aonai, pekwaha waf anama ipe' panda'anai si'i epes sasa'opa lagof asasimi mataga bo'om. Ipe' epes malogof biamipei, ipe' pekwaha waf anama ea' penda' ukup ipe'imi motaga bo'om.

⁹ Ipe' panda' opalef ipe'imi aoma waf aonai ipe' panda'anai, pelef mehipa waf anama pekwahona ea' hapainai. Ipe' dei' panda' iafi, pemboma opalef pelef. Ipe' dei' pandanifel, ipe' penda' opalef ipe'imi aoma waf anama aonai.

¹⁰ Ipe' pefe' owina Dembinai ma Anan nefelepa nenda'epa petaga la'ifipa.

Ape' ina mowaloga sahin owan ape'isi ma basef awami, owa'

¹¹ Ipe' ina piti waf sahin owan ipe'isi sanda'anai pi'i aona, owa'. Epen ni'i basef awamima enin alupini o newaloga sahin owan ananisi, epen inima enin na'i basef awami nawaloga mi'uli Godi. I'i ipe' pi'i basef awami pewaloga mi'uli anama, ina ata' paila mi'uli anama, owa'. Ea' pape si'i dembipei jas pawaloga mi'uli anama.

¹² God atona nawalapa mi'uli Ananinai ea' Anan atona jas nowaloga epes. Anan atona la'ifina ma nefa'apa mokwaha waf aonai ape' manda'anai motanimani ea' la'ifina ma nohapa wapoti'. Ea' dei' ipe' emi egafipa ma pi'i basef pewaloga epes isima sape felefele'ma ipe'? Na'ama hapaimi.

Ape' ina mefela agof ape'imi ma maina maol nambimb mi'i meanda'anai, owa'

¹³ Enipa ipe' pa'i na'ama pa'i, “Dei' o naman afa' ofe' wambel lu'unai taun ope onda' maola bisnis afagol atotona ofa' otamba hiami.” Ipe' pa'iam na'ama, peme' basef ae'ami.

¹⁴ Ipe' ina pegawa maim amamaga naman meatagamepa, owa'. Ambagof ipe'imi ata' mape namum la'ela'ef hihif? Ipe' si'i nogoh mataga mape nogota bandana mafe' hi'alam nemaf atotona.

¹⁵ Ipe' ukup mi'i, “Okom Godi ni'i a'e, ope namofa onda' opeh amama o anom opeh.” Pi'iam na'ama, andeande'.

¹⁶ Ea' dei' ipe' pa'i diga lu'unai pa'i ipe' etipa la'ifipei pafela agof ipe'imi atom. Waf anama na'amainai aona.

¹⁷ Ipe' pegawa andeande'. Emi epen negawa ma nenda' waf bu'unai ma enin owa' nonda'ana, enin nanda' waf aonai.