Hibrui 10 - Basef Buꞌwami Godi

Amamaga gwa'aimi mafis maim apimi mondolalima God mase'anami, amama ina la'ifima mokwaha waf aonai, owa'

¹ Ape' mati mi'uli fowa' God naso' Mosesanai nondola'wif etina amamaga bu'wami ma'i anona nemaf migi' meatagai. Amamaga amama apimi ina endilisimi, owa'. Amama mondola'wif etin. Ea' dei' mi'uli anama na'i esis ata' sondolalima God afagof hiami, ina la'ifina nonda'as sifi'i felefele'ma God sondolalimana ma sotaga bo'wes endilisi, owa'.

² I'i mi'uli anama nenda'as bo'wes endilisi, dei' ina ata' sondolalima God wapoti', owa'. Ea' owa'etin. I'i esis sifi'i sonda' lotumana sotaga bo'wes sondolalimana etin, basef mape opalef nomoni ina mihi'ambasa waf aonai esis sanda'anai, owa'. Ea' owa'etin.

³ Afagof hiami amamaga mafis maim sondolalima Godami mafela ukup asasimi ma sogawa waf aonai esis sanda'anai la'ela'ef napomas.

⁴ Esimbel bulmakau noganai maloma meme ina la'ifima mokwaha waf aonai esis sanda'anai, owa'.

⁵ Ea' nemaf anama Krais nafi'i etap anae' Anan na'ipa God na'i, “Ine' nandaiwa'ma esis soha mafis sofa'ai amamaga maim sifi'i sondolalima ine', owa'. Ea' ine' nandondomba anona alopa nese'eana Ae'.

⁶ Mafis saham afum sondolalima ine' maloma amamaga mafis maim sondolalima ine'ami ma nokwaha waf aonai epes sonda'anai, amama ine' nandaiwa'mam.

⁷ Anom nemeguf mafe'ma ea', Ae' a'i, ‘God, ine' dei' netolowe. Si'i fowa' amam profet manda' basef mail buk ma'iama Ae', dei' afi'i ma ila okom ine'inai atona.’ ”

⁸ Krais nali' ata' na'ipa God na'i, “Ine' nandaiwa'ma mafis maim saham sanda'am sandolalima ine' balata sondolalima ine'anai. Mafis maim amama sondolalima ine', ine' nandaiwa'mam.” Ea' mi'uli God fowa' naso' Mosesanai na'i esis sondolalimana etin sope la'ela'ef.

⁹ Ea' Krais nagi' na'ipa God na'i, “Ine' netolowe. Ae' afi'i ma ila okom ine'inai atona.” Ea' dei' God natofa mafis maim fowa'imi mali'i sondolalima Ananami. Ea' dei' nahapona waf anama Krais naila okom Godi atona nape la'ifina naho'ofa amama fowa'imi.

¹⁰ Jisas Krais naila okom Godi atona andeande' nase'ana alop ananinai nondolalimana nemaf atotona ea' ma'um. Amama atom dei' nanda'apa mataga bu'upai Ananipai atepa.

¹¹ Amam pris hiami maitu manda' maol mondolali ma God manda'ana nimeguf hiami. Ea' ofa anama amam manda'anai ina la'ifina nakwaha waf aonai epes sanda'anai, owa'.

¹² Ea' aman anama nonda' ofa nemaf atotona, nase'ana Anan atona nondolalima Goda nakwaha waf aonai epes sanda'anai, amama mape la'ela'ef. Anan nanda'am na'ama ma ea', dei' nape naloma God lagel da'isinai Ananinai.

¹³ Anan nape na'ama la'ela'ef nape nohafa nemaf anama God nonda' naumbih Ananisi sope owina bo'wagah ananimi.

¹⁴ Dei' main, Krais nase'ana alop ananinai atona God nondolalimana nemaf atotona, ea' amama atom nanda' epes sataga bo'wes andeande' sope la'ela'ef. Epes isima Anan dei' nape la'ela'ef nanda'as anona nemaf sotaga bo'wes andeande'.

¹⁵ Ea' Ambal Bu'unai Godi wapoti' nawalapa basefa ape' na'ama nali' na'i,

¹⁶ “Dembinai na'i, nogota anama ata' hi'ilana nili', ae' i'i anom basef endilisimi. Basef amama na'ama. Anona nemaf ae' enda' mi'uli Ae'anai hianai nepe opalef asasimi ea' enda'ana nil ukup asasimi.”

¹⁷ Ea' nagi' nowatani basef amama na'i, “Ae' ina anona nemaf okokoma waf aonai esis sanda'anai, owa'.”

¹⁸ God nakwaha waf aonai epes sanda'anai nakwahona ea'. Dei' maol anama sofa'ai mafis maim sondolali ma Goda waf aonai epes sanda'anai owa' endilisi.

Ape' mombale'efa God endilisi mofe' felefele'ma Anan

¹⁹ Ea' dei' ipe' alupipei, esimbel Jisasi atom dei' ape' ukup la'ifim. Ea' owa' umbamehepa ma mofe' muwis nomon anama God napoma bo'wagoma andeande' endilisi.

²⁰ Ea' dei' mofe' muwis anama eaf anama dambainai ambal namunai napoma. Eaf anama Jisas atona nawala lowaf anama lu'unai notaol si'i uta nandoga eaf nogal nawis nomon. Lowaf anama alop Ananinai atona.

²¹ Dei' ape' anona dembinai pris numafi amam nematawa Godi. Anama Jisas atona.

