Hibrui 11 - Basef Buꞌwami Godi

Waf ofagena ma mombale'efa God

¹ Waf ofagena ma ape' mombale'efa God na'ama. Opalef ape'imi mahapila amamaga amama ape' mombale'efana mape mohafama anona nemaf nigi' neatagai noloma anom amamaga anona nemaf God niese'apami. Amamaga amama naep ape'imi owa' meatilumi, opalef ape'imi mogawa endilisi amamaga amama mape.

² Amam fowa'imi mombale'efa God na'ama, amama atom dei' Anan na'iam na'i, “Waf amamunai bo'ona.”

³ Ape' mombale'efa God, amama atom dei' mogawa Anan nanda' amamaga mape ilif etapi matagama basef Ananimi atom. Ea' ape' mogawa amamaga hiami ape' matulumi, amama God nanda'ama amamaga amama ape' owa' meatoloma naep ape'imi.

Abel naloma Enok naloma Noa mombale'efa God

⁴ Abel nembale'efa God. Amama atom dei' nefa'ai anom amamaga nondolalima Godami bo'om endilisi mikila' amama Kein nondolalima Godami. Abel nembale'efa God, amama atom God na'i anan epen bu'unai. God na'i aho'ma amamaga Abel nondolalimanami na'i amamaga amama bo'om. Abel naga' ea', waf anan nembale'efa Godanai si'i malogel ata' nihi'ambapa waf bu'unai la'ela'ef nape.

⁵ Enok nembale'efa God dei' God nefa'ana nafe' nalata ilif heven. Anan ina naga', owa'. Epes sagolopana sa'i siti anan, ea' ina satolona, owa'. Dei' main, God nefa'ana. Amama na'ama etin si'i buk Baibel na'iam na'i, “Fowa' God ata' owa' nefa'ana, nemaf anama Enok nali' naila okom Godi.”

⁶ Epes owa' sembale'efa God, esis ina nambimb sila okom Ananinai, owa'. Dei' main, emi egafis si'i sefe' felefele'ma God, esis sombale'efana sogawa endilisi Anan nape namunai la'ela'ef. Ea' sembale'efana ma God nose'as amamaga bu'wami epes isima sagolopana endilisi.

⁷ Noa nembale'efa God dei' nihi'ambana basefa amamaga anona nemaf migi' meatagai, amamaga amama Anan owa' ata' notolom nogowami. Anan naila basef Godi nanda' anona sip lu'unai. Sip anama Noa nao'wa akwa'w kwaloma awasi ananisi safe' sawis sapaina sape andeande'. Ina saga', owa'. Sapan. Anan nembale'efa God. Amama atom si'i nanda'masa basefa esis amam nematawa sape etapi hi'alas. Anan nembale'efa God. Amama atom God nofalana na'i aman bu'unai andeande', si'i nanda'masam emi egafis sembale'efana.

Abraham

⁸ Nemaf anama God nofala Abraham nakwaha wambel ananinai nafe' etap God na'i nease'anagoma ea' anan nembale'efana. Amama atom naila basef Godi nafe'. Anan ina nagawa anama neafe'ma, owa'. Ea' anan nembale'efana dei' nafe'.

⁹ Anan nembale'efa God ea' nafe' nape etap anama fowa' gani God na'i basef endilisimi atom na'i nease'anagoma. Anan nape etap anama si'i anan anona wambota. Nape ifagw selimi naloma Aisak naloma Jekop, amam biam anona nemaf mofa' etap anama molomanai, si'i fowa' God nali' na'i basef amama na'i endilisimi atom.

¹⁰ La'ela'ef Abraham okom na'i ata' niti wambel taun anama gani ilif olalef maim la'ifimi motawa. God atona gawainai Anan okom na'i nonda' wambel anama, ea' nanda'ana.

¹¹ Sara akwa'w asa'w ea' ina kola awasi, owa'. Nemaf kola awasianai nafe' hi'alana. Ea' akwa'w kombale'efa God. Amama atom dei' God nanda'akw la'ifikwa kola awani. Dei' main, akwa'w kombale'efana endilisi ma basef amama anan na'i endilisimi atom, kwa'i anan nambimb nigi'mam nonda'am andeande' si'i na'iam.

