Jems 2 - Basef Buꞌwami Godi

Ape' mimila epes hiesi dembesi awasi na'ama etin

¹ Sahin owan ae'ipei, ipe' pembale'efa Dembinai ape'inai Jisas Krais, Anan Dembinai nafifili endilisi. Ea' dei' ipe' ina pigiambama epes isima agufisi etis ea' pewa' alafugaha epes agof a'asi, owa'. Penda'am na'ama etin.

² Basef amama ofagema na'ama. I'i anona aman amamaga hiamunai nonda' trausis siot sosaf bu'wami nola ring gol faf ananinai ma nuwis ipat anama panda' lotuwanai nomon, ma i'i anona aman kwahuna ma otamba luwaguf maim nuwis wapoti', ipe' atuwasi penda' maina anan?

³ I'i ipe' penda' aman anama luwaguf maim bu'wami pi'ipana pi'i, “Ine' fi'i balata bu'unai na'ae”, ama i'i aman anama kwahunai nuwisi pi'ipana pi'i, “Ine' nitu gani”, o ni'i “Nepe gani etap felefele'ma bo'wagah ae'ami”.

⁴ I'i ipe' penda'am na'ama, atuwasi ofagema awami ipe'imi. Ipe' pawaloga sahin owan ipe'isi ma ukup ipe'imi, ea' ipe' ina pawalogas paila waf bu'unai na'ama etin, owa'. Ipe' pawalogasa ukup awami atom.

⁵ Ipe' sahin owan ae'ipei, ipe' peme'! God nandandepa epes isima kwahusi ma otamba hiahaom maim ma dei' sape la'ifis sombale'efana la'ela'ef sape bo'wes andeande' si'i epes isima amamaga hiamisi. Anan nandandepasa sofa' amamaga bu'wami wambel Ananinai. Amamaga amama na'i basef endilisimi atom la'ifimi noso' emi egafis ukup maimaila Godi.

⁶ Ea' ipe' panda' epes isima kwahusi ambagof aom. Emi egafis sanda' ambagof ipe'imi aom sase'epa nimanimi sanda'mepa basef? Esis amamaga hiamisi.

⁷ God nase'epa agel bu'unai Krais ea' ipe' Ananipei. Epes isima etis sa'i basef awami sanda' findiwama agel anama.

⁸ Dembinai King ape'inai numafi ape' hiapai, anan nase'apa basefa mi'uli Ananinai mape Buk Baibeli. Basef amama ma'iam ma'i, “Ipe' ukup mimila emi egafis sape felefele'ma ipe'i si'i ipe' ukup maimaila ipe' atona etin.” I'i ipe' pila mi'uli anama, penda' waf bu'unai andeande'.

⁹ I'i ipe' pigiambama enis epes, pewa' alafugaha enis, mi'uli anama atona nanda' kotimipa ma panda' waf anama pesambala mi'uli anama.

¹⁰ Dei' main, emi egafis sila basefa mi'uli hianai hi'ilana ea' sesambala anona mi'uli anama atotona anom basef tu'wanim kwaie'um, epes isima ofagema asasimi si'i sawala mi'uli anama hianai hi'alana.

¹¹ Dei' main, anan na'i basef amama na'i, “Ipe' owa' peha enis epes soga'.” I'i ipe' owa' penda' waf anama so'a waolanai, ea' paha enin epen naga', ipe' pataga epes aopei pesambala mi'uli Godi.

¹² Anona nemaf God nowaloga ape' ma anona mi'uli nanda'apa mope wafifipa. Ea' la'ela'ef ipe' pi'i basef penda' waf nondahama mi'uli anama.

¹³ Dei' main, emi egefis owa' siti uwahipis enis epes, owagama God ina niti epes isima uwahipisa nemaf anama nowaloga esisanai, owa'. Ea' emi egafis siti enis epes uwahipis, God anona nemaf ina nowaloga epes isima ni'i awes, owa'. Waf anama ape' mi'i uwahipisanai nikila' endilisi.

