Hibrui 7 - Basef Buꞌwami Godi

Melkisedek anan pris dembinai agel ananinai lu'unai endilisi

¹ Aman anama Melkisedek anan king dembinai numafi anona wambel Salem, anan pris nondolalima God Dembinai nape ilif endilisi. Fowa' gani Abraham nanda' wandaf naha anom king dembemi nali'amonam nafe' ma notanima nafe' wambel, Melkisedek natolona nofalo'mana.

² Ea' Abraham nawaloga amamaga nefa'am nafe' nanda' wandafami gwa'aimi maim ananimi hi'alam nawalogam aolef 10-peleimi nase'ana aof atotona Melkisedek. Ape' dei' mamboma agel anama Melkisedek, basef ofagema biefim. Anom ma'i king dembinai nanda' waf bu'unai. Ea' anom ma'i anan king dembinai nose'apa opalef awanem. Dei' main, anan king dembinai numafi wambel anama Salem, dei' mamboma basef amama Salem ma'i opalef awanem.

³ Anan Ahalomanai mama'wana a'ana. Anan bafasana wambota ananisi a'ana. Ea' mama'wana kolananai nemaf naloma nemaf naga'anai wapoti' owa' sogawame. Anan nape si'i Nogalomana Godi, nape pris dembinai la'ela'ef hihif.

⁴ Dei' ipe' okokoma Melkisedek, anan agel lu'unai endilisi. Dembinai ahalomapa ape'inai nali'i anan Abraham, anan natembe'am amamaga hiami bu'wami atom nofa'ama wandafi nawalogam ea' aof atotona naso' Melkisedek.

⁵ Amam wambota awasi bafapana Livai anom mofa' maol anama pris. Ea' mi'uli anama God naso' Mosesanai na'ipa amam atom manda' maol anama. Na'ama na'i amam mowaloga amamaga amama hiami esis Israeli mofa'am mase'ana namba ten hap God. Esis Israel sahin owan amamisi endilisi, ea' esis bafasana awasi Abrahami wapoti'. Ea' owa'etin, amam Livai mofa' gwa'aimi maim hiami namba ten hapa esis sahin owan amamisi etis.

⁶ Melkisedek ina nataga wambota Livai, owa'. Ea' anan nofa' amamaga hiami namba ten hap Abraham nowalogami. Ea' Melkisedek nofalo'mana na'ipana basef bu'wami aman anama Abraham. Aman anama Abraham basef bu'wami God na'i endilisimi atom mapomana.

⁷ Ea' ape' mogawa, aman nofalo'manai nape ilifa aman anama nofa' amama bu'wami presen.

⁸ Amam Livai manda' maol mondolalima Godi mofa' amamaga namba ten hap, amam anona nemaf maga'i. Ea' Melkisedek nofa' amamaga sawalogami namba ten hap, anan nape namunai la'ela'ef, si'i buk Baibel na'i.

^9-10 Ape' ma'iam na'ama. Fowa' gani Melkisedek natagama Abraham eaf, Abraham nase'ana amamaga amama nowalogami namba ten hap mafe'ma Melkisedek. Ea' Livai bafapana Abraham magi' mataga manda' maol anama mofa' amamaga amama namba ten hap esis Israel sawalogami. Ea' na'ama etin si'i Livai nase'ana namba ten hap Melkisedeka lagel Abrahami. Dei' main, nemaf anama Abraham nase'anam Melkisedek, Livai ata' owa' solanai, ata' nape opalef nomon bafapana Abrahami.

Aman dambainai dei' naho'ofa pris fowa'imi

¹¹ Fowa' esis amam nematawa sofa' basefa mi'uli anama God naso' Mosesanai. Ofagema mi'uli anama amam wambota Livai manda' maol pris. Ea' i'i maol anama amam pris manda'anai andeande' ma monda' esis amam nematawa sotaga bo'wesa naep Godi, dei' maina ata' anona pris dambainai nataga wapoti' si'i Melkisedek, ea' ina si'i Aron? Owa'.

¹² God naho'ofa waf amam pris manda'anai. Ea' mi'uli Godi wapoti' naho'ofana na'ama etin.

¹³ Dembinai ape'inai basef amama ma'ianai, anan anona wambota. Wambota ananinai ina fowa' nanda' maola balata amam pris maofa mafis maim mondolalima God, owa'.

