Hibrui 12 - Basef Buꞌwami Godi

Ape' naep miti Jisas milana mombale'efana

¹ Dei' ape' monda' main? Epes fowa'isi sembale'efa Godi saitu salipapa si'i elagw lu'wami mase'alepa mindiwapapa sihi'ambapa waf sembale'efanai. Amama atom ape' dei' mokwaha amamaga amama manda' ape' nimanipai maloma waf aonai nowa'apai. Ea' monda' opalef ape'imi la'ifima mosagih mehip ma sagih bu'unai anama God nandandepana musagihanai meataga ikwaf.

² Naep ape'imi miti Jisas atona anan ofagonama bale'ef ape'inai, nowataniana netaga andeande'ma mombale'efana la'ifipa la'ela'ef mope. Fowa' Anan okom napoma danifela anona nemaf na'i nofa'anai, dei' naitu la'ifina. Ea' nefa' lawag usi'inai tu'wanainai naga'. Anan okom napoma nambimb nofa' nimanimi lu'wami noga' lawag anama, amama falafumi atom. Anan ina umbamahana ma ga' anama, owa'. Ea' dei' nape felefele'ma sia bu'unai Godi lagel da'isinai.

God nase'apa nimanimi ape' ma nonda'apa mila basef ananimi

³ Ipe' ukup mi'i andeande'ma nimanimi amama fowa' nofa'ami. Epes isima sanda' waf aonai sowa'ana alafugah Jisas endilisi sanda'ana kwapete'ana. Ea' Anan naitu la'ifina endilisi. Ipe' ukup mopoma amama ma ina ala'uta nepa, owa'. Pepe la'ifipa.

⁴ Ipe' papa' paloma waf aonai ma pahagofana, ea' ipe' ina dei' papa' pafe' patagama wandaf lu'unai sahepa esimbel malipa paga', ata' owa'.

⁵ A'i ipe' ukup mase'epa ma basef amama God nanda'ama ipe' ma nefela ukup ipe'imi nenda'epa petaga la'ifipa? Anan dei' nofalepa batausana Ananipei na'i, “Awasi ae'ipei, maina nemaf Dembinai nese'epa nimanimi ma nonda'epa pila basef ananimi, ipe' ina pi'i nimanimi amama anan nase'epami falafumi, owa'. Maina nemaf ni'i nese'epa nimanimi amama, ukup ipe'imi ina aom, owa'.

⁶ Dei' main, emi egafis Dembinai okom nainailas endilisi Anan nanda'as na'ama etina sonda' waf Ananinai bu'unai. Ea' emi egafis Dembinai numafias ni'i awasi ananisi, nahas nonda'as sila waf bu'unai wapoti' ma sogawana andeande' silana.”

⁷ Maina nemaf nimanimi lu'wami meatagamepa, ipe' pitu la'ifipa pi'i aho'ma God nonda'epa pila basef ananimi. Anan nanda'mepa waf anama si'i awasi Ananisi. Dei' main, ahapas amamusi ina mape matilis sanda' waf aonai, owa'.

⁸ Ahapas hiesi mahas manda'asa some' basef silam sope andeande'. I'i ahapepa owa' monda'epa pila basef amamumi, ipe' ina awasi amamupei endilisi, owa'. Ipe' si'i pataga etina amam hiami.

⁹ Ipe' ukup mopoma anom basef wapoti' amama. Ape' etapipai hiapai ahapapa ape'imi manda'apa mila basef amamumi ea' manifelom mefela agof amamumi. Amama atom dei' ape' andeande'ma mofe' owina Ahalomapa nape ilifi numafi ambagof ape'imi ma mofa' ambal namunai.

¹⁰ Amam ahapapa ape'imi etapami manda'apa maila basef amamumi nogota bandana atona, mandahama ukup amamumi. Ea' God nanda'apa mail basef ananimi ma nagiambamapa endilisi ma mofa' waf bu'unai Ananinai atona andeande'.

¹¹ Ahalomapa nase'apa nimanimi ma nanda'apa mail basef ananimi, nemaf anama ape' ina mandanifel, owa'. Ukup ape'imi aom endilisi. Nahapa ma monda' waf bu'unai. Atuwasi monda' waf bu'unai atona, opalef ape'imi mope awanem.

Ape' mitu la'ifipa endilisi

¹² Ipe' dowa lagof ipe'imi ama nigis la'ifima penda' maol Godi. I'i nembawa bo'wagah ipe'imi ekep pehepa, bo'wagah mokwaepa, ipe' dowam mehip pitu la'ifipa endilisi.

¹³ Ipe' penda' eaf ipe'inai bo'ona nefe'. Ama nambimb epes bo'wagah awomisi ina awes hi'ilas, owa'. Nambimb sotaga bo'wes wapoti'.

¹⁴ Ipe' dei' penda' maol la'ifipa ma pila waf opalef mope awanem peloma epes hiesi. Ea' pila waf anama bu'unai andeande', pepe Dembinai ananipei etipa endilisi. Epen waf anama a'ani, anona nemaf enin ina niti Dembinai, owa'.

