Jems 3 - Basef Buꞌwami Godi

Ape' mumafi malogof ape'imi

¹ Ipe' sahin owan ae'ipei, na'ama ipe' hipei petaga gawaipei tisa etipa, owa'. Dei' main, ipe' pegawa anona nemaf God nowaloga afa' tisa wawalipasa basef bu'wami Ananimi nowalogafa ma basef la'ifimi endilisi. Ea' enis Kristen nowalogas sa'osa'ombel.

² Ape' hiapai anom nimeguf owa' mila basef Godi andeande', owa'. Ape' mowa ma anona waf aonai ape' manda'anai. I'i enin epen ina nanda' waf aonai ma basef ananimi, enin epen bu'wani. Enin la'ifina nimafi alop naloma okom ananinai hi'ilana wapoti'.

³ Ipe' pegawa ape' manda' waf anama ma hos. Ape' masape' ain nape malogof hosi nomona monda' hos meme' basef ape'imi maila ukup ape'imi ma hos amama mefe' si'i ape' ma'i meafe'ma.

⁴ Dei' ipe' ukup mopoma sip lu'unai. Sip anama lu'unai ea' uf lu'unai nefa' sip anama ea' stia anama so'una. Kepten numafi sipi nambomana nafe' anama anan na'i neafe'ma. Nanda'am na'ama ma stia anama so'unai.

⁵ Ea' na'ama etina malogof ape'imi sa'om mape alop ape'inai nomon. Malagof amama ma'i basef mamumami hiami endilisi mafela agof epesi ma maol hianai esis sanda'anai. Dei' ipe' okokoma nif. Nif fendom sa'om mataga lu'um la'ifim endilisi fendo aolop lawah lu'wami fendom hi'ilam.

⁶ Malogof amama ape'imi na'ama etin si'i nif fandumi mape la'afena alop ape'inai malogof amama mawalapa waf naninani aonai. Ea' manda' ukup epesi mataga aom sanda' waf aonai. Mawalapa waf hianai ape'inai ma fe' pe ki ape'inai aona endilisi si'i nif fandumi mataga lu'um. Nif amama mataga wambel aonai hel atogon.

⁷ Mafis mamumami aolupumi maloma amiguf maloma iguf maloma amamaga hiami mape naoh embel owini, epes sofa'ami sali'atam sanda'am mogawa mame'as mape owina esis. Dei' wapoti' esis la'ifisa sanda'am na'ama.

⁸ Ea' malogof epesi owa'etin. Ina enin epen la'ifina numafi malogol ananinai, owa'. La'ela'ef malogel nataneam nape la'ela'ef na'i basef awami si'i marasin aonai naha epes saga'i.

⁹ Malogof ape'imi atom mafela agel Dembinai Ahalomapa ape'inai ea' ma'i basef awami wapoti' mahambombaga sahin owan ape'isi God nanda'as sape na'ama etin si'i Anan.

¹⁰ Malogof amama atom ma'i basef bu'wami mafela agel Godi ea' ma'i basef awami wapoti'. Ipe' sahin owan ae'ipei, penda'am na'ama, owa'.

^11-12 Sahin owan ae'ipei, anom basef womun etin na'ama. Ina embel bu'wami maloma awami motah ifata atotona, owa'. Ea' anona lawag fik ina nail nola anom su'utip oliv, owa'. Ea' anom mandelef su'utip grep mailami ina mail mola anom su'utip fik, owa'. Na'ama etin si'i embel naoh ina mandamboma motaga embel bu'wami, owa'.

Gawa bu'unai God atona nase'apana

¹³ Ipe' emi egafipa gawa bu'unai hianai napaipei, ipe' pepe na'ama. Fe' ipe'inai nihi'ambas gawa ipe'inai enis epesa penda' waf bu'unai noloma maol bu'unai. Maol anama ipe' panda'anai pepe owina epes pila waf gawa bu'unainai.

¹⁴ Ukup ipe'imi ina kowalepa ma pefa' amamaga hiahaom otamba maim enis epesi, owa'. Ipe' ina pefela agof ipe'imi, owa'. Ipe' penda' waf anama pi'i ipe' etipa gawaipei, ipe' pambaso'mas. Na'ama hapaimi. Gawa anama ipe'inai ina endilisinai, owa'.

¹⁵ Gawa anama ina nafi'i heven, owa'. Nataga etap anae' ma opalef apimi maloma aman aonai Satan atona.

¹⁶ Emi egafis ukup mopoma esis etis si'i kowalas ma sofa' agof lu'wami ma amamaga maim hiami enis epesi, epes isima ina sape andeande', owa'. Esis ina sandatama sape etifigin saloma enis epes, owa'. Sanda' lopa' fitap etina sanda' waf naninani aonai.

¹⁷ Ea' gawa nafi'i heveni nawalapa waf bu'unai na'ama. Waf nape nali'i, ukup epesi mope bo'om andeande'. Ea' waf bu'unai hianai wapoti' na'ama. Epes sape opalef awanema opalef etifim maloma enis epes. Ea' sanda' waf so'uso'umbilinai sati uwahipis endilisi ea' sanda' waf bu'unai ma sagiambama enis epes. Esis ina malogof biam sa'i anom basef, owa'. Sa'i basef endilisimi atom. Esis ina sanda' waf biefina sanifela enis sosambala enis, owa'. Esis ukup ma'i epes hiesi na'ama etin.

¹⁸ Emi egafis sanda' maol sawalipa epesa sope opalef etifim isima si'i ape' mawa gwa'aimi aof. I'i esis sonda' maol anama ma waf opalef mape etifim, maol anama nowalapai waf bu'unai andeande' si'i gwa'aimi mataga bo'om aof.