¹² Ea' dei' aman anama atotona, anan hagona ea' felefele'ma neaga' nataga ahalomas awasi ananisi hiesi endilisi anona nemaf sigi' seatagai. Esis sataga hiesi endilisi, sondahama ondowa motawa ilifi, maloma wesan na'oh naoh akata. Epes ina la'ifisa seambam, owa'.

¹³ Epes isima sembale'efa God la'ela'ef sape safe'ma saga'. Ina sali' sofa' amamaga bu'wami amama God na'i endilisi niese'asami nemaf anama sape, ata' owa'. Esis sembale'efana endilisi saitu laogon sandanifel si'i satolom. Ea' sawalapa basef sa'iam sa'i, “Ape' mape etap anae' si'i epes anona wambelipai. Ape' mafi'i mape nogota bandana etap anae' anona wambelipai.”

¹⁴ Epes sa'i basef amama, ape' mogawas sa'i sogolopa etap asasinai endilisinai.

¹⁵ I'i ukup asasimi ata' mape ma'i wambel anama fowa' sakwahona safi'i, dei' esis ata' eaf nafe' sotanima sefe'agon. Owa', sandaiwa'.

¹⁶ Ea' dei' esis ina sanda'am na'ama, owa'. Opalef asasimi mohafa anona etap bu'unai endilisi nikila' anama fowa'iguma. Anama heven atogon. Amama atom dei' God ina ambal aona ma epes isima sa'i, “Ine' God ape' manda' lotumanai, owa'.” Anan nandomba anona wambel taun ma epes isima sembale'efanai sofe' seapoma.

¹⁷ Abraham nembale'efa God endilisi ma basef amama na'i endilisimi atom nalomanomi. Ea' dei' God nagwamba Abrahama nese'ana Aisak nondolalimana ma God. Endilisi, Abraham nape nohafa noha nogalomana ananinai nondolalimana.

¹⁸ Ea' God nali' na'ipana na'i, “Esis wambota Aisaki etis anona nemaf sofa' agel wambota ine'inai.”

¹⁹ Abraham okom na'i na'ama na'i, “I'i ae' ehana afuna, ea' hapainai, nambimb God nefelona wapoti'.” Ea' dei' ape' mi'iam mi'i amama si'i God nafela Aisak netanima nohafel hi'agif wapoti' ma Abraham notanima nofa'ana.

Aisak naloma Jekop naloma Josep

²⁰ Aisak nembale'efa God. Amama atom dei' nefalo'ma Jekop naloma Iso na'i God nonda'am la'ifima amamaga bu'wami na'i anona nemaf migi' meatagai.

²¹ Jekop nembale'efa God, dei' nemaf anama felefele'ma na'i neaga', nefalo'ma nogamana Josepi biam nanda'am mataga la'ifim. Anan nahapila bandan nandaha'amon naitu nandanifel ma God nanda' lotumana.

²² Josep nembale'efa God. Amama atom dei' felefele'ma na'i neaga' anan na'i basefa anona nemaf esis Israel sokwaha etap hiagoma Isip sefe'. Ea' na'ipasa sowa bihiguf alop ananimi hi'agif gani anona etap esis Israel sefe' seapoma.

Moses

²³ Mamasana Mosesi sembale'efa God. Amama atom dei' mama'wana kolana sambahe'ana nape aomb wanom. Dei' main, esis bias satolona bo'ona endilisi. Esis ina umbamahasa King dembinai Fero ma mi'uli ananinai, owa'.

²⁴ Nemaf anama Moses nataga dembena, nembale'efa God. Amama atom dei' okom na'i nandaiwa'ma esis sofalana si'i nemata'w akwama King Fero nogaloma'w, owa'.

²⁵ Na'i nefa' nimanimi na'ama etin neloma esis wambota atona Godi. Nandaiwa'ma nila waf aonai ma nope nondanifel nogota anama bandana.

²⁶ Anan okom na'i, i'i anan nofa' ambal aonai ma agel Kraisi, amama bu'wami endilisi mikila' otamba hiami maloma sosaf bu'unai hianai naninani esis Isipi. Dei' main, anan okom napoma amamaga amama bu'wami endilisi anona nemaf God na'i endilisi niese'anami.

²⁷ Moses nembale'efa God. Amama atom dei' nohafel nakwaha etap hiagoma Isip. Anan ina umbamahana ma okom wandafunai King Feroi, owa'. Anan si'i nati aman anama esis owa' la'ifisa seatolona naep asasimi. Ea' dei' nape la'ifina.

