Hibrui 5 - Basef Buꞌwami Godi

Jisas pris Dembinai ape'inai nape nali'ima pris hiami, Anan la'ifinai endilisi ma nagiambamapa

¹ Waf anama fowa' sandandepa pris hiami dembemi mape mali'ma pris hiami na'ama. Anona nogota sandandepa anona pris sanda'ana nanda' maol Godi ma nofa' malogof epesi naitu naep Godi. Esis sase'ana amamaga bu'wami naso' God nondolalimanama God nokwaha waf aonai esis sanda'nai.

² Anan pris ina la'ifina ma nonda' waf bu'unai atona nimeguf hiami, owa'. Amama atom sanda'ana dei' la'ifinama nigiambama esis ina sogawa andeande' sakwaha waf bu'unai Godi. Pris anama nagiambamas nonda'as sa'osa'ombemas.

³ Anan ina la'ifina ma nanda' waf bu'unai atona nimeguf hiami, amama atom dei' nondolali ma God nali' nakwaha waf aonai anan nanda'anai ea' nagi' nakwaha waf aonai esis amam nematawa sanda'anai wapoti'.

⁴ Maol anama nondolalima Godi nofa' agel lu'unai. Ea' ina anona aman la'ifina ma nanda' maol anama na'i okom ananinai atona, owa'. God nali' nofalana, ea' nanda' maol anama, si'i fowa' nofala Aron.

⁵ Krais wapoti' na'ama etin. Anan ina nafela agel ananinai atona nataga pris dembinai ma pris hiami, owa'. God atona nandandepana nanda' maol anama, ea' na'ipana na'i, “Ine' Nogalome ae'inai. Dei' awalapena alihina afela agel ine'inai lu'una.”

⁶ Ea' God na'i anom basef wapoti' mail anona buk na'iam na'ama na'i, “Ine' nepe pris Dembinai la'ela'ef nendolalimei na'ama etin nendahama Melkisedek.”

⁷ Fowa' gani Jisas ata' nape epen endilisinai etap anae', nanda' beten nahali' God la'ifinai ma nofa'ana nokwaha ga' ma nope namunai. Nanda' beten nofalana mehip nalef nape nimeguf hiami. Anan nanda' lotu ma God, nanda' Anan nafe' owina God. Ea' dei' God name' beten ananinai.

⁸ Endilisi Jisas Nogalomana Godi, ea' Anan nefa' nimanimi, amama atom mawalipana endilisi ma waf naila okom Godi.

⁹ Anan nataga Nogalomana Godi bo'ona endilisi. Amama atom dei' Anan ofagonama epes saila basef ananimi mofa'as sotanimani sofa' ambal namunai sope andeande' la'ela'ef hihif.

¹⁰ Ea' God nandandepana na'i, “Ine' nape pris Dembinai nendolalima ae' na'ama etin nendahama Melkisedek.”

Ape' ina mape si'i awasi gawa a'asi, owa'

¹¹ Basef hiami Melkisedeki ata' mape ea' dei' a'i i'ipipam. Dei' ipe' ina pandanifel ma pegawa basef Godi ofagema, owa'. Dei' ae' maol lu'unai endilisi ma ihi'ambepa basef amama ofagema.

¹² Dei' nogota anae' ea' ma ipe' pepe dembipei tisa piwalipa enis epes. Ea' owa'. Ipe' gawa tu'waninai atona ukup ipe'imi, ea' anona aman ata' nowalipipa wapoti' ma basef mali'i Godi. Ipe' ina la'ifipa pegawa basef lu'wami Godi si'i pagwa' gwa'aimi la'ifimi, ata' owa'. Ipe' dei' pegawa basef mali'i Godi atom si'i pagwa' nomagof atom.

¹³ Ape' mogawa emi egafis sa' nomagof atomi, esis sape awasi etis. Epes isima ina dei' la'ifisa sowaloga waf bu'unai aonai, ata' owa'.

¹⁴ Ea' gwa'aimi la'ifimi mapoma epes isima sataga dambes la'ifis. Epes isima sawalipa ukup maloma nomonas asasimi atom hihif dei' la'ifisa sowaloga waf bu'unai aonai.