Filipai 4 - Basef Buꞌwami Godi

Esis sope opalef etifim sondanifel sofa' ukup bu'wami

¹ Dei' ipe' alupipei ae'ipei, ae' okom nainailipa a'i itilipa ea' pape laogona ae'. Ofagema ma andanifel, andanifel ma ipe' etipa si'i agel lu'unai amamaga bu'wami anona nemaf efa'ami. Ipe' pitu la'ifipama Dembinai si'i basef ali' a'ipipami.

² Ipe' nematawa bipa, Yuodia neloma Sintike, ipe' peme'. Ipe' petaga opalef etifima Dembinai.

³ Ea' dei' ahali' ine' aman alupinai endilisi nanda' opeh Godi andeande', a'ipinago nigiambamago nematawa awama biawa. Awau la'ela'ef wandao'oma walome wanda' opeh la'ifiwa wawalipasa basef bu'wami Godi. Ea' Klemen naloma enis epes ae'asi wanda' opeh atom Godi, esis wapoti' sanda' opeh salomafa. Agof asasimi mape nomona buk ambal namunainai agof epes sope andeande' la'ela'ef mailanai.

⁴ La'ela'ef ipe' pendanifel ma Dembinai. Ae' a'iam wapoti', ipe' pendanifamana.

⁵ Penda' waf so'umbilinai ma epes hiesi sitilipa sogawa ipe' paila waf bu'unai anama. Dei' main, Dembinai felefele' niefi'i.

⁶ Ipe' ina ukup motamea mefe' ma amamaga hiami meatagamipei, owa'. Ipe' pi'ipanam Goda amamaga amama. Penda' betena anan pinifelona pihali'ana ma amamaga ipe' ukup ma'iami.

⁷ Ipe' pape la'ifipa paloma Krais Jisas, dei' opaf awanena God nase'apanai nikila' gawa hianai epesi hi'alana nope nolomepa nili'akwa opalef moloma ukup ipe'imi andeande'.

⁸ Alupipei, dei' ae' a'i enda' basef akutaimi ma ipe'. A'i ipe' ukup mopoma anona waf na'ama. Maim amamaga endilisimi, bu'wami moloma amamaga bu'wami dende' ma epes sanifelami, moloma amamaga bu'wami hiami si'i amama, ipe' ukup mopoma amama.

⁹ Waf hianai ipe' patolona pame'ana awalipipanai, anama ipe' penda'ana la'ela'ef. Ea' God nese'apa opalef awanemi nope nolomepa.

Pol nanifela esis Filipai sase'ana anom amamaga na'a

¹⁰ Endilisi, fowa' ipe' ukup mapoma ae', ea' ipe' eaf a'epa ma pagiambame. Ea' dei' pati eafa pagiambame pihi'ambe ukup ipe'imi maimaila ae'. Ea' andanifela Dembinai endilisi.

¹¹ Ae' ina a'iam na'ama a'i ae' amamaga a'e, owa'. Dei' main, ae' egawa na'ama. I'i maim amamaga ma'ome, hapaimi. Opaf ae'anai awanena ma amamaga amama.

¹² Fowa' ape na'ama. Anom nimeguf ape wafiwi, amamaga a'e. Anom nimeguf ahapila amamaga hiami. Ae' egawa waf sa' gwa'aimi hiami naloma waf nolom mahasanai wapoti'. Ae' egawa waf anama biefina sahapila amamaga hiami o amamaga a'e wapoti'. Ama nimeguf hiami anama hiagoma ape opaf nape awanena ma amamaga hiami na'amaimi.

¹³ Krais nanda'e la'ifiwi nase'e pepel. Amama atom dei' la'ifiwi ma anda' amamaga hiami hi'alam.

¹⁴ Ea' ipe' panda' waf bu'unai palome pandao'oma ma pefa' nimanimi ae'ami.

¹⁵ Ea' ipe' amam nematawa Filipai, ipe' pegawa na'ama. Nemaf anama ae' asefela opeh awalipipa basef bu'wami Godi ma akwaha anona wambel nape etap hiagoma Masedonia, ina dei' enis Kristen sios sagiambame. Ina enis Kristen sandao'oma salome ma waf anama sase'asa amamaga na'a, ata' owa'. Ipe' etipa panda'am na'ama.

¹⁶ Ae' ali' ape Tesalonaika, ipe' pagiambame nimeguf hiami.

¹⁷ Ea' dei' ae' ina ahali'ipa ma amamaga gwa'aimi maim, owa'. Ae' okom na'i nambimb God nogwa waf bu'unai ipe' panda'anai pagiambame nose'epa amamaga bu'wami.

¹⁸ Otamba gwa'aimi amamaga maim ipe' pasi'iami hiami mikila' ae' okom na'iami. Amamaga ipe' panda'am paso' Epafroditus nofa'ami efa'am ea'. Amama si'i ofa pindalalima God pese'anami alogw ma'ami. Ea' ipe' pase'anam God, nofa'am opaf ananinai ambo'ona.

¹⁹ God amamaga hiamunai nambimb nowapatiamapam amamaga amama ipe' a'ipamami ma lagel Jisas Kraisi atona.

²⁰ God anan Ahalomapa ape'inai. Ea' ape' minifelona mefela agel ananinai lu'una la'ela'ef. Endilisi.

Anom basef akutaimi danifalimi

²¹ Ae' anda'mepago nemaf bu'wami ipe' hipei amam nematawa Godi pape la'ifipa paloma Krais Jisas. Amom owape maloma aho'mandifel manda'mepago nemaf bu'unai ipe'.

²² Ea' amam nematawa hiesi Godi sandanifel sanda' nemaf bu'unai ma ipe'. Esis isima sanda' opeh ipat Sisar gavman dembinai esis Romi, esis wapoti' sandanifel ma sanda'mepago nemaf bu'unai ipe'.

²³ Ae' a'i okom Dembinai Jisas Kraisi nainaila ape'i na'a nope nolomago ipe' la'ela'ef.