¹⁵ Ipe' pindumafuma andeande'. Na'ama enin alupini ipe'ini newa ma waf aonai nelolama God nigiambaman etina nefa'an netanimani nepe andeande'. Na'ama enin alupini ipe'ini nenda' waf aonai si'i lawag aonai nail nola gwa'aimi awami, ea' nese'epa nimanimi ipe' nenda' ipe' hipei petaga awepa ma naep Godi.

¹⁶ Na'ama enin epen atitin nila waf aonai so'a waulanai. Ipe' pindumafuma andeande'. Na'ama enin epen atitin nese'ana alafuga God si'i fowa' Iso nanda'ama natala gwa'aimi nogota bandana ea' nakwaha amamaga bu'wami ahalomana nandondombam ma'omanai.

¹⁷ Ipe' pegawa, Iso na'i notambel nefe'ma nofa' amamaga amama bu'wami ea' God na'i owa'. Iso napoma lef atona nofa'ai amamaga amama, ea' owa'. Eaf a'ana ma notanima nomboma okom nowa' alafugama waf aonai wapoti'.

Ape' mataga ma halaf bu'unai Saion

¹⁸ Dei' ipe' ina pataga pape felefele'ma anom amamaga patolom pahapilam lagof ipe'imi, si'i halaf anama Sainai, owa'. Halaf anama nif lu'wami maloma owamb lu'unai endilisi naloma uf lu'unai la'ifinai

¹⁹ naloma alof nalef naloma anona malogel na'i basef. Esis amam nematawa Juda same' malogel anama nanda' basef, esis umbamahas sa'ipa Moses basef la'ifimi na'ama sa'i, “Ape' mandaiwa' ma meme'ana wapoti'.”

²⁰ Dei' main, esis umbamahas endilisi ma basef amama God na'ipasami. Anan na'i na'ama na'i, “I'i enin epen o anona mafin nefe' felefele'ma halaf anama, ipe' pehan otamba ma noga'.”

²¹ Esis umbamahas kwapete' endilisi ma amamaga amama satolomi. Amamaga amama lu'wami endilisi manda' Moses umbamahana kwapete'ana ma natolom. Ea' na'i, “Ae' umbamahe kwapete'e ma atolom.”

²² Ipe' ina pataga ma amamaga amama, owa'. Ipe' pataga halaf Saion, wambel lu'unai taun God nape namunai la'ela'ef. Anama Jerusalem dambaiguma nape heven. Ipe' patagama ensel hiami endilisi mandatama mape mandanifel.

²³ Ipe' pafi'i pandakolas paloma epes Godi, awasi ananisi sali'i. God nanda' agof asasimi mape wambel anama ilif. Ipe' pafi'i felefele'ma God, anan jas nowaloga epes hiesi saloma ambagof epes fowa' God na'i bo'wes andeande'.

²⁴ Ea' pafi'i felefele'ma Jisas, Anan nape la'afen numafi basef dambaimi God na'i endilisimi atom. Ea' pafi'i esimbel ananimi fowa' neali'ama ipe', nanda' basef amama mataga la'ifim. Esimbel amama mawalapa anona eaf bu'unai endilisi. Basefa eaf anama nikila' endilisi basef Abeli. Dei' main, basefa esimbel Abeli mofala Goda nogwa waf aonai. Ea' esimbel Jisasi atom God nakwaha waf aonai epes sanda'anai.

Ape' mundumafuma andeande'

²⁵ Ipe' pindumafuma andeande'. Na'ama pewa' alafugaha aman anama dei' na'i. Fowa' gani etap anae' God na'ipasa basef la'ifimi endilisi esis amam nematawa, ea' sesambala basef ananimi. Nogota anama fowa' sesambalom, esis ina la'ifisa sofa' sefe' sindihi'ama okom wandafunai Godi, owa'. Fowa' God na'iam etap anae' ea' dei' nape heven na'i basef la'ifimi endilisi ma ape'. I'i ape' mowa' alafugaha Anan, anona nemaf ape' wapoti' ina la'ifipa ma mofa' mefe' mindihi'ama okom wandafunai Ananinai, owa'.

²⁶ Fowa' God nase'ana mi'uli ananinai Moses, malogel ananinai nakoto'ma etap anae'. Ea' dei' na'ipapa na'i, “Owagama anona nemaf ae' ekoto'ma etap wapoti'. Ina ekoto'ma etap atona, owa'. Ekoto'ma etap noloma heven ilif wapoti'.”

²⁷ Basef amama ma'i, “Anona nemaf wapoti',” mihi'ambapa na'ama. Amamaga fowa' God nanda'ami anona nemaf nokoto'mam mefe' hegililam hi'ilam. Ea' anom amamaga bu'wami ma pe bu'unai ina mokoto'ami, amama la'ifim mope la'ela'ef.

²⁸ Amama atom ape' minifela God. Dei' main, dei' ape' felefele' muwis numafiapa wambel Godi, anama epes ina la'ifisa sokoto'magon, owa'. Ape' monda' lotumana mefela agel ananinai umbamohapa ma mila okom ananinai atona.

²⁹ Dei' main, God ape' manda' lotumanai, Anan si'i nif lu'wami fando amamaga awami hi'alam.