Bale'ef atona wafinai, waf bu'unai ina napeis, owa'

¹⁴ Ipe' sahin owan ae'ipei, i'i enin epen ni'i, “Ae' embale'efa Krais” ma waf ananinai ina bo'ona, bale'ef ananinai falafunai atona. Bale'ef anama ina la'ifina ma anona nemaf God nofa'an notanimani, owa'.

¹⁵ Bale'ef anama falafunai nape na'ama. I'i enis sahin owan sape sala luwaguf awami o gwa'aimi a'as, ea'

¹⁶ enin epen ipe'ini ni'ipa epes isima ni'i, “Ipe' opalef awanem pefe' pefa'ai luwaguf ipe'imi pewahe'am pembaho' alop ipe'inai pefe' pea' gwa'aimi bu'wami!” I'i ipe' pi'iam na'ama, basef amama ipe'imi ina mataga endilisi, owa'. Basef amama ipe'imi migiambamas mi'imama? Owa'etin. Falafumi atom.

¹⁷ Bale'ef na'ama etin. I'i enin epen nembale'ef etin ina nanda' waf bu'unai naloma bale'ef ananinai, bale'ef anama ananinai falafunai atona.

¹⁸ Ea' enin epen na'i, “Ine' epen nembale'efa Krais ea' ae' anda' waf bu'unai.” Dei' a'ipa epen inima na'ama a'i, “Ine' nihi'ambe bale'ef anama ine'inai waf bu'unai owa' neataga nelomana. Waf bu'unai ae' anda'anai ihi'ambena bale'ef ae'anai.”

¹⁹ Ine' nembale'efana na'ama na'i, “God atotona nape.” Ine' na'i na'ama, andeande'. Ambagof awami wapoti' mombale'efana na'ama etin ea' umbamaham bombol etin kwapete'am.

²⁰ Ine' aman okom nahaga nagaolinai, ine' nembale'efa Jisas atona, ama ina nanda' waf bu'unai wapoti', bale'ef anama ine'inai falafunai atona. Dei' ine' na'i negawa anama ofagema? Dei' i'ipina.

²¹ Fowa' gani akunamapa ape'inai Abraham na'i nondolali ma nogalomana ananinai Aisak nondolalimana ma Goda balata anama sondolalima Goda. Amama atom dei' God na'ipana na'i anan aman bo'ona andeande'. Anan nanda' waf bu'unai dei' God na'ipana basef amama na'ama.

²² Ine' negawa o owa'? Bale'ef Abrahami naloma waf bu'unai anan nanda'anai amama manda' opeh etifigin. Ea' waf bu'unai anan nanda'anai nagiambama bale'ef ananinai nataga alihina andeande'.

²³ Ea' basef amama mail buk Baibeli mataga alihim mandawalap. Basef amama ma'i, “Abraham nembale'efa God, dei' God nofalana na'i anan aman bu'unai andeande'.” Ea' God nofalana na'i, “Anan alupunai Ae'anai.”

²⁴ Basef amama mail buk Baibeli mihi'ambapa dei' ipe' pegawa bale'ef atona God ina na'i epes bo'wes andeande', owa'. Esis sombale'ef endilisi ma sanda' waf bu'unai wapoti', anan nofalas na'i epes bu'wasi andeande'.

²⁵ Nemata'w akwama Rahap kwanda' waf so'a waolanai, akwa'w na'ama etin. God nati waf bu'unai akwa'w kwanda'anai dei' okom napoma'w na'i akwa'w nemata'w bo'okw andeande'. Waf bu'unai akwa'unai kwagiambama amam Juda mandambaho' mafi'i ea' kwihi'ambam anona eaf mafe' wafifim.

²⁶ Ea' basef amama mape na'ama. I'i alop atona ambal owa' nopaipa, alop anama naga' ea'. Na'ama etina emi egalin nembale'ef etin ma ina nanda' waf bu'unai, bale'ef epen inima falafunai atona.