¹⁴ Ea' amama mataga alihim na'ama. Ape' mogawa, Dembinai ape'inai nataga wambota Judai. Ea' Moses ina na'i anom amam wambota anama motaga monda' maol mope pris, owa'.

Jisas nape pris nataga dembinai la'ela'ef nandahama Melkisedek

¹⁵ Ape' mati anona pris dembinai nataga, naho'ofa amam pris mali'i, Anan si'i Melkisedek. Basef amama ma mi'uli anama mataga maho'ofa mi'uli anama nali'i dei' mandawalap alihim na'ama.

¹⁶ Anan ina nataga prisa anona mi'uli na'i amam pris mataga wambota Livai, owa'. Anan nataga prisa pepel ambal namunai napainai la'ela'ef hihif.

¹⁷ Dei' main, basef mail Baibeli ma'iana ma'i, “Ine' nape pris dembinai la'ela'ef si'i Melkisedek.”

¹⁸ God naho'ofa mi'uli anama naso' Mosesanai ea'. Dei' main, mi'uli anama owa' la'ifina nigiambama ape', owa'.

¹⁹ Dei' main, mi'uli anama ina nanda' epes sataga bo'wes andeande' ma naep Godi, owa'. Ea' dei' God nandoga anona eaf, anama bu'unai nikila' mi'uli anama, dei' eaf anama atona ape' mogawa endilisi God nagiambamapa ea' mefe' felefele'ma Anan.

²⁰ Nemaf anama God nandandepa Jisasa nataga pris Dembinai, ina nanda'ana nosahe'ana etin, owa'. Anan na'i basef la'ifimi na'i endilisi gani ilif ea' nandandepana. Amam pris fowa'imi ina nandandepam na'ama si'i Anan, owa'.

²¹ Ea' God na'i basef amama la'ifimi na'i endilisi gani ilif ea' nanda' Jisas nataga Dembinai pris. Anan nataga pris nemaf anama God na'ipana na'i, “Dembinai na'i basef la'ifimi na'i endilisi gani ilif ma anona nemaf Anan ina noho'ofa okom Ananinai wapoti', owa'. Ine' nape Dembinai pris la'ela'ef hihif.”

²² God na'i basef amama na'iam la'ifim. Amama atom dei' Jisas nataga Dembinai ofagonama basef bu'wami dambaimi God na'iam endilisimi atom mikila' basef fowa' nali' na'iami.

²³ Fowa' amam pris amam hiami. Dei' main, amam anona nemaf moga' ina la'ifima mope la'ela'ef monda' maol, owa'.

²⁴ Ea' Jisas dei' nape namona la'ela'ef. Amama atom dei' nape pris Dembinai la'ela'ef endilisi.

²⁵ Amama atom dei' Anan la'ifinai ma nefa' esis amam nematawa sotanimani sofe' felefele'ma Goda agel Ananinai ea' sope andeande' la'ela'ef. Dei' main, Anan nape ambal napaina la'ela'ef nanda' betena God nigiambamas.

Jisas Dembinai pris la'ifinai endilisi ma nagiambamapa

²⁶ Dembinai pris anama la'ifinai endilisi ma nagiambamapa. Anan naila waf Godi bo'ona andeande', waf aonai a'ana. Anan okom bu'unai dei' nape laogona epes sanda' waf aonai. God nase'ana agel lu'unai nikila' ilif endilisi.

²⁷ Amam dembemi pris fowa'imi mape mali' ma pris hiami mondolalima God nimeguf hiami la'ela'ef. Mali' ata' mondolalimana ma nakwaha waf aonai amam manda'anai. Ea' magi' mondolalimana ma nakwaha waf aonai esis amam nematawa sanda'anai. Ea' Jisas ina nanda'am si'i amam, owa'. Anan nondolali ma God nemaf atotona nakwahomasa waf aonai epes hiesi sanda'anai ea' ma'um. Naso' Anan atona nafe'ma God.

²⁸ Mi'uli anama God fowa' naso' Mosesanai nesaho' amam amama ina la'ifima monda' waf bu'unai nimeguf hiami ea' mape dembemi pris. Ea' basef amama la'ifimi God na'i endilisi gani ilif, amama mataga magi'ma mi'uli anama mandandepa Nogalomana Ananinai, Anan nataga bo'ona andeande' la'ela'ef hihif.