Jems 1 - Basef Buꞌwami Godi

¹ Ae' Jems, ape owina God naloma Dembinai Jisas Krais anda' maola amam atom. Anda' basef amama mafe'mago ipe' epes hipei Judaipei epes wambotogw loumi 12-peleim. Ipe' pakwaha wambel ofagama ipe'ima ma pafe' pape wambel hiagoma etap anae' pape panda' maol naninani. Ae' anda'mepago danifel nafe'mago ipe'.

Amamaga meagwambipei manda'epa pataga la'ifipa

² Ipe' sahin owan ae'ipei, maim nimeguf amamaga meagwambipei motagamepa, ukup ipe'imi mi'i andeande' pendanifel etin pepan.

³ Dei' main, ipe' pegawa amama mogwamba bale'ef ipe'inai, amama manda'epa pitu la'ifipa ma nimanimi meatagamipei.

⁴ Ea' ipe' pitu la'ifipa ma waf anama neataga bo'ona ma ipe' ma anona nemaf petaga andeande' endilisi, waf aonai a'epa. Ama waf hianai Godi mope ipe', ea' ipe' ina anona waf bu'unai a'epa, owa'.

Emi egafis gawa bu'unai a'asi, esis sihali' God

⁵ Emi egafis gawa bu'unai a'asi, esis sonda' beten sihali' Goda nose'asana. Dei' main, Anan nase'asa amamaga hiami na'a ma epes hiesi, ina ninifalis, owa'.

⁶ Epes isima esis sombale'efana endilisi ma sonda' beten sohali'a God. Ina sope ukup biambiefim, owa'. Esis sombale'efana la'ifis. Emi egafis sape ukup biambiefimi, esis ina sembale'efana la'ifis, owa'. Ukup asasimi si'i embel uf nalo naoh mohafel.

^7-8 Epes isima ina ukup mi'i Dembinai nose'as anom amamaga, owa'. Ukup asasimi mandawal biefim mapoma waf hianai esis sanda'anai ea' ina sape ukup etifim, owa'.

Basef epes kwahusi saloma epes amamaga hiamisi

⁹ Sahin owan Kristen emi egafis kwahusi esis sondanifel ma God nafelas nigiambamas dei' anona nemaf wapoti'.

¹⁰ Ape' Kristen emi egafis amamaga hiamisi, esis sondanifel ma God nanda'as safe' owina sembale'efa Krais. Dei' main, epes amamaga hiamisi anona nemaf soga' si'i afis mataga otalef mape nogota bandana ma mandala'of mowa.

¹¹ Ipe' pegawa aon alipunai natefi ma owaf naha otalef amama ma ala'um hi'alam. Afis mataga mia'of ea' sosaf afisi nambimb mowa'. Epes isima amamaga hiamisi sonda'am na'ama etin. Nemaf anama sonda' maola bisnisi atom, soga' si'i sosaf afisi mowa.

Basefa hiahaom meagwambipei matagama epes

¹² Emi egafis saitu la'ifisa hiahaom meagwambasi matagamas, esis sondanifel. Dei' main, nemaf anama esis sikila' amama waf aonai naninani ea' hi'ilana, anona nemaf esis sofa' amamaga bu'wami si'i prais. Amama na'ama. Ambal namunai God na'i endilisi noso'asam emi egafis ukup maimaila anan.

¹³ Emi egalin amamaga meagwambipei motagamen ma nonda' waf aonai, enin ina ni'i God nanda' enin dei' nanda' waf anama. God ina nanda' enin epen nanda' waf aonai, owa'. Ea' ina enis epes la'ifisa sonda'ana nonda' waf aonai, owa'.

¹⁴ Ea' ukup awami ape'imi atom mafelapa makikipapa ma mafe' matolo'w isalef si'i anona mafin aolupunai nafe' natolo'w esag.

¹⁵ Ea' ukup ape'imi mohafel manda'apa manda' waf aonai. Anona nemaf waf anama aonai notaga lu'una, nonda'apa moga'.

¹⁶ Ipe' sahin owan, ae' okom nainailipa. Na'ama ipe' pembaso'ma ipe' etipa.

¹⁷ Amamaga bu'wami hiami si'i presen, amama ahalomapa ape'inai nase'apam misila'i heven. Anan nanda' mafifili aon alipunai owambunai maloma ondowa motawa ilif otaga. Owaf naluwi, ambagof laom bandam. Ea' God ina nandaho'of na'ama si'i ambogof, owa'. Anan nape na'ama etin la'ela'ef hihif.

¹⁸ Anan naila okom ananinai atona ma basef ananimi endilisimi ma ape' mataga mape mali'ma amamaga amama Anan nanda'ami.

Ape' mome' basef milam

¹⁹ Ipe' sahin owan ae'ipei, ipe' ukup mopoma basef amama na'ama. Ipe' hipei pendandombam ulala peme' basef. Ea' ina pi'i anom basef pegwam ulal, owa'. Ea' ina ukup wandafum mehip, owa'.

²⁰ Dei' main, waf anama epes ukup wandafumanai nilai waf aonai. Ina nawalapai waf bu'unai Godi, owa'.

²¹ Amama atom dei' ipe' kwahago waf aonai neloma waf aonai hianai hi'ilana. Waf anama aonai epes hiesi sanda'ana la'ela'ef. Ea' pinindifa ipe' pepe owina Goda pefa' basef amama ananimi mope opalef ipe'imi. Basef amama la'ifimi ma mofa'ai ipe' pitanima pifi'mai God.

²² I'i peme' basef Godi ina pailam, ipe' pambaso'ma ipe' etipa. Amama hapaimi. Ipe' peme'am pilam, andeande'.

²³ Emi egafis seme' basef Godi owa' sieliam, esis si'i enis epes safela glas sati amagah asasimi.

²⁴ Esis satolom ea', sandamboma safe', ina okokoma amagah asasimi, owa'.

²⁵ Ea' basef mi'uli Godi matagahepa makwaha waf aonai, amama andeande'. Emi egalin niti mi'uli anama ofagema andeande' la'ela'ef nilam, epen inima God nofalo'man nonda'an nendanifela maina maol anan nanda'anai.

²⁶ Emi egafin ni'i, “Ae' anda' lotu endilisi aila God” ma enin i'i owa' nimafi malogel ananinai andeande', epen inima nambaso'ma okom ananinai atona. Ea' dei' bale'ef ananinai ma lotu main falafunai atona.

²⁷ Waf sanda' lotuwanai bo'ona andeande' ofagena a'ana naep Ahalomapa ape'inai Godi, anama na'ama. I'i enis awasi mamasas a'asi esis etis sope, o nemata'w alifi'wi akwa'w ato'w kwape kwahu'wi, ape' migiambamasa otamba gwa'aimi maim. Ea' mumafi pe ape'inai andeande' ma waf aonai etapanai ina nenda' opalef ape'imi motaga aom, owa'.