Hibrui 4 - Basef Buꞌwami Godi

Epes Godi anona nemaf sefe' suwis sopoma noma'w solomana

¹ Basef Godi la'ifim endilisi dei' ata' mape la'ela'ef. Anan na'iam na'ama na'i, “Ipe' pefe' piwis anama pepoma noma'w peloma Ae'.” Ea' ape' umbamohapa. Na'ama God niti enin epen etitin ipe'ini okom nose'an ma basef Godi nefe' higililan, owa'.

² Dei' main, ape' wapoti' mame' basef bu'wami Godi si'i fowa' esis Israel same'am. Ea' esis same'am etin, ina sombale'am sailam, owa'. Ea' basef amama bu'wami same'ami ina magiambamas, owa'.

³ Amam nematawa mombale'efa Godi ape' dei' mafe' mawis mapoma noma'w maloma God si'i Anan na'iam na'i, “Ae' okom wandafuna ea' a'i basef endilisimi atom la'ifimi a'i, esis ina suwis sopoma noma'w solome, owa'etin endilisi.” Fowa' nanda' etap anae' hi'alana ea' napoma noma'w nogota laona nafi'i nafi'i nataga dei'. Anan napoma noma'w nahafa esis suwis sopoma noma'w solomana. Ea' esis ina sawis, owa'.

⁴ Anom basef God fowa' na'iami ma nemaf anama nafe'ma 7i sapoma noma'wanai, ma'iam na'ama ma'i, “God nanda' maol hianai hi'alana ea', nemaf anama nafe'ma 7i nataga, napoma noma'w.”

⁵ Basef amama do'okimi God na'iam wapoti' na'i, “Esis ina sefe' suwis sopoma noma'w solome, owa'etin endilisi.”

⁶ Esis amam nematawa isima fowa' same' basef bu'wami ina safe' sawis, owa'. Dei' main, esis ina sembale'efana endilisi, owa'. Sosombala basef Ananimi. Ea' basef amama ata' mape la'ela'ef ma'i endilisi enis epes anona nemaf sefe' suwis sopoma noma'w soloma God.

⁷ Amama atom dei' God nandandepa anona nemaf wapoti'. Ea' nofala nemaf anama na'i, “Dei' atef”. Ea' afagof hiami mafe'ma ea', God nawalapa basefa nemaf anama na'i basef Ananimi do'okimi ma malogel Deviti na'ama na'i, “I'i ipe' dei' peme' basefa malogel Ananinai, ipe' ina pesopama opalef ipe'imi la'ifim endilisi, owa'.”

⁸ I'i nemaf anama fowa' Josua nonda'as suwis sopoma noma'w, God ina ni'i anona nemaf wapoti', owa'. Ea' owa'. Esis ina sawis.

⁹ Amama atom dei' ape' mogawa waf anama mopoma noma'wanai ata' nape la'ela'efa ape' epes amam nematawa Godi. Waf anama si'i God napoma noma'w nemaf anama nafe'ma 7i.

¹⁰ Dei' main, emi egafis sefe' suwis sopoma noma'w soloma God, esis sambefa maol asasinai ea' sapoma noma'w si'i fowa' God nambefa maol Ananinai napoma noma'w.

¹¹ Ea' dei' ape' monda' maol la'ifipa endilisi ma mefe' muwis mopoma noma'w molomana. Na'ama enin epen ape'ini nesambala basef Godi newa ma waf aonai anona nemaf higililan si'i fowa' esis sanda'ama sowa hegilalas hi'alas.

¹² Dei' main, basef God na'iami ambal namunai napaim, ea' la'ifim la'ela'ef mape. Amama hi'alim endilisi mikila' bainat hi'alinai wa'owa'ol mapisila epes mawis nomon endilisi. Basef amama mawis mafe' la'afena ukup maloma ambagof asasimi mondowatanimama mafe' mawala nigis maloma gonat la'afen. Ea' mawaloga opalef maloma ukup ape'imi nomon.

¹³ Ina anom amamaga God nanda'ami nambimb mondambaho'ma Anan, owa'. Amamaga amama hiami hi'alam mape mandawalap alihim endilisi ma naep Ananimi. Ea' anona nemaf ape' mi'ipana maina waf ape' mandanai.

Jisas Anon pris Dembinai ape'inai nape nali'ma pris hiami

¹⁴ Ape' anona pris Dembinai ape'inai nape nali'ma pris hiami nafe' nawis heven nape naloma God. Anan Jisas Nogalomana Godi. Ea' dei' ape' mombale'efa basef God nawalapami la'ifipa.

¹⁵ Dei' main, pris anama Dembinai anan la'ifinama niti ape' uwahipipa maina nogota ape' owa' la'ifipama muli'amona waf aonai, ea' alop ape'inai owa' la'ifina ma monda' maol. Amamaga hiami mataga magwamba ape', amama mali' mataga magwamba Anan wapoti'. Ea' Anan ina nanda' anona waf aonai, owa'.

¹⁶ Amama atom ape' dei' ukup la'ifim mefe' felefele'ma God, umbamohapa owa'. Anan nigiambamapa na'a ma mape andeande'. Ea' ape' mefe'ma Anona niti uwahipipa nigiambamapa maina nemaf mofa' nimanimi lu'wami.