Filipai 3 - Basef Buꞌwami Godi

Emi egafis sembale'efa Kraisi, esis bo'wes endilisi

¹ Ipe' alupipei, ae' a'i i'i basef ae'ami hi'ilam na'ama. Ipe' pendanifel ma Dembinai. Ae' ina okom nimanima enda' basef amama atom do'ok ali' a'ipipami, owa'. Amama mili'akwepa ma waf aonai.

² Ipe' pindumafuma andeande' ma amam amama manda' waf aonai si'i nombagw aolupumi. Amam ma'i mi'ipipa mehip momboma ukup ipe'imi petopa' alop ipe'inai ma pila mi'uli fowa' God naso' Mosesanai.

³ God atona nandandepapa mape ananipai. Ambal Bu'unai Ananinai atona dei' manda' lotumana mafela agel Jisas Kraisi atona. Ape' ina mombale'efa waf satopa' alopanai nagiambamapa, owa'.

⁴ Enis epes Juda ukup ma'i, “Ape' Juda epes bu'upai manda' waf ape'inai hianai andeande' na'ama si'i matopa' alop.” Ea' ae' ikila'asa waf anama. Ae' Judaiwei endilisi.

⁵ Dei' main, nemaf anama ata' sa'owe ape nimeguf 8-peleim mafe' ea' amam matopa' alop ae'anai. Ae' epen Israeliwei. Ae' wambota Benjamini. Ae' esimbel atom esis Hibrui. Ae' Farisi, epen aila mi'uli Godi fowa' naso' Mosesanai. Ae' aila mi'uli anama andeande' ikila' epes hiesi.

⁶ Ae' okom nohafel la'ifiwi endilisi ma anda' opeh Godi. Fowa' anda' opeha aha esis sios amam nematawa Kristen. I'i epes sowaloge ma waf aila mi'uli anama, ae' ofagema a'e.

⁷ Ea' ae' okom napoma Krais atona a'i amamaga amama hiami ali' anda'ami, amama falafumi atom.

^8-9 Ae' ina a'i amamaga amama atom, owa'. Ae' okom napoma Jisas Krais atona Dembinai ae'anai ma amamaga hiami ali' anda'ami. Gawa anama endilisinai nikila'. Ea' ewa' alafugama amamaga amama hi'alam a'i falafumi atom si'i alufuta. Embale'efa Krais atona ape la'ifiwi ma Anan. Ae' andaiwa'ma efa' agel anama aman bo'awe ma mi'uli esis Juda sailanai, owa'. A'i efa' agel bu'unai na'ama. Ae' embale'efa Krais dei' God na'i ae' aman bu'uwei.

¹⁰ Ae' a'i egawa Krais endilisi noloma pepel God nafelona nohafel hi'agif. Ae' a'i elomana ondao'oma ma waf anama ofa' nimanimi ma ofa' ukup etifim amama si'i Anan okom napoma nemaf anama naga'anai.

¹¹ Ae' a'i enda'am na'ama ma anona nemaf God nefele wapoti' hi'agif.

Pol faso'mana nasagih mehip nafe' nataga ikwaf

¹² Ae' ina okom na'i efa' waf anama Kraisi hi'alana ape bo'awe andeande', ata' owa'. Dei' ape embalo'a waf anama la'ifiwi. Dei' main? Anan nofale nandandepe ma epe ananiwei si'iwi.

¹³ Ipe' alupipei, ae' ina okom na'i enda' waf anama ea', ata' owa'. Efa' okom atotona na'ama. Okom nase'e amamaga hiami fowa'imi maloma amamaga fowa' matagamai ea' dei' anda' opeh la'ifiwi efa' amamaga efa'am anona nemaf si'i epen nasagih mehipa nikila' nefa'am.

¹⁴ Ae' faso'me asagih mehip etaga ikwafa efa' agola waf bu'unai. Amama na'ama. Krais Jisas nanda' opeh bu'wami nagiambame ape la'ifiwi aloma anan. Dei' God nofale ma efe' epe la'ela'ef heven.

¹⁵ Ape' hiapai mahapila ukup mataga si'i epes dambesi ma waf bu'unai, ape' ukup mefe' etifima basef amama ali' anda'ami. Ama i'i ipe' anom nomonas mopeipa, anona nemaf God nomboma ukup ipe'imi wapoti'.

¹⁶ Ape' mope na'ama. Waf bu'unai mefa'ana ea', anama mombalo'ana la'ifipa.

¹⁷ Alupipei, ipe' hipei pila waf ae'anai. Ea' pendandepas andeande' epes saila waf afa'inai ma pilana.

¹⁸ Nimeguf hiami a'ipipa basef amama ma naumbih Kraisi. Dei' na'ama etin a'ipipam wapoti' aloma embif motah naep ae'ami. Epes hiesi saila waf aonai ea' sataga naumbih ma basef bu'wami Krais naga' lawag usi'inai tu'wanainai.

¹⁹ Ukup asasimi mapoma alop asasinai atona, anama si'i god asasinai. Esis sa'i esis etis agufisi sandanifela ma waf naninani aonai ambagof awomunai. Ea' ukup mapoma amamaga etapami atom. Epes isima anona nemaf higililas wambel aonai hel.

²⁰ Ape' mape amam nematawa ilifapai, wambel ape'inai heven. Ea' mape mohafa Dembinai Jisas Krais anona nemaf nokwaha heven nisila'i nefa'apa motanimani.

²¹ Anona nemaf nomboma alop anama ape'inai notaga bo'ona nifififil endilisi si'i alop ananinai. Anan nonda'ama pepel ananinai atona. Pepel anama anan nonda' amamaga hiami mofe' mope owina anan atona.