Hibrui 13 - Basef Buꞌwami Godi

Ape' ukup mimila alupusi endilisi

¹ Ipe' Kristen, ukup mimila sahin owan ipe'isi la'ela'ef.

² Ipe' ina ukup mose'epama pigiambama epes anona wambelisi sifi'i ifagw ipe'imi, owa'. Ipe' pegawa, fowa' gani enis epes sanda' waf anama ma sagiambama enis epes, esis sofa' anom ensel safe' sumafiam ifagw asasimi. Esis ina sogawa sa'i amam ensel mafi'i, owa'. Sa'i enis epes etapasi.

³ Ipe' ukup mopoma esis alupusi sape sanda' kalabusi si'i ipe' panda' kalabus palomas. Ea' ukup mopoma epes isima sofa' nimanimi alop asasinai, pigiambamas si'i ipe' etipa pefa' nimanimi alop ipe'inai pelomas.

⁴ Ipe' amam nematawa pandase'ama ea'i, penda' waf anama notaga nope andeande'. Ipe' ina penda' waf aonai, owa'. Dei' main, ipe' pegawa anona nemaf God nogwamipei waf aonai ma amam nematawa sanda' waf so'a waulanai saloma amam nematawa isima sahambombaga waf sandaso'amainai.

⁵ Ipe' ina pila waf aonai anama ukup mohafel endilisi ma otamba, owa'. Amamaga ipe' pahapilami, amama ipe' ukup mopomam na'ama mi'i, “Amama andeande'. Amama nambimb dende'ma ape'.” Dei' main, God na'iam na'i, “Ae' ina anona nemaf okom nose'e ipe' ewa'epa alafuga, owa'.”

⁶ Ea' dei' ape' monda'apa motaga la'ifipa opalef ape'imi mi'iam na'ama mi'i, “Dembinai nagiambama ape'. Ea' ape' ina umbamahapa, owa'. Nambimb epes la'ifisa sonda' maina ape'? Owa'!”

Ape' mila waf amam agufumi mumafi esis Kristeni

⁷ Ipe' ukup mopoma amam agufumi ipe'imi fowa' mawalapa basef Godi ma ipe'. Ipe' ukup mopoma fe' bu'unai amamunai ea' pefe' pila waf amam membale'efa God.

⁸ Jisas Krais nape na'ama etin si'i nambati', dei' wapoti', ea' nope anona nemaf la'ela'ef hihif.

⁹ Ipe' pindumafuma andeande'. Na'ama anom basef hiami mamumami mufi'i momboma opalef ipe'imi ea' pekwaha eaf Godi. I'i ukup ape'imi la'ela'ef mopoma God nagiambamapa na'a, na'ama andeande'. Opalef ape'imi ina motaga la'ifima mila mi'uli epesi ma mea' gwa'aimi mamumami, owa'. Waf anama saila mi'uli anama ina nagiambama amam nematawa sailanai, owa'.

Amamaga God okom na'iami bu'wami ape' mondolalimanami

¹⁰ Ape' anona balata nape sondolalima Goda, anama Krais atona nase'ana alop ananinai si'ina nondolalimana nase'anana God. Ea' amam pris mondolalima God ipat anama selinai sanda' lotuwanai, amam ina la'ifima ma gwa'aimi ma balata anama, owa'.

¹¹ Pris anama dembinai nape nali' ma pris hiami anan atona nofa' esimbel amama nawis ipat nomon wa'ol, nape etina bo'wagon andeande' endilisi, nondolalima Goda nokwaha waf aonai epes sanda'anai. Ea' mafis alop si'ina mefa'ana mawisi manda' nif maofam ande'ma anama esis Israel sapoma.

¹² Amama atom Jisas wapoti' nofa' nimanimi naga' wambel endambel uta ande'ma nasa'opas nanda'as bo'wes andeande' ma esimbel ananimi.

¹³ Ea' dei' ape' wapoti' mefe'ma Anan endalelemb ande', ma monda' ambagof ape'imi aom si'i anan fowa' ambal aona.

¹⁴ Dei' main, ape' mogawa etap anae' ape' ina anona wambel taun nape la'ela'ef, owa'. Ape' dei' mape manda'am magolopa wambel taun anama anona nemaf na'i neatagai.

¹⁵ Amama atom dei' ape mefela agel Godi lu'una mose'ana danifela la'ela'efa agel Jisasi, monda'am na'ama si'i amamaga bu'wami mondolalimanami. Ape' mondolalimana na'ama. Mose'ana malogof ape'imi Anan ea' mowalapa basefa agel ananinai.

¹⁶ Ipe' ina ukup mose'epama penda' waf bu'unai esis amam nematawa, owa'. Ea' amamaga ma'oma ipe' pewalogam pese'ama tu'wanim epes isima amamaga a'asi. Dei' main, God okom na'iam endilisi waf anama si'i amamaga bu'wami ipe' paso'anama pindolalimanami.

¹⁷ Amam agufumi ipe'imi ma'i migiambamepa ea' mumafi ipe' la'ela'ef. Ama anona nemaf amam mowalapa basefa Goda maol hianai manda'ana mumafi ipe'. Amama atom dei' ipe' pila basef amamumi ea' pepe owina amam. I'i penda'am na'ama ma amam mondanifela monda' maol anama ma ukup amamumi ina aom mupan. I'i amam monda'ana moloma ukup awami, amama nambimb ina migiambamepa, owa'.

Beten bu'unai ma migiambamapa atona etin

¹⁸ Ipe' penda' betena God nigiambama afa'. Afa' ogawa basef mape opalef nomoni ma'iami ma'ipasa basef mihi'ambafa waf afa'inai ina aona, owa'. Ea' dei' wa'i wila waf bu'unai andeande' nimeguf hiami la'ela'ef.

¹⁹ Ae' okom na'i endilisi ma ipe' penda' betena God nigiambame ma nambimb etanima efe'mago ipe' mehip.

²⁰ God Anan ofagonama okom awanena. Anan nafela Dembinai ape'inai Jisas nohafel hi'agif wapoti'. Esimbel Jisasi malo manda' basef na'i endilisimi atom mape la'ela'ef motaga la'ifim. Esimbel anama atom Jisas nataga Dembinai numafi esis Kristen si'i amam mumafi sipsip.

²¹ Ae' a'i God nonda'epa la'ifipa nese'epa waf bu'unai hianai ipe' ma pila okom Ananinai atona. Ea' a'i Anan nonda' opalef ape'imi nomon ama mowalapa waf hianai bu'unai Anan okom na'inai ma pepel Jisas Kraisi atona. Ea' a'i epes hiesi sefela agel ananinai lu'una la'ela'ef hihif. Endilisi.

Anom basef tu'wanim

²² Ipe' alupipei, ae' a'ipipa basef la'ifimi, peme' basef anda'ami ma efela ukup ipe'imi enda'epa petaga la'ifipa. Dei' main, basef amama ae' anda'ama ipe', amama basef bandami atom.

²³ Ae' a'i ipe' pegawa esis sakwaha owalomapa ape'inai Timoti, ea' ina ata' nanda' kalabus, owa'. I'i anan nifi'i netagama ae' ulal, nambimb afa' biafa ofo'o etin utilipa.

²⁴ Ipe' penda'mago nemaf bu'unai afa'inai ma amam agufumi hiami ipe'imi molomago esis amam nematawa Godi hiesi. Esis Kristen alupusi sape Itali sanda'mepago nemaf bu'unai ipe'.

²⁵ Ae' a'i God nigiambamepa na'a ea' nope nolomago ipe' hipei nonda'epa la'ifipa.