Hibrui 2 - Basef Buꞌwami Godi

God nofa'ai ape' motanimani mape andeande', amama lu'wami endilisi

¹ Jisas nikila' amam ensel endilisi. Amama atom dei' ape' mombale'efa basef amama Ananimi mame'am bo'om milam endilisi. Na'ama ape' motanima mokwahom.

² Fowa' gani God na'ipa amam ensela basef Ananimi, ea' ma'ipipam mandawalap endilisi mape la'ifim. Basef amama mape la'ifima emi egafis sosambala basef owa' silami, esis sofa' nimanimi amama mondahama waf aonai esis sanda'anai sosambala basef amama.

³ God nagwamasa nimanimi lu'wami esis sosambala basef Ananimi ensel amama ma'ipasami. Dei' ipe' ukup mape ma'imama? I'i pewa' alafugaha basef Ananimi dei' nagiambamapa nofa'apa mope andeande', anona nemaf ipe' pefa' pefe' pindihi'ama nimanimi amama pi'imama? Owa'. Pefa' nimanimi pelomas. Dei' main, amama nakwahomapa waf aonai nagiambamapa motanimani, ina so'umi, owa'. Lu'wami endilisi. Dembinai atona nali' nawalapam alihima enis epes. Epes isima sihi'ambapa ma mogawa basef amama endilisimi atom.

⁴ Ea' God nanda' basef amama la'ifima eaf hianai naninani. Anona eaf, nihi'ambasa ikwaf naninani hianai la'ifinai. Ea' anona eaf nanda' pepel lu'unai naninani si'i Anan atona nanda'anai. Ea' anona eaf na'ama, nihi'ambapa amamaga bu'wami Ambal Bu'unai Ananinai nase'apami, naila okom Ananinai atona nase'apam atona etin nihi'ambapa basef amama endilisimi atom.

Jisas nape nali'i Dembinai nofa'apa motanimani

⁵ God ina nanda' amam ensel mape dembemi mumafi amamaga lu'wami maloma waf hianai dambeinai Jisas nawalapam ea', dei' a'ipipami, owa'.

⁶ Ea' anom basef mail Baibeli fowa' anona aman nawalapam na'iam na'i, “God, epes esis emi egafis ma Ine' okom nainailas? Esis falafisi etis, ea' ine' etina nimafias.

⁷ Ine' nanda' amam ensel mape dambem la'ifima esis isima amam nematawa etapasi nogota bandana. Ine' nase'asa agof lu'wami nanda'asa sataga dambes.

⁸ Ea' nanda' amamaga hiami mafe' owina esis isima sumafiam.” Basef amama mail Baibeli ma'i, “God nanda' epes sape etapi sape dambes sumafi amamaga hiami mape etapi.” Basef amama ma'i amamaga hiami mape etapi ofagema ma'i amamaga hiami. Ea' dei' ina mati epes sape etapi sape dambes sumafi amamaga hiami, ata' owa'.

⁹ Ape' dei' mogawa Jisas! Fowa' nogota bandana God nanda'ana nafe' owina amam ensel. God nati ape' uwahipipa nagiambamapa na'a, dei' Jisas nefa' nimanimi lu'wami naga' ma ape' hiapai. Amama atom dei' God nase'ana agel lu'unai nanda'ana nataga Dembinai king nafifili endilisi.

¹⁰ God anan Dembinai fowa' gani nanda' amamaga hiami mataga mape numafiama pepel Ananinai mape andeande', Ananimi atom. Ea' andeande'ma Anan na'i Jisas nefa' nimanimi nanda' eaf ma nokwahomapa waf aonai ape' manda'anai nofa'apa motanimani. God nanda'am na'ama ma nokolasa ape' hiapai nofa'apa mefe' heven miti nafifili Ananinai.

¹¹ Anan atona nanda'apa amam nematawa mataga bo'wepa andeande' malomana wambota atotona Ahalomapa atotona. Amama atom dei' Anan ina ambal aona nofalapa na'i sahin owan Ananipai, owa'.

¹² Si'i Anan fowa' na'iam na'i, “God, Ae' anona nemaf ewalapa agel Ine'inai ma esis sahin owan ae'asi. Ae' enda' awalef efela agel ine'inai ma esis hiesi sifi'i sondowa'anima etifigin.”

¹³ Ea' na'iam wapoti' na'i, “Ae' embale'efa God la'ifiwi.” Ea' anom basef wapoti' na'iam na'i, “Ae' ape aloma awasi Ae'asi God nasi'iesi.”

Jisas nataga epen endilisi ma nagiambama ape' hiapai

¹⁴ Epes Anan nofalapa awasi ananipai, epes etapasi selapai. Amama atom Jisas wapoti' nataga epen na'ama etin si'i ape' epes etapasi selasi. Anan nataga epen na'ama ma naga' nohambombaga aman anama aonai Satan la'ifina nanda' epes hiesi saga'.

¹⁵ Jisas natagaha amam nematawa hiesi la'ela'ef umbamahasa ga', nahapilas la'ifis. Ea' Anan natagahisa umbamahas sape andeande'.

¹⁶ Dei' main, Anan ina naga' nagiambama amam ensel, owa'. Anan naga'ma nagiambama epes sataga wambota Abrahami.

¹⁷ Amama atom Anan nataga na'ama etin endilisi si'i owasana ananisi ma nataga pris dembinai nape nali'ma pris hiami. Anan aman na'i uwahipisa ape' nanda' maol Godi andeande' endilisi. Ea' Anan nataga si'i owasana Ananisi ma natofa okom wandafunai Godi napoma amam nematawa hiesi sanda' waf aonai.

¹⁸ Satan nagwambana nimeguf hiami na'i nonda'ana nonda' waf aonai. Ea' Jisas nofa' nimanimi hiami. Na'ama Anan la'ifinai ma nagiambama epes isima Satan nagwambasi.