Filipai 2 - Basef Buꞌwami Godi

Ape' monda' ape' mofe' owina esis sahin owan

¹ Ipe' pefa' pepel Kraisi? Ipe' pegawa Krais okom nainailipa nanda' opalef ipe'imi mape awanem? Ipe' pape ukup etifim paloma Ambal Bu'unai Godi? Ipe' ukup mapoma pagiambama ipe' atona etin? Endilisi, waf anama napomepa na'ama.

² I'i na'ama, penda' ae' endanifel endilisi ma waf anama. Pepe ukup etifim, mimila God noloma sahin owan ea' pepe opalef etifim endilisi.

³ Ipe' ina ukup mopoma ipe' etipa penda' opeha enis epes safela agof ipe'imi lu'um, owa'. Ipe' pefe' owina enis epes ea' ina pi'i pepe ilifa esis, owa'.

⁴ Ipe' ina ukup mopoma ipe' etipa, owa'. Ukup mimila enis epes wapoti' soloma maim amamaga esis ukup ma'iami.

Krais nanda' anan atona nape owin. Amama atom dei' God nafelona nalata ilif

⁵ Ipe' pihapila ukup etifim si'i Krais Jisas okom na'iam.

⁶ Anan nape God endilisinai la'ela'ef, ea' ina okom na'i nohapila waf anama la'ela'ef nope si'i God, owa'.

⁷ Anan nowa' alafuga ma waf anama ea' dei' nataga epen endilisinai nanda' waf anama nataga agel a'ana nanda' opeh nape owina enis epes.

⁸ Esis satolona sati anan nataga epen endilisinai. Ea' nanda' anan nafe' owina God naloma epes. Naila okom Godi atona nafe' nafe' ma naga' lawag usi'inai tu'wanainai.

⁹ Ea' waf anama atona anan nanda'anai dei' God nafelona nalata ilif endilisi. Ea' nase'ana anona agel nikila' agof hiami.

¹⁰ Anan nase'ana agel anama Jisasa anona nemaf epes soloma ambagof maim hiami mape heveni maloma anom amama mape etap anae' ilif owini hi'ilam mindiwa nembawa ma anan mafela agel ananinai lu'una,

¹¹ mowalapa basef mi'iam na'ama mi'i, “Jisas Krais Anan Dembinai.” Monda'am na'ama mefela agel Ahalomana Godi nolata ilif endilisi.

Ape' mope si'i mafifili mope owina epes hiesi ma mihi'ambas waf bu'unai

¹² Ea' ipe' alupipei ae'ipei, ae' okom nainailipa. Fowa' la'ela'ef ape alomepa ipe' paila basef ae'ami. Ea' dei' wapoti' penda'am na'ama etin. Dei' ape laogon, ipe' penda'am la'ela'ef pefe' endilisi pikila' fowa' panda'ami. God nanda' opeh bu'wami nakwahomepa waf aonai nofa'epa pitanimani. Amama atom dei' ipe' umbamehepa endilisi pembefa opeh Anan nanda'mepami.

¹³ Dei' main, anan nanda' opeh opalef ipe'imi nomon. Anan atona nafela ukup ipe'imi ma nagiambamepa panda' opeh si'i Anan atona okom na'iam.

¹⁴ Amamaga ipe' pa'i penda'ami, pekwaha basef pandahihianamami moloma waf sandahambasefasami.

^15-16 Penda'am na'ama ma pepe awasi Godi bo'wepa ma basef o waf aonai a'epa. Dei' pape paloma epes hiesi sape etap anae', esis sakwaha waf bu'unai sanda' waf aonai. Ipe' pape palomas pihi'ambasa basef ambal namunaimi si'i ondowa motawa ilif mafifima epes. Penda'am na'ama ma nemaf akutainai Kraisi ae' endanifel ma ipe' ma egawa ina anda' opeh akwaha pepel ae'anai na'a, owa'.

¹⁷ Ipe' pembale'efa God panda' opeh ananimi, amama si'i anom amamaga ipe' pindalali pase'anami. I'i nambimb esis sehe ega' sokolo'wa esimbel ae'ami si'i enis sondolali sakolo' ifat su'utip sanda' ofa sondalalima God, ea' hapaimi, ae' endanifel. Nambim ae' endanifel eloma ipe'.

¹⁸ Ea' na'ama etin ipe' wapoti' pendanifel pelome.

Pol na'ipasa basefa Timoti nambimb nefe' Filipai

¹⁹ I'i Dembinai Jisas ni'i aho', a'i nambimb ina nogota laona esapa' Timoti nefe'mago ipe'. Ma notanima nifi'i ni'ipi ipe' pape andeande'ma panda' ae' la'ifiwi.

²⁰ Timoti anan opaf etifina nalome. Okom ananinai natanea endilisi ma nigiambamepa ma pembale'efa God la'ifipa. Ina anona aman nape na'ae si'i anan, owa'. Anan atona.

²¹ Amam hiami mape maloma ae' mumafi amamaga amamumi atom ea' ina ukup maimaila mumafi opeh Jisas Kraisi, owa'.

²² Ea' Timoti ina si'i amam, owa'. Ipe' pegawa anan aman bu'unai, okom na'i nigiambamepa. Anan nagiambame ma wawalipasa basef bu'wami Godi si'i nogalomana nagiambama ahalomana.

²³ Nemaf anama egawa amamaga hiami motagame mi'imama, esapa'ana nefe'mago ipe' mehip.

²⁴ Ae' ape la'ifiwi ma Dembinai a'i anan nambimb nonda'me eaf ekwaha kalabus efe'mago ipe'.

Pol na'ipasa basefa Epafroditus nambimb nefe' Filipai

²⁵ Ae' okom na'i esapa' Epafroditus nefe'mago ipe'. Anan owalome ae'anai. Anan afa' wandao'oma wanda' opeh Godi etin waitu la'ififa ma nimanimi si'i soldia. Fowa' ipe' pasapa'ana nafi'i nagiambame.

²⁶ Opaf ananinai nalef endilisi ma na'i nitilipa. Ea' anan okom nimanima ipe' pame' basefa awes nanda'ana.

²⁷ Endilisi fowa' anan awasina na'i noga'. Ea' God nati anan uwahipina. Ea' ina nati anan atotona uwahipina, owa'. Nati ae' uwahipiwi wapoti'. Anan nandaiwa' endilisi ma opaf nimanina nose'alowe ma Epafroditus noga'.

²⁸ Ea' ae' okom na'i endilisi ma esapa'ana nefe'mago ipe' ma' petolona pendanifel ma opaf ae'anai awanena.

²⁹ Ea' ipe' pendanifel endilisi pefa'ana ma agel Dembinai. Pefela agof amam na'amaimi.

³⁰ Dei' main, anan ina okom napoma nope namona, owa'. Anan okom nohafela opeh Kraisi ea' felefele' ma noga' ma nagiambame. Anan okom napome. Dei' main, ipe' papani laogon anan naho'ofepa nanda' amama.