Hibrui 6 - Basef Buꞌwami Godi

Ape' ukup ma'i andeande' ma mombale'efa God la'ifipa

^1-2 Ape' ina ata' la'ela'ef mi'i basef amama mali'i Kraisi atom timbi tambel, owa'. Ape' ina mi'i basef amama mali'i mi'i, ape' momboma opalefa God mowa' alafugaha waf hianai aonai manda' epes higililas ea' mombale'efa Goda basef mamumami sapisi'asa embel sanda' beten sawamona lagofa enis epes maloma epes hiesi saga'i sohafel wapoti' maloma anona nemaf God nowaloga epes hiesi ma sope la'ela'ef wambel bu'unai o aonai. Ape' ina mope monda' basef amama atom mi'iam la'ela'ef timbi tambel, owa'. Ape' ata' mofo'o ea' monda' basef amama monda'apa la'ifipa mi'am si'i epes isima sataga dambes ea'.

³ I'i okom Godi ni'i monda'am na'ama, monda'am na'ama etin.

⁴ Epes isima sowa ma waf aonai sowa' alafugaha Godi, ina anona eafa esis sotanima sifi'i somboma opalef wapoti', owa'. Esis sali' sofa' nafifili Godi, sofa' presen bu'unai nafi'i heveni ea' sofa' Ambal Bu'unai Godi napais.

⁵ Ea' same' basef Godi, sogawam bo'om sagawa maol la'ifinai dambainai hianai alupusi Kraisi anona nemaf nigi' neatagai seanda'anai.

⁶ I'i esis sowa ma waf aonai sowa' alafugaha God, ina ata' anona eafa esis sotanimani sifi'i somboma opalef wapoti', owa'. Waf anama aonai esis sanda'anai atona, dei' saundana nogalomana Godi nail lawag usi'inai tu'wanainai wapoti' ma sahambombagana. Ea' sanda' epes hiesi sanda'ana findiwana ma basef awami.

⁷ Anona etap asaf nalai la'ela'ef nanda'ana nanda' gwa'aimi mataga malo andeande'ma magiambama amam nematawa sanda' maol etap aof anama, etap anama God nanda'ana nataga bo'ona andeande'.

⁸ Ea' anona etap nanda' otalef hiami wandafumi atom mataga, etap anama notaga aona endilisi. Ea' felefele'ma God nonda' etap anama notaga aona. Nemaf akutainai fendona nif lu'wami.

⁹ Ipe' alupipei ae'ipei endilisi, dei' ae' a'ipipa basef amama nimanimi, ea' ae' egawa endilisi anona nemaf ipe' ina awepa higililipa na'ama, owa'. Ae' egawa anona nemaf God nefa'epa pitanimani.

¹⁰ God ina epen aonai ma nambimb okom nose'ana ma maol hianai ipe' panda'anai, owa'. Ipe' ukup maimailana. Ea' dei' panda' maol anama ma pigiambama amam nematawa Ananisi. Ea' dei' ata' panda'ana na'ama la'ela'ef.

¹¹ Ae' okom na'i ipe' hipei atona etin ukup ma'i penda' waf bu'unai pigiambama epes Godi pefe' pefe' petagama nemaf anama Krais niefi'ianai. Penda'am na'ama ma pegawa endilisi anona nemaf Anan nefa'epa pitanimani.

¹² Ae' andaiwa'ma ipe' ala'uta nepa, owa'. Ipe' pila waf epes isima sombale'efa God endilisi ma esis ina ukup mandasosol, owa'. Ae' a'i ipe' pefa' amamaga bu'wami fowa' God na'iama basef endilisimi atom na'i anona nemaf noso'asam epes Ananisi.

Ape' mombale'efa basef God na'i endilisimi atom

¹³ Fowa' gani God naloma Abraham ma'i basef endilisimi atom. Ea' ina anona aman dembinai nikila' God, ama God nie'i basef amama endilisimi atoma aman anama ma agel ananinai, owa'. Ea' dei' God na'i basef amama endilisimi atom ma agel ananinai atona.

¹⁴ Anan na'i, “Dei' Ae' a'i endilisi, agiambamena enda' wambota bafasena ine'isi sigi' seatagai sotaga bo'wes hiesi endilisi.”

¹⁵ Ea' Abraham name' basef amama dei' ina ala'uta nana, owa'. Nape sa'ombel nohafa amamaga bu'wami God fowa' na'i neaso'anami mila basef amama na'i endilisimi atom.

¹⁶ Waf epes sa'i basef endilisimi atom sa'iam na'ama. Epes sa'i basef amama ma agel anona dembinai nikila' esis. I'i enin epen ni'i basef amama, enin nasopama malogofa emi egafis sa'i sosambala basef ananimi.

¹⁷ Fowa' gani God na'i nihi'ambas okom Ananinai nape la'ela'ef hihif alihima awasi batausana Ananisi anona nemaf sofa' amamaga bu'wami si'i na'ipasa basef Ananimi endilisimi atom. Na'i nihi'ambasa anona nemaf Anan ina nonda' anom basef dambaimi moho'ofa basef amama Ananimi, owa'. Amama atom. Amama atom dei' na'iam la'ifina endilisi gani ilif ma agel Ananinai atona nanda' basef amama mataga la'ifim.

¹⁸ Basef amama endilisimi atom na'iam endilisi gani ilif. Basef amama biefim ma'iam na'ama etin dei' mape la'ela'ef, ina anom amamaga maloma enis epes soho'ofam, owa'. Anan na'ipapa basef biefim amama ma nenda' opalef ape'imi la'ifim endilisi, ape' amam nematawa mafa' mafe' mandambaho' felefele'ma Anan. Ape' mombale'efa basef amama la'ifipa mogawa endilisi Anan anona nemaf nigiambamapa ma mope andeande'.

¹⁹ Gawa anama ma ape' mogawa endilisi anona nemaf Anan nigiambamapa mope andeande' nape na'ama. Gawa anama la'ifinai bu'unai nape mohafanai anama nombalo' opalef maloma ambagof ape'imi si'i anka nembalo' sip lu'unai nahapilana la'ela'ef nala embel ilif. Gawa bu'unai anama nawis nowala gani nomon bo'ogoma lowaf anama lu'unai alafugainama saundana nail si'i uta ipat Godi lu'unai sanda' lotuwanai heven nomon.

²⁰ Anama ipat Godi lu'unai sanda' lotuwanai natawa heveni Jisas nali'apa nafe' nawis ipat anama nomon ma nagiambamapa. Anan nataga pris dembinai nape nali' ma pris hiami dei' nape la'ela'ef hihif na'ama etin si'i Melkisedek.