Hibrui 3 - Basef Buꞌwami Godi

Agel lu'unai Jisasi nikila' Moses

¹ Ipe' alupipei epes Godi, Anan nape ilif nofalipei, ipe' peme'. Ipe' okokoma Jisas, Anan aposel nape pris Dembinai ma waf naloma basef ofagema ape' ea' mombale'ef mawalipasami.

² Anan naila okom Godi nanda' maol God nandandepana nanda'ana andeande', si'i fowa' gani Moses nanda' maol Godi andeande' nagiambama epes hiesi Godi.

³ Aman anama Jisas, God nase'ana agel lu'unai nikila' agel lu'unai Mosesi, si'i epes sase'ana agel lu'unai aman nanda' ipat bu'unai nala'ana etap anae'. Ea' esis ina safela agela ipat anama lu'una, owa'.

⁴ Endilisi, ifagw hiami epes etis sala'ami. Ea' epen gawainai nanda' amamaga hiami, anan God atona.

⁵ Endilisi, Moses nanda' maola nagiambama epes Godi andeande' nanda'ana si'i nanda' maol Godi, ea' na'i basef nawalapama amamaga hiami anona nemaf owagama Krais nie'ipasami.

⁶ Ea' Krais nape nogalomana Godi naila basef endilisi nanda' maol andeande' ma nape Dembinai numafi epes wambota Godi. I'i la'ela'ef ape' mombale'efana la'ifipa mogawa anona nemaf Krais niefi'i nofa'apa mefe' heven mope andeande', ape' mape wambota Ananinai.

Epes sosambala basef Godi ina suwis sopoma noma'w, owa'

⁷ Ea' dei' ape' meme' basef Ambal Bu'unai Godi na'iami andeande'. Anan na'iam na'ama na'i, “Maina nemaf ipe' peme' malogel Ananinai,

⁸ ipe' ina pesopama opalef ipe'imi la'ifim endilisi, si'i fowa' gani bafasepa sanda'am sosambala basef Godi ma sanda' okom Ananinai wandafuna, owa'. Nogota anama esis sape anama wafiguma fatauguma esis sagwambana endilisi sasopama opalef.

⁹ Esis bafasepa ipe'isi sati pepel hianai Ae' anda'anai anama wafiguma afagof hiami 40-peleim. Owa'. Nimeguf hiami esis sanda' Ae' gwambai gwambae endilisi.

¹⁰ Esis sanda'e na'ama, Ae' dei' okom wandafunamas endilisi a'i, ‘La'ela'ef ukup asasimi mase'asa eaf bu'unai sololamana. Esis ina ata' saila waf bu'unai Ae'anai, owa'.’

¹¹ Ea' Ae' okom wandafuna ma esis a'i basef endilisimi atom la'ifimi a'i, ‘Anona nemaf esis ina ata' sifi'i suwis sopoma noma'w solome, owa'.’ ”

Ape' mundumafuma andeande'. Na'ama mosambala basef Godi si'i esis Israel sanda'am

¹² Alupipei Ae'ipei, ipe' pindumafuma andeande'. Na'ama enin sahin owan ipe'isi okom ninila waf aonai nekwaha bale'ef ananinai newa' alafugama God nape la'ela'efi.

¹³ Na'ama owa'. Ipe' pendagigiambanama etin pitu la'ifipa. Penda'am na'ama etin nimeguf hiami atona etin nogota anae' God na'i, “Dei'.” Penda'am pilam ama pilam la'ela'ef. Na'ama enipa opalef ipe'imi la'ifima waf aonai baso'omainai.

¹⁴ Ape' fowa' mali' mombale'efana, ea' dei' mombale'efana la'ifipa la'ela'ef, mefe' motagama moga'. I'i ape' monda'am na'ama la'ela'ef, ape' amam nematawa endilisi Kraisi, mape la'ifipa malomana.

¹⁵ Si'i basef mail Baibeli do'ok a'ipipami ma'iam ma'i, “I'i ipe' dei' peme' basefa malogel Ananinai ipe' ina pesopama opalef ipe'imi la'ifim endilisi si'i fowa' pewa' alafugaha Goda panda' okom Ananinai wandafuna, owa'.”

¹⁶ Fowa' gani emi egafis same' basef malogel Godi sowa' alafugahana sanda' okom Ananinai wandafuna? Epes amama atom hiesi fowa' Moses nofa'asi sakwaha Isip safi'i, amama atom.

¹⁷ Afagof amama hiami 40-peleim God okom wandafuna ma emi? Anan okom wandafuna ma epes isima sanda' waf aonai saga' hi'alas etap anama wafiguma fatauguma, amama atom.

¹⁸ God na'i enis epes na'i basef endilisimi atom la'ifimi ma esis ina sefe' suwis sopoma noma'w solomana. Na'i emi egafis? Anan na'i amama atom.

¹⁹ Ea' dei' ape' mogawa esis ina anona nemaf la'ifisa sefe' suwis sopoma noma'w solomana, owa'. Dei' main, esis ina sembale'efana, owa'.