Hibrui 1 - Basef Buꞌwami Godi

Dei' malogel Nogalomana Godi na'ipapa basef

¹ Fowa' gani God na'ipa akusapa bafasapa ape'isi na'ama, na'ipasa basef ananimi nimeguf atona etin na'ipa amam profeta eaf hianai mawalipas ma'ipasam.

² Ea' dei' nogota anae' si'i nogota anama anona nemaf nigi' neatagai endilisi, nawalapa basef na'ipapa malogel Nogalomana Ananinai. God nandandepana ma nemaf akutainai Anan nope Dembinaima amamaga hiami ma etap anae' moloma esis amam nematawa wapoti'. Anan atona nofa'am numafiam. Fowa' gani God na'i Nogalomana Ananinai nanda' amamaga hiami ambagof mapaimi maloma ambagof a'ami mape ilif etapi hi'alam mataga mape.

³ Nogalomana atona nafifili lu'unai Godi nafifimapa endilisi. Anan na'ama etin si'i God endilisinai. Anan na'i basef Ananimi la'ifimi atom ea' dei' amamaga amama hiami maloma amam nematawa hiesi sataga la'ifis. Anan atona nasa'opapa ma waf aonai ape' manda'anai mataga bo'wepa andeande. Nanda'am ea', dei' nape lagel da'isinai Godi gani ilif heven God la'ifinai numafi amamaga hiami.

⁴ Amama atom dei' nataga Dembinai endilisi nikila' amam ensel hiami. Dei' main, agel anama nofa'ana Ahalomana nikila' agof amam enseli bo'ona endilisi.

⁵ Dei' main, fowa' God ina na'ipa anona ensel Ananinai na'i, “Ine' nogalome ae'inai, ae' dei' ataga Ahalomena ine'iwei endilisi,” owa'. Basef amama fowa' God na'ipa Nogalomana Ananinai atona. Ea' God na'iam wapoti' na'i, “Ae' nambimb etaga Ahalomana Ananiwei, Anan nope Nogalome Ae'anai.” God ina na'ipa anona ensela basef amama, owa'. Na'ipa Nogalomana Ananinai atona.

⁶ God na'ipa Nogalomana Ananinai nape nali'ma amamaga hiami. Ea' nemaf anama God na'i Nogalomana Ananinai nataga etap anae' na'iam wapoti' na'i, “Amam ensel Ae'ami hiami monda' lotu ma Anan atona.”

⁷ Ea' basef amama God na'ipa amam ensel na'ama na'i, “Anan nanda' amam ensel mataga si'i uf, nanda'am manda' maol Ananinai mataga si'i nif fandom ilelowa mataga.”

⁸ Ea' God na'ipa Nogalomana Ananinai na'ipana na'i, “God, ine' nape la'ifinai Dembinai numafi amamaga hiami, ea' anona nemaf nepe na'ama etin la'ela'ef hihif. Waf bu'unai atotona ine' dei' nape Dembinai ma wambel ine'inai.

⁹ Ine' okom naila waf bu'unai nandafa'ma waf aonai sosambala basefanai. Ea' dei' God, Anan God ine'inai, nandandepena nase'ena danifel lu'unai endilisi. Ea' epes hiesi ina sandanifel si'i ine', owa'.”

¹⁰ Ea' God na'iam wapoti' na'i, “Dembinai, fowa' dambadamba Ine' etina nanda' etap nataga lagel ine'inai atona nanda' ilif otaga wapoti' nataga nape.

¹¹ Amama anona nemaf higililam, ea' ine' nepe la'ela'ef. Amama mope mefe' mefe' anona nemaf motaga apim si'i luwaguf apimi.

¹² Anona nemaf ine' nimbomefam si'i sumagwia luwaguf, ea' amam moho'ofam si'i luwaguf. Ea' ine' la'ela'ef nepe na'ama etin, ina anona nemaf hagena nogota ine'inai, owa'.”

¹³ God ina na'ipa anona ensel Ana'i, “Ine' nepe na'ae lagel da'isinai Ae'anai wa'ol. Ine' nepe la'ela'ef nefe' nefe' nemaf anama ae' enda' naumbih ine'isi sefe' owina bo'wagah ine'imi.” God ina na'ipa anona ensela basef amama, owa'. Na'ipa Nogalomana Ananinai atona.

¹⁴ Dei' amam ensel emi egafum? Amam ambagof bu'wami Godi. Anan nasapa'am mafi'i ma migiambama epes isima dei' God nofa'as sotanimani ma anona nemaf sofa' pe bu'unai.