Hibrui 8 - Basef Buꞌwami Godi

Jisas nape Dembinai pris ipat Godi lu'unai sanda' lotuwanai endilisi gani ilif heven

¹ Basef amama anda'ami mape mali'i, ofagema na'ama. Ape' anona Dembinai pris nape nali'ma pris hiami na'ama etin si'i basef mali'i ma'iam. Anan nape sia bu'unai Dembinai lagel da'isinai gani heven ilif.

² Anan nanda' maol anama nondolali ma God ipat lu'unai Ananinai. Ipat anama sanda' lotu endilisinai. Anona aman ina nala' ipat anama, owa'. Dembinai atona nala'ana notawa.

³ Fowa' gani God nandandepa amam dembemi pris mofa' amamaga bu'wami gwa'aimi mafis mamumami ma mondolalimana. Ea' Dembinai ape'inai wapoti' God nandandepana ma nofa'ai anom amamaga nondolalimanami.

⁴ I'i Anan etapanai, Anan ina dei' nope dembinai pris, owa'. Dei' main, amam hiami mape pris etap anae' manda' maola mofa'ai amamaga amama hiami mondolalima God, si'i mi'uli God fowa' naso' Mosesanai na'iam. Anan ina nape nanda' maol anama etap anae', owa'.

⁵ Amam pris hiami manda' maol anama mondolalima God manda' maol ipat Ananinai fowa' sanda' lotuwanai nanda' ikwaf atona ma ipat endilisinai bu'unai nape heveni. Amama atom nemaf anama Moses na'i nola' ipat anama sowalo' selanai, God na'ipana na'i, “Ine' nindumafuma umbamehena andeande'ma nambimb nenda' amamaga hiami hi'ilam migi'mam mondahamam endilisi si'i ikwaf anama Ae' ihi'ambenana ea' halaf Sainai.”

⁶ Ea' Jisas nanda' maol anama nondolalima God ea' maol anama nikila' endilisi maol amam pris fowa'imi manda'anai si'i basef amama dambaimi mikila' basef fowa'imi God na'i endilisimi atom naloma Moses. Basef amama dambaimi, Jisas Anan nape la'afena God naloma epes Ananisi ma basef amama mikila' basef amama fowa'imi. Amama atom dei' basef amama dambaimi mataga mawalapai basef bu'wami endilisimi mikila' fowa'imi.

Basef dambaimi God na'i endilisimi atom nalomapa mikila' basef endilisimi fowa'imi

⁷ Basef amama fowa' God na'i endilisimi atom naloma Moses ina mape bo'om la'ela'ef, owa'. I'i mope bo'om la'ela'ef, dei' basef amama God na'i endilisimi magi'i maol a'am.

⁸ Ea' God nawalapa waf aonai epesi na'i, “Ae' Dembiwei a'i, peme! Anona nemaf enda' anom basef dambaimi i'i endilisimi atom eloma esis epes hiesi wambota Israeli ma epes hiesi Judai wapoti'.

⁹ Basef amama dambaimi ina mandahama amama anom fowa'imi a'iam aloma esis, owa'. Fowa' a'i basef amama alomas, nemaf anama ahapila lagof asasimi efa'as sakwaha etap hiagoma Isip safe'. Ea' esis ina saila basef amama a'iam endilisimi atom, owa'etin. Ea' dei' ewa' alafuga ma esis. Ae' Dembiwei a'iam na'ama.

¹⁰ Nimeguf amama hi'ilam anona nemaf, Ae' i'i anom basef endilisimi atom eloma epes hiesi wambota Israel. Ae' dembiwei a'iam na'ama. Basef amama ofagema na'ama. Anona nemaf enda' mi'uli ae'anai nepe opalef asasimi nomon, ea' enda'ana nepe ukup asasimi nomon. Ea' epe God asasiwei, esis sope amam nematawa ae'asi.

¹¹ Nemaf anama esis amam nematawa hiesi atona etin maol a'asa sowalipa esis alupusi asasisi soloma sahin owan asasisi si'i, ‘Ipe' pegawa Dembinai’, owa'. Dei' main, nogota anama epes hiesi sogawa Ae' andeande', awasi dambesi wapoti'.

¹² Anona nemaf Ae' iti esis uwahipis igiambamas na'a sotanimani sope andeande', ekwahomasa waf aonai esis sanda'anai. Waf anama aonai esis sanda'anai Ae' ina ata' okom na'iana wapoti', owa'.”

¹³ Basef amama dei' na'i endilisimi atom God nofalam na'i basef amama dambaimi, manda' amama fowa' na'iam endilisimi atom dei' mataga apim ea'. Amamaga mataga apimi amama mope nogota bandana ma higililam hi'ilam.