²⁸ Anan nembale'efa God dei' naila basef Ananimi ma gwa'aimi amama lu'wami Pasova, naha sipsip nanda' lotuma God. Ea' nanda' esimbel nandisam utagw ilif wa'owa'ol nemaf anama ensel anama noha awasi amam esis Isipi ina atuwasi noha esis Israel, owa'.

Esis Israel hiesi endilisi sombale'efa God la'ifis

²⁹ Esis Israel sombale'efa God. Amama atom dei' satopa' naoh agilima Embel Akwahimi matopa' embel mambo safe' akata si'i etap fatauguma. Ea' esis Isip sati esis saitu la'afen, sagi'mas safe' ea' embel motanima mowambu'as mahas saga' hi'alas.

³⁰ Esis Israel sombale'efa God, amama atom dei' safe' tulif sandanogamom endalelemb sanda' otamba sanda'ami wambel Jeriko sape wik si'inai, nimeguf 7-peleim, ea' endalelemb amama mandatal mowa etap.

³¹ Nemata'w akwama kwanda' so'a waola amami Rahap, akwa'w kombale'efa God. Amama atom dei' amam biam mandambaho' mafi'i matologini kumafiam andeande'. Ea' dei' akwa'w ina afu'w kwaloma epes isima wambelisi sosambala basef Godi, owa'.

³² Ea' dei' ae' ata' iwatani maim basef wapoti'? Owa'. Nogota ina laona ma ata' i'i basefa Gideon, Barak, Samson, Jepta, Devit naloma Samuel maloma amam profet, owa'.

³³ Amam amama membale'efa God. Amama atom dei' maitu la'ifim mikila' wandaf mahagofa soldia amam king dembemi hiami. Mape dembemi mumafiasa waf bu'unai ea' mofa' amamaga bu'wami God na'i niese'amami. Ea' masopama malogofa mafis amama laion wandafumi lu'wami.

³⁴ Ea' mahefa nif lu'wami fandumi. Amam mafa' mafe'ma mindihi'ama bainah ea' ina mapisilam, owa'. Amam ina mape la'ifim, ea' nambimb mofa' pepel Godi. Ea' mataga la'ifim endilisi ma wandaf mahagofa amam soldia hiami epes esis anona wambota.

³⁵ Anom amam maga'i motanima mohafel wapoti', mamasas amamuwai watolom wao'wam. Enis epes sanda' kalabus ea' esis naumbih sahambombaga alop asasinai endilisi, felefele'ma seaga'. I'i esis sila basef asasimi, nambimb sokwahis sefe' wafifis. Owa', esis ina saila basef asasimi, owa'. Esis ukup mapoma anona nemaf sotanima sohafel hi'agif sofa' ambal namunai, na'ama andeande' endilisi.

³⁶ Enis sofa' nimanimi ma esis naumbih sa'i basef findiwaimi ma esis, sahas endilisi. Ea' enis sowa'as sen sanda'as sape sanda' kalabus.

³⁷ Enis, naumbih sakwaha otamba sahas afis. Ea' enis, sanda'as awes endilisi. Enis sofa' so satopa'as alop asasinai biefis etis. Ea' enis, sahas bainah saga'. Ea' enis sembale'efa Godi sowaho' alop mafis sipsipi meme si'i luwaguf safe'. Esis amamaga hiami a'asa alop asasinai. Ea' naumbih sanda'mas waf aonai endilisi sase'as nimanimi.

³⁸ Ea' dei' safa' safe' ganigani sandambaho' etap wafiguma epes a'agoma. Enis sandambaho' etap magali, halafutagw, enis sandambaho' otamba lu'wami magal mawis nomoni, ea' etap fetauguma. Esis amam nematawa bo'wes endilisi. Amama atom dei' epes etapasi ina bo'wesa sope solomas, owa'.

³⁹ Epes isima hiesi sembale'efa God. Amama atom dei' sefa' agof bu'wami ma naep ananimi. Ea' esis ina dei' sofa' amamaga amama bu'wami fowa' God na'iam endilisi niese'asami, ata' owa'.

⁴⁰ Dei' main, fowa' gani God okom na'i nandondomba anom amamaga bu'wami endilisi ma ape'. Amamaga amama mikila' amamaga esis fowa'isi sembale'efanai sa'i sofa'ami. God nanda'am na'ama ma anona nemaf esis sotaga bo'wes endilisi sofa'am solomapa.