²² Amama atom dei' ape' mofe' felefele'ma Goda waf anama. Ape' mokwaha waf hianai baso'mainai ma opalef ape'imi ea' mombale'efana endilisi. Ukup mopoma Krais atona, Anan nakolo' esimbel Ananimi nasa'opa opalef ape'imi mataga bo'om. Basef mape opalef nomoni ina ma'iam ma'ipapa basef mihi'ambapa waf aonai ape' manda'anai, owa'. Ea' ape' ukup mopoma Anan nasa'opa alop ape'inai embel galagami.

²³ Ape' mombale'efana la'ifipa muwalipas alihima amamaga bu'wami ape' mape mohafami. Amama ape' mohapilam la'ifipa, ina motanima, owa'. Dei' main, ape' mogawa maim amamaga God na'i basef endilisimi atom nambimb nigi'mam nonda'am andeande'.

²⁴ Ape' mefela ukup esis sahin owan ma ukup mimila esis amam nematawa ea' sonda' waf bu'unai.

²⁵ Ape' ina ukup mose'apama waf mandakolas maloma esis alupusi si'i enis epes sanda'am, owa'. Ape' monda' ape' la'ifipa monda'am la'ela'ef mikila' fowa' manda'am. Dei' main, ipe' pegawa nemaf Dembinai niefi'ianai nafi'i felefele'.

Ape' ina mowa' alafugaha nogalomana Godi, owa'

²⁶ I'i ape' mogawa basef endilisimi ma dei' ape' mila ukup ape'imi atoma mofe' monda' waf aonai la'ela'ef, i'i monda'am na'ama, ina anona nemaf anona ofa nokwaha waf aonai ape' manda'anai, owa'.

²⁷ I'i ape' monda'am na'ama, nambimb ape' umbamohapa endilisi mope mohafa nemaf anama God nowaloga ape' ma nosapa'apa mofe' nif lu'wami fandumi. Nif amama anona nemaf fendo naumbih Godi.

²⁸ Ea' ape' mogawa, emi egafis simbisila' mi'uli anama God fowa' naso' Mosesanai, ma epes bias o wenis sitilis sowalapa waf aonai esis sanda'anai, esis ina nambimb siti esis uwahipis, owa'. Esis sola'apas sohas soga'.

²⁹ Dei' ipe' ukup mape ma'imama ma emi egafis sowa' alafugaha Nogalomana Godi? Epes isima anona nemaf sofa' nimanimi lu'wami endilisi mikila' epes isima sambisila' mi'uli anama God fowa' naso' Mosesanai. Esimbel Kraisi anona ikwafa basef God na'i endilisimi atom manda' epes isima Ananisi etis bo'wes. Ea' epes isima sanda'am na'ama sa'i esimbel amama Kraisi falafumi atom, sa'i ga' Kraisi falafunai atona. Ea' sanda' basef findiwama Ambal Bu'unai Godi nagiambapa na'a numafiapa.

³⁰ Dei' main, ape' mogawa aman anama na'i, “Waf pegwa waf aonai, maol ae'anai. Ae' atowe anona nemaf egwamasam.” Ea' na'iam wapoti' na'i, “Ae' atowe Dembiwei anona nemaf ewaloga esis amam nematawa ae'asi ma basef lu'wami.”

³¹ I'i God la'ifina nape namunai la'ela'ef nohapila ape' la'ifina ma nogwamapa waf aonai ape' manda'anai, amama dei' umbamahepa endilisi.

Ape' mitu la'ifipa mombale'efa God

³² Ea' ipe' ukup mopoma nemaf anama fowa', ipe' pati nafifili Godi. Nemaf anama ipe' pefa' nimanimi lu'wami endilisi. Owa'etin. Paitu la'ifipa ma pali'amona wandafa waf aonai.

³³ Anom nimeguf sanda'epa paitu la'afena naep amam nematawa hiesi sanda' basef awami findiwama ipe', sase'epa nimanimi lu'wami naep asasimi. Ea' anom nimeguf sanda'am na'ama etina enis amam nematawa, ipe' paitu palomas pagiambamas.

³⁴ Nemaf anama ipe' pati esis amam nematawa sape kalabusi uwahipis pefa' nimanimi palomas. Ea' nemaf anama esis salo' lagofepa sefa' amamaga ipe'imi, ipe' pandanifel ma faso'mepa pape patilis. Dei' main, ipe' pegawa amamaga ipe'imi bu'wami endilisi ata' ma'omepa, amama anona nemaf mupe la'ela'ef. Amama mikila' endilisi amamaga amama sali' sanda'mepami.

³⁵ Ea' dei' ipe' ina pekwaha waf bu'unai paitu la'ifipa, owa'. Waf bu'unai anama atona, God anona nemaf nogwamepa amamaga bu'wami ma ipe'.

³⁶ Ipe' pitu la'ifipa ma pila okom Godi ma pefa' amamaga bu'wami fowa' Anan na'iam endilisi ma niesi'ipami.

³⁷ Ina ata' nogota laona. Nogota bandana ea', “Ama aman anama na'i niefi'i, anan nambimb nifi'i. Anan ina ata' nupani, owa'.

³⁸ Ea' epes bu'wasi Ae'asi ofagema ma sope namis la'ela'ef na'ama. Esis sombale'efa ae'. Emi epen netanima nekwaha nembale'efa Ae', okom Ae'anai ina bo'ona ma enin, owa'.”

³⁹ Ape' ina epes umbamahapa matanima mefe' makwaha mombale'efa God ama owagama higililapa, owa'. Ape' epes mombale'efana mofa' ambal namunai mope andeande' la'